Ontopolwa 9

Onkalamwenyo yonale yaandjawo yaJesus

PETHIMBO lyokuputuka kwaJesus, Nasaret osha li oshilando oshishona inaashi simana. Oshi li momukunda gwiikulundundu moshitopolwa shoka hashi ithanwa Galilea, kaaku shi kokule nEsilu ewanawa lyaJisreel.

Sho Josef naMaria ye eta Jesus mpaka okuza kuEgipiti, otashi vulika a li e na oomvula mbali lwaampono, nosha yela kutya oye awike okanona kaMaria. Ihe inapu pita ethimbo ele. Konima yethimbo Jakob, Josef, Simon naJuda oya valwa, na Maria naJosef oya mono wo aanona aakadhona. Lwahugunina, Jesus okwa kala e na aamwayina yahamano aashona aamati naakadhona lwaampono.

Jesus oku na wo aakwanezimo yalwe. Otu sheni nale ntsezi ye omukuluntu Johannes, ngoka a kala kokule kuJudea. Ihe popepi, muGalilea, omwa kala Salome, ngoka sha yela kutya omumwayina gwaMaria. Salome okwa hokanwa kuSebedeus, ano oyanamati yawo yaali Jakob naJohannes, oyo oontsezi yaJesus. Katu shi wo ngele Jesus okwa kala ethimbo olindji pamwe naamati mbaka pokuputuka kwe, ihe konima yethimbo oya ka ninga ooyakwawo yopothingo.

Josef oku na okulonga nuudhiginini opo a sile oshimpwiyu uukwanegumbo we mboka tau koko. Oye omuhongi gwiipilangi. Molwashoka Josef ota putudha Jesus e li ngaashi omwana gwe mwene, Jesus ota lukwa ano “omuna gwomuhongi gwiipilangi.” (OB-1986) Josef ota longo wo Jesus okukala omuhongi gwiipilangi, noti ilongo nawa. Nomolwashono aantu konima yethimbo taya pula kombinga yaJesus taya ti: “Ke shi nani omuhongi gwiipilangi?”—OB-1986.

Oshinima shoka sha li sha simana unene monkalamwenyo yuukwanegumbo waJosef osho elongelokalunga lyaJehova Kalunga. Mokutsa kumwe nOmpango yaKalunga, Josef naMaria otaya longo aanona yawo elongo lyopambepo ‘ngele ye li megumbo nongele ye li mondjila, ngele taya ka lala nongele taya penduka po.’ MuNasaret omu na osinagoga, notatu vulu okukala nuushili kutya Josef okwa li wo ha fala aluhe uukwanegumbo we hoka oku ka longela Kalunga. Ihe kapu na omalimbililo kutya omalweendo ngaka ihaaga faula gokuya kotempeli yaJehova kuJerusalem oya li haya kala ye ga nyanyukilwa unene. Mateus 13:55, 56; 27:56; Markus 15:40; 6:3; Deuteronomium 6:6-9.

▪ Jesus oku na aamwayina aamati naakadhona aashona yangapi lwaampono, nayamwe yomuyo omadhina gawo ogeni?

▪ Oontsezi yaJesus yatatu ya tseyika nawa oyo oolye?

▪ Iilonga yini Jesus ta longo lwahugunina, nomolwashike?

▪ Elongo lya simanenena lini Josef ta longo uukwanegumbo we?