Ontopolwa 61

Omumati e niwe kompwidhuli ta aludhwa

MANGA Jesus, Petrus, Jakob naJohannes kaaye po, tashi vulika ye li kengondo lyondundu yaHermon, aalongwa yalwe otaya mono uupyakadhi. Mokugaluka kwe, Jesus ota mono mbalambala kutya opu na sha sha puka. Opu na engathithi lyaantu lya gongala tali dhingoloka aalongwa ye, naanongoraamata otaye ya ludhikitha. Aantu oya kumwa noonkondo sho ya mono Jesus, notaya matukile kuye ye ke mu kunde. “Oshike tamu ludhike nayo?” osho ta pula.

Mengathithi lyaantu otamu zi omulumentu te ya komeho, nota tsu oongolo komeho gaJesus nota yelitha ta ti: “Omuhongi, onde eta kungoye omumwandje omumati e na ombepo ombolo. Noshaa mpoka tayi mu kwata, otayi mu [hata po, OB-1986]; oye note eta ondutu mokana e ti ikokota omayego nota si uunkundi. Ongame nonda lombwele aalongwa yoye, ye yi tidhe mo, ihe oya nyengwa.”

Osha yela kutya aanongoraamata otaya ningilile mo aalongwa sho ya nyengwa okwaaludha omumati, tashi vulika mokusheka oonkambadhala dhawo. Jesus ota thiki naanaa mpoka pethimbo ndika lyoontamanana. “Yaye epipi ngoye lyaa na eitaalo,” ye ta ti, “sigo [uunake] ndi na okukala pune? Sigo [uunake] ndi na oku mú idhidhimikila?”

Oohapu dhaJesus odha fa tadhi popi aakalipo ayehe, ihe osha yela kutya otadhi popi unene tuu aanongoraamata, mboka ya li taye etele aalongwa ye uudhigu. Nopo nduno, Jesus ota popi kombinga yomumati ta ti: “Mu eteni kungame.” Ihe manga omumati te etwa kuJesus, ompwidhuli ndjoka yi li muye otayi mu hata pevi notayi mu kama. Omumati ota galangatele pevi nota zi ondutu mokana ke.

“Okwa ningi omasiku ge thike peni, sho she mu adha tango?” Jesus ta pula.

“Omuunona we,” he ta yamukula. “Olwindji [ompwidhuli] ye mu undulile nomomulilo nomomeya, yi mu yone po.” Opo nduno he ote mu indile: “Ihe ongoye ngele to vulu sha, tu silohenda, ngu u tu kwathe.”

Tashi vulika he a konga ekwatho uule woomvula odhindji. Nongashingeyi, molwokunyengwa kwaalongwa yaJesus, ye okwa teka omukumo noonkondo. Jesus otu ukitha eitulomo keindilo lye endelela lyomulumentu, ta popi nomukumo ta ti: “Ngele to vulu, wa ti; oonguka i itaala, iha nyengwa kusha.”

“Ondi itaale,” he ti igidha nziyanziya, ihe ote mu indile ta ti: “Kwatha okwaaitaala kwandje.”

Jesus oku wete kutya engathithi lyaantu otali ya tali matukile kuyo, ota ganda ompwidhuli ta ti: “Ombepo ngoye egoya nombolo, otandi ku lombwele: za mo muye, ngoye ino ya we muye.” Manga ompwidhuli tayi zi mo momumati, otayi mu igidhitha ishewe notayi mu kama noonkondo. Nopo nduno omumati ota lala pevi iti inyenge, opo oyendji yomaantu otaya tameke taya ti: “Okwa si.” Ihe Jesus ota kwata omumati moshikaha, nota thikama.

Nale sho aalongwa ya li ya tumwa ye ku uvithe, oya tidhile mo oompwidhuli. Onkee ano ngashingeyi sho taya yi megumbo otaya pula Jesus paumwene taya ti: “Oshike ano twa nyengwa oku yi tidha mo?”

Jesus otu ulike kutya osha li omolwokwaahe na eitaalo kwawo moku ya yamukula ta ti: “Oludhi nduka ihalu tidhwa mo koshinima shilwe, okegalikano tuu alike.” Osha yela kutya eilongekidho olya li lya pumbiwa okutidha mo ompwidhuli ndjika yi na oonkondo oonene. Eitaalo lya kola pamwe negalikano kuKalunga e ya pe ekwatho lyoonkondo, olya li lya pumbiwa.

Opo nduno Jesus ota gwedha po: “Oshili tandi mú lombwele: andola mu na eitaalo li thike ponsheno yosinapi, ando tamu wapa okulombwela ondundu ndjiyaka: Itumba po mpaka, ngu u hedhe nkwiyaka, ando tayi itumbu po, nokaku na oshinima tashi mú nyenge.” Eitaalo ihali vulu tuu okukala li na oonkondo!

Omaimbo nomaupyakadhi ngoka tagi imbi ehumokomeho miilonga yaJehova otaga vulu okumonika ga fa itaaga vulu okusindwa noitaaga vulu okukandulwa po ngaashi ondundu onene yo yeneyene. Ihe Jesus otu ulike kutya ngele tatu kokeke eitaalo momitima dhetu, tatu li tekele notatu li ladhipike li koke, otali ka tamunuka mo notali ke tu vulitha okutaaguluka omaimbo nomaupyakadhi ga tya ngaaka ngoka ga fa oondundu. Markus 9:14-29; Mateus 17:19, 20; Lukas 9:37-43.

▪ Onkalo ya tya ngiini Jesus ti itsu muyo sho ta galuka kondundu yaHermon?

▪ Jesus okwa tsu omukumo ngiini he yomumati ngoka e niwe kompwidhuli?

▪ Omolwashike aalongwa ya li itaaya vulu okutidha mo ompwidhuli?

▪ Jesus otu ulike kutya eitaalo otali vulu okukala li na oonkondo dhi thike peni?