Ontopolwa 70

Omulumentu a valwa omuposi ta aludhwa

JESUS ina za mo muJerusalem sho Aajuda ya kambadhala oku mu dhenga nomamanya. Konima yethimbo, mEsabati, ye naalongwa ye otaye ende moshilando, notaya mono omulumentu ngoka omuposi okuza kevalo lye. Aalongwa otaya pula Jesus taya ti: “Rabbi, olye a yono, oonguka nenge aakuluntu ye, sho a valwa omuposi?”

Otashi vulika aalongwa ye shi itaala ngaashi oorabbi yamwe, kutya omuntu ota vulu okukala a yona manga e li moshivalelo shayina. Ihe Jesus ota yamukula ta ti: “Haanguka a yono nenge aakuluntu ye, ihe iilonga yaKalunga ya li yi na okuhololwa muye.” Uuposi womulumentu kau shi oshilanduliko shepuko nenge uulunde wokondandalunde wa longwa kuye nenge kaakuluntu ye. Uulunde womulumentu gwotango Adam owe eta okwaahagwanenena kwaantu ayehe notaya vulu ya kale ya lemana, ngaashi okuvalwa omuposi. Uulema womulumentu nguka otau pe Jesus ngashingeyi ompito okuholola iilonga yaKalunga.

Jesus ota tsu omuthindo nkene she endelela okulonga iilonga mbika: “Otse tu na okulonga iilonga yaanguka a tumu ndje manga omutenya,” ye ta ti. “Uusiku tau ya, nokaku na ngoka ta vulu okulonga. Manga ongame ndi li muuyuni, ongame uuyelele wuuyuni.” Masiku Jesus eso lye otali ke mu tula momilema dhomombila moka itaa ka vula we okulonga sha. Manga shika inaashi ningwa, ye ota kala e li onzo yuuyelele wuuyuni.

Konima yokupopya iinima mbyoka, Jesus ota hiyile omayeye pevi nota pilula enono eshona nomayeye. Ote li gwayeke pomeho gomulumentu omuposi nota ti: “Inda, u ki iyoge medhiya lyaSiloa.” Omulumentu osho ta ningi. Naashono e shi ningi, ota vulu okumona ko! Ka li tuu a nyanyukwa mokushuna kwe, sho ta vulu okumona ko oshikando shotango monkalamwenyo ye!

Aashiinda nayalwe mboka ye mu shi, oye shi kuminwa. “Nguka haye ngoka kwa li ha kuutumba nota hehela?” osho taya pula. “Oye,” yamwe taya yamukula. Ihe yalwe itaya vulu oku shi itaala: “Aawe, okwe mu fa.” Ihe omulumentu ota ti: “Ongame tuu nguka.”

“Omeho goye ga tonata ngiini?” aantu oya hala oku shi tseya.

“Omulumentu ngwiyaka, haku tiwa Jesus, okwa pilula enono, okwe li gwayeka momeho gandje nokwa lombwele ndje: Inda kuSiloa, ngu u iyogele mo; ongame nonda yi ko, ndi iyogo, ngaye nonda tonata.”

“Oye oku li peni?” osho taya pula.

“Kandi shiwo,” ta yamukula.

Ngashingeyi aantu otaya fala omulumentu ngoka a li nale omuposi kaawiliki yawo yelongelokalunga, Aafarisayi. Otaya tameke wo oku mu pula nkene a mono ko. “Okwa tula ndje enono pomeho, ondi iyogo nondi wete ko,” omulumentu ta yelitha.

Dhoshili, Aafarisayi oye na ando okukala ya nyanyukwa pamwe nomuheheli nguka omwaaludhwa! Ihe mepingathano naashino, otaya pangula Jesus. “Omulumentu ngoka ke shi gwomuKalunga,” osho taya ti. Omolwashike taya ti ngawo? “Oshoka iha yapula Esabati.” Ihe Aafarisayi yalwe otayi ipula: “Omuntu omulunde ota vulu ngiini okulonga iilongandhindhiliko yi thike mpaka?” Onkee ano opwe ya etopoko mokati kawo.

Otaya pula ano omulumentu taya ti: “Ongoye to mu tile ngiini, sho e ku tonatitha omeho?”

“Oye omuprofeti,” ye ta yamukula.

Aafarisayi otaya tindi oku shi itaala. Oye na uushili kutya otape ya pu na euvathanotsokumwe lyomonanguwi pokati kaJesus nomulumentu nguka okugoyapaleka aantu. Onkee ano opo ya kandule po uupyakadhi, otayi ithana aakuluntu yomuheheli ye ya pulapule. Johannes 8:59; 9:1-18.

▪ Oshike she etitha uuposi womulumentu, noshike haasho she u etitha?

▪ Uusiku mbono kaaku na ngoka ta vulu okulonga oshike?

▪ Sho omulumentu a aludhwa, mboka ye mu shi oyi inyenge ngiini?

▪ Aafarisayi oya topolwa ngiini kokwaaludhwa kwomulumentu?