Ontopolwa 53

Omupangeli e vule aantu ngoka yo ya hala

SHO Jesus ta palutha omayuvi pashikumithalonga, aantu otaye shi kuminwa. “[Nguka] oshili omuprofeti ngoka e na okuya muuyuni,” osho taya ti. Itaya dhiladhila owala kutya Jesus oye omuprofeti ngoka omunene e vule Moses, ihe otaya dhiladhila wo kutya ota ka kala omupangeli ngoka ya hala noonkondo. Ano otaya pangele ompangela ye mu kwate noku mu ninga omukwaniilwa.

Ihe Jesus oku shi shoka aantu taya pangele. Onkee ano ota zi po nziyanziya opo yaahe mu thiminike ye mu ninge omukwaniilwa. Ota laleke omangathithi gaantu ga ye nota thiminike aalongwa ye ya londe mowato noya shune kuKapernaum. Opo nduno ota yi kondundu oye awike a ka galikane. Uusiku auhe mbono Jesus oku li oye awike hoka.

Okathimbo okafupi manga eluwa inaali tenda Jesus ota lengalenga e li kombanda yondungu yondundu nota mono nkene ombepo yoshikungulu tayi dhenge omakuthi mefuta. Kuuyelele womwedhi ngoka gu li pokuudha, molwashoka Opaasa oyi li popepi, Jesus oku wete aalongwa ye ye li mowato taya kondjo nokudhuga momakuthikuthi. Aalumentu otaya dhugu noonkondo dhawo adhihe.

Sho Jesus te shi mono, ota kuluka ko kondundu nota tameke te ende kombanda yomakuthi u uka kowato. Sho Jesus ta thiki powato okwa adha ye enda ko ookilometa ntano nenge hamano lwaampono. Ihe ota tsikile nokweenda ongaangoka a hala okupitilila po. Sho aalongwa taye mu mono, otayi igidha taya ti: “Oshiluli sho!”—OB-1986.

Jesus ote ya yamukula nehekeleko ta ti: “Ongame nguka; inamu tila.”

Ihe Petrus ota ti: “Omuwa, ngele ongoye, lombwela ndje, ndi ye kungoye tandi ende kombanda yomeya.”

“Ila!” Jesus ta yamukula.

Petrus ota londoloka mowato note ende kombanda yomeya u uka kuJesus. Ihe sho Petrus ta mono ombepo yoshikungulu, ota tila, nota tameke ta ningine, oti igidha ta ti: “Omuwa, hupitha ndje!”

Jesus ota ganeke nziyanziya oshikaha she, ote mu kwata nota ti: “Omwiitaali omunenguni ngoye, oshike wa limbililwa?”

Konima sho Petrus naJesus ya shuna mowato, ombepo oya kodha, naalongwa oye shi kuminwa. Ihe oye na ngaa mbela oku shi kuminwa? Ando oya li ye uvite ko ‘iikwiila shoka tayi ti’ (OB-1986) mokupandula oshikumithalonga oshinene shoka Jesus a longo oowili dhontumba dha piti sho a palutha aantu omayuvi niikwiila owala itano noohi mbali, andola inaya kala ye shi kuminwa ngaaka sho ta vulu okweenda kombanda yomeya nota vulu okukodhitha ombepo. Ihe ngashingeyi aalongwa otayi isizimike komeho yaJesus notaya ti: “Ongoye shili Omuna gwaKalunga.”

Meni lyokathimbo okafupi otaya thiki muGennesaret, esilukuti ewanawa popepi naKapernaum. Hoka owato otayi tula. Ihe sho taya londoloka mo komunkulo, aantu otaya dhimbulula Jesus notaya yi ya ka konge aavu momukunda aguhe. Sho aantu mbaka ye etwa ye li koontala dhawo e taya gumu owala oonyemba dhonguwo yaJesus, oya aluka thiluthilu.

Pokati kethimbo mpoka, engathithi lyaantu ndyoka lya mono epalutho lyopashikumithalonga lyaantu omayuvi otali mono kutya Jesus okwa ya. Onkee ano sho tapu ya uuwato uushona tau zi kuTiberias, otaya londo mo notaya yi kuKapernaum ya ka konge Jesus. Sho taye mu mono, otaya pula: “Rabbi, [uunake] we ya po mpaka?” Jesus ote ya ganda, ngaashi tatu ke shi mona meni lyethimbo efupi. Johannes 6:14-25; Mateus 14:22-36; Markus 6:45-56.

▪ Konima sho Jesus a palutha omayuvi pashikumithalonga, aantu oya hala mbela oku mu ningila shike?

▪ Oshike Jesus e wete manga e li kondundu hoka a yile oye awike, nopo nduno ota ningi po shike?

▪ Omolwashike aalongwa kaaye na okukala ya kumithwa unene kiinima mbika?

▪ Oshike tashi ningwa po konima sho taya thiki komunkulo?