Ontopolwa 73

Omusamaria omunamutimahenda

JESUS otashi vulika e li popepi naBetania, okamukunda pu na ookilometa ndatu lwaampono okuza muJerusalem. Omulumentu ngoka omunongo gwOmpango yaMoses, ote ya puye note mu pula ta ti: “Omuhongi, ondi na okulonga shike, ndi thigulule omwenyo gwaaluhe?”

Jesus ota mono kutya omulumentu omunongompango, ita pula owala ngeya molwashoka a hala oku shi tseya, ihe mepingathano naashono, omolwashoka okwa hala oku mu makela. Elalakano lyomunongompango otashi vulika olyo kutya Jesus a gandje eyamukulo komukalo ngoka tagu geyitha Aajuda mboka ihaaya kala po okugeya. Onkee ano Jesus ote etha omunongompango a yamukule ye mwene moku mu pula ta ti: “Mompango mwa shangwa mo shike? Oho lesha mo ngiini?”

Omunongompango ota yamukula nomayele inaaga monika nale, ta totha moompango dhaKalunga muDeuteronomium 6:5 na Levitikus 19:18 ta ti: “Omuwa Kalunga koye u na oku mu hola komutima gwoye aguhe nokomwenyo gwoye aguhe nokoonkondo dhoye adhihe nokomadhiladhilo goye agehe, nomukweni ngaangoye mwene.”

“Wa yamukula dhu uka,” Jesus ta ti. “Yi gwanitha e to kala u na omwenyo.”

Ihe omunongompango ina mbilipalelwa. Eyamukulo lyaJesus inali ukilila sha gwana. Okwa hala Jesus a koleke kutya omataloko ge oge li mondjila nonokutya ye omuyuuki mokukalathana nayalwe. Onkee ano ta pula ta ti: “Omukwetu olye?”

Aajuda oyi itaala kutya oshitya “omukwetu” oshi na ko nasha owala nAajuda ooyakwawo, ngaashi oohapu dha tetekele muLevitikus 19:18 tadhi monika tadhi shi ulike. Muushili wo wene, omuyapostoli Petrus okwa ti nokuli: “One mu shi shi, okweendathana nomukwiilongo nokuya kuye okwo oshidhila shomulumentu Omujuda.” Omunongompango, nosho wo tashi vulika aalongwa yaJesus, oyi itaala ano kutya yo aayuuki ngele haya ningile owala Aajuda ooyakwawo uuwanawa, oshoka pakudhiladhila kwawo mboka kaaye shi Aajuda kaye shi ooyakwawo yoshili.

Ongiini mbela Jesus ta vulu okwoopaleka etaloko lyawo nopwaahe na okugeyitha aapulakeni ye? Ote ya hokololele ehokololo ndyoka tashi vulika lya kankamena koshinima sha ningwa shili. “[Omujuda] gwontumba,” Jesus ta yelitha, “[okwa] zi muJerusalem ta yi kuJeriko nokwa adhika kaayugi, ye mu hula noye mu dhenge iilalo noya yi ye mu thigi e na okamwenyo okashona.”

“[Ohaluka, OB-1986],” Jesus ta tsikile, “nomusaseri gwontumba a adhika te ende nondjila ndjoka, okwe mu mono nokwe mu pitilile. Nomuleviti osho wo; sho e ya pokuma mpoka nokwe mu mono, okwe mu pitilile. Ihe Omusamaria gwontumba e ende mondjila ndjoka, sho e ya po nokwe mu mono, okwe mu sa ohenda.”

Aasaseri oyendji naapeha yawo Aalevi miilonga yomotempeli oya kala muJeriko, oshikako shookilometa 23 mondjila ya nika oshiponga ndjoka ya silukila noometa 900 okuza potempeli mpoka haya longo muJerusalem. Okwa li kwa tegelelwa opo omusaseri nOmulevi ya ka kwathe Omujuda omukwawo ngoka a mona oshiponga. Ihe inaye shi ninga. Mepingathano naashono, Omusamaria oye e mu kwatha. Uutondwe uunene wAajuda okutonda Aasamaria owe ya tukithile Jesus okathimbo opo ka piti moku mu ithana “Omusamaria.”

Mbela Omusamaria ota ningi po shike opo a kwathe Omujuda? ‘Okwa yi kuye,’ Jesus ta ti, “a manga iilalo ye, a tile mo [omahooli nomaviinu, OB-1986], okwe mu londeke konkutsa ye nokwe mu [sisidhile] kongulu yaayenda nokwe mu hungu. Nesiku lyanofu mokuthikama kwe a kutha mo oondenari mbali [ofuto yomasiku gaali konyala] nokwe dhi pe mwene gwegumbo lyaayenda nokwa ti: Mu hunga, nongele itadhi gwana, otandi ku pe mokugaluka.”

Konima yokuhokolola ehokololo, Jesus ota pula omunongompango: “Pandunge dhoye oguni po mwaambaka yatatu a li omukwawo gwaangoka a adhikile kaayugi?”

Omunongompango ngoka inaa hala okuzimina uukwatya uuwanawa wOmusamaria, ota yamukula owala ta ti: “Oongoka e mu sile olukeno.”

“Inda, u ka ninge ngaaka,” Jesus osho ta hulitha ta ti.

Ando Jesus okwa popile shu ukilila komunongompango kutya mboka kaaye shi Aajuda nayo wo ooyakwawo, andola omulumentu ina kala owala inee shi zimina, ihe otashi vulika ando oyendji yomaapulakeni ya hogolola okugama kombinga ye moonkundathana naJesus. Ehokololo ndika lya fa lyolela olye shi yelitha ano pamukalo ngoka gwaa shi okupatanekwa kutya ooyakwetu osha kwatela mo wo aantu mboka kaaye shi yomomuhoko gwetu nokaaye shi yomoshigwana shetu. Jesus iha longo tuu aantu komukalo omukumithi! Lukas 10:25-37; Iilonga 10:28; Johannes 4:9; 8:48.

▪ Omapulo geni omunongompango ta pula Jesus, nosha yela kutya elalakano lyokupula kwe olyashike?

▪ Aajuda oyi itaala oolye oyo ooyakwawo, netompelo olini li li po nokuli kutya aalongwa nayo osho ye shi tala ko?

▪ Jesus ota yelitha ngiini etaloko ndyoka li li mondjila opo omunongompango kaa vule oku li pataneka?