Ontopolwa 4

Omusimba ihe ina hokanwa

MARIA oku na etegelelo lyoomwedhi ndatu. Dhimbulukwa kutya okwa li a talele po Elisabet manga etegelelo lye opo tali ya, ihe ngashingeyi oku li ishewe kegumbo kuNasaret. Mbala onkalo ye otayi tseyika kwaayehe pomukunda gwawo. Dhoshili, oku li monkalo yinikitha oluhodhi!

Shoka tashi nayipike onkalo osho kutya Maria okwa yalekwa komuhongi gwiipilangi Josef. Nokwa tseya kutya kohi yOmpango yaKalunga yi na ko nasha naIsrael, omukiintu ngoka a yalekwa komulumentu gumwe ihe ota kwatathana nehalo pamilalo nomulumentu gulwe oku na okudhipagwa nomamanya. Ongiini mbela ta vulu okuyelithila Josef kombinga yetegelelo lye?

Molwashoka Maria okwa ningile oomwedhi ndatu a za po, otatu vulu okukala nuushili kutya Josef okwa hala noonkondo e mu mone. Sho taya tsakanene, otashi vulika Maria te mu hokololele onkundana ndjoka. Otashi vulika ta kambadhala oku shi mu yelithila nawa ngaashi ta vulu kutya oku na etegelelo lyombepo ondjapuki yaKalunga. Ihe ngaashi to vulu oku shi dhiladhila, shika osho oshinima oshidhigu noonkondo kuJosef oku shi itaala.

Josef okwa tseya kutya Maria oku na edhina ewanawa. Nosha yela kutya oku mu hole noonkondo. Ihe mekondjithathano naashoka ta popi, osha fa shili e na etegelelo lyomulumentu gulwe. Nonando ongaaka, Josef ina hala Maria a dhipagwe nomamanya nenge a sithwe ohoni montaneho. Onkee ano ota tokola e mu henge po ongumitila. Pethimbo ndyono, oonakwiiyaleka oya li haya talika ko ya fa ya hokana, nehengano olya li lya pumbiwa okuhulitha po eiyaleko.

Konima yaashono, manga Josef ta dhiladhila natango oshinima shika, ota kotha. Omuyengeli gwaJehova ote mu holokele mondjodhi nota ti: “Ino tila okweeta kungoye Maria, omukiintu gwoye; oshoka ela ndi e li na olyOmbepo Ondjapuki. Oye ota ka vala okanona okamati, e to [ka] luku Jesus, oshoka oye ta hupitha oshigwana she omoondjo dhasho.”

Josef sho a penduka, ka li tuu a pandula! Pwaahe na okukakadhala ota ningi shoka omuyengeli e mu lombwele. Ota fala Maria kegumbo lye. Muushili wo wene, oonkatu ndhika dhomontaneho odhi li ehokanitho notadhi ulike kutya Josef naMaria ngashingeyi oya hokana paveta. Ihe manga Maria e li metegelelo lyaJesus, Josef ita kwatathana nando naye pamilalo.

Tala! Maria oku na etegelelo enene, onkene Josef ote mu kayilike kokasino. Otaya yi peni, nomolwashike taya yi molweendo manga Maria e li pokumona okanona? Lukas 1:39-41, 56; Mateus 1:18-25; Deuteronomium 22:23, 24.

▪ Josef oku uvite ngiini sho tu uvu kutya Maria oku na etegelelo, nomolwashike?

▪ Josef ote shi ende ngiini opo a henge po Maria yo inaaya hokana natango?

▪ Oonkatu dhomontaneho dhini dhi li ehokanitho lyaJosef naMaria?