Ontopolwa 75

Onzo yelago

JESUS pethimbo lyuukalele we muGalilea, okwa longo iikumithalonga, nongashingeyi ote yi endulula muJudea. Pashiholelwa, ota tidha ompwidhuli momulumentu ndjoka ya li tayi mu imbi a popye. Omangathithi gaantu oge shi kuminwa, ihe aapataneki otaya pendutha epataneko lya faathana naandyoka lya penduthilwe muGalilea. Otaya ti: “Oompwidhuli te dhi tidhitha [mo] Belsebul, omukuluntu gwoompwidhuli.” Yalwe oya hala Jesus a gandje uunzapo owindji u na ko nasha nokutya oye lye, notaya kambadhala oku mu makela moku mu pula endhindhiliko lyomegulu.

Mokutseya shoka taya dhiladhila, Jesus ota gandja eyamukulo kaapataneki ye muJudea lya faathana naandyoka a gandjele kwaamboka yomuGalilea. Ota ti kutya uukwaniilwa kehe mboka tau itsile ondumbo, otau gu po. Ota pula ta ti: “Ano Satana ngele ti itsile ondumbo, [uukwaniilwa we otau, NW] kala po ngiini?” Otu ulike konkalo yoshiponga moka aapataneki ye ye li sho ta ti: “Oompwidhuli ngele tandi dhi tidhitha mo omunwe gwaKalunga, nena [uukwaniilwa waKalunga owe, KB] ya kune.”

Mboka ya mono iikumithalonga yaJesus, oye na okwiinyenga kuyo ngaashi mboka omathelemimvo ga piti ya ningile sho ya mono Moses ta longo oshikumithalonga. Oyi igidhile taya ti: “Omunwe ngu gwaKalunga.” Iipango Omulongo oya li wo ya nyolwa komayambi gomamanya “komunwe gwaKalunga” ngoka. Nosho wo “omunwe gwaKalunga”—ombepo ye ondjapuki, nenge oonkondo dhe tadhi longo—ndjoka tayi vulitha Jesus okutidha mo oompwidhuli nokwaaludha aavu. Onkee ano Uukwaniilwa waKalunga owe ya kaapataneki mbaka, oshoka Jesus ngoka a langekwa po a kale Omukwaniilwa gUukwaniilwa, oku li naanaa mpaka mokati kawo.

Jesus ota tsikile ano ta yelitha kutya oonkondo dhe dhokutidha mo oompwidhuli odho euliko lyoonkondo dhe dhi vule dhaSatana, ngaashi naanaa uuna omulumentu omunankondo te ya nota sindi omulumentu a homata nokomayego ngoka ta tonatele uuwa we. Ote endulula wo eudhi ndyoka a hokololele muGalilea li na ko nasha nombepo ya nyata. Ombepo otayi zi mo momulumentu, ihe ando omulumentu okwa li inu udhitha ehala ndyono lyaa na sha niinima iiwanawa, andola ombepo otayi galuka pamwe noonkwawo heyali, nonkalo yomulumentu otayi nayipala shi vulithe ngaashi ya li nale.

Manga omukiintu ta pulakene kelongo ndika e li mengathithi lyaantu, otali mu inyengitha i igidhe mokule ta ti: “Ela lye ku humbata oli na elago, nomagundji we ga yamu.” Molwashoka ehalo lyomukiintu kehe Omujuda olyo okukala yina yomuprofeti nuunene tuu yaMessias, otatu vulu oku shi uva ko molwashike omukiintu nguka ta popile ngawo. Osha yela kutya ye okwa li ta dhiladhila kutya Maria oye ngoka ta vulu okukala omunelago molwashoka ye oku li yina yaJesus.

Ihe Jesus ota pukulula nziyanziya omukiintu shi na ko nasha nonzo yelago lyashili. Ota yamukula ta ti: “Oshili aanelago oomboka taa uvu oohapu dhaKalunga notaye dhi dhiginine.” Jesus ina tya nando yina, Maria, oku na okupewa esimano lyi ikalekelwa. Mepingathano naashono, oku ulike kutya elago lyashili otali monika mokukala omupiya gwaKalunga omudhiginini hamokukala nekwatathano lyontumba kehe lyopanyama nenge omipondo dhontumba.

Ngaashi e shi ningile muGalilea, Jesus ota tsikile wo okuganda aantu yomuJudea, molwashoka taya pula endhindhiliko lyomegulu. Ote ya lombwele kutya itaya ka pewa endhindhiliko kakele kendhindhiliko lyaJona. Jona okwa ningi endhindhiliko molwokukala kwe omasiku gatatu mela lyohi nomolwokuuvitha kwe nuulaadhi, hoka kwi itedhululitha Aaninive. Jesus ota ti: “Ihe tala nguka e li mpaka, oye e vule Jona.” Omukwaniilwakiintu gwaSaba naye wo okwa li a kuminwa uunongo waSalomo. Jesus ota ti wo: “Ihe tala, nguka e li mpaka, oye e vule Salomo.”

Jesus ota yelitha kutya uuna omuntu ta tema onyeka yomagadhi, ine yi tula mekololo nenge kohi yontungwa ihe okoshihukikwanyeka opo aantu ya vule okumona uuyelele. Otashi vulika a hala okutya okulonga aantu mbaka aathengalali ye li mokati kaapulakeni ye nokulonga iikumithalonga montaneho yawo, otashi vulu okufaathanithwa nokuholeka uuyelele wonyeka yomagadhi. Omeho gaatali ya tya ngaaka kage li nawa, nenge itaga tala shu ukilila, nomolwashono iikumithalonga ye itaayi adha elalakano lyayo.

Jesus opo owala a li a tidha mo ompwidhuli nokwa ningitha omulumentu ngoka a li ihaa popi ta vulu okupopya. Shika oshi na okwiinyengitha aantu mboka ye na omeho ge li nawa, nenge haga tala shu ukilila, ya pandule oshilonga shika sha simana nokuuvitha onkundana ombwanawa! Ihe aapataneki mbaka inaye shi ninga. Ano lwahugunina Jesus ota ti: “Tala ano, uuyelele mbu u li mungoye, waa ninge omilema. Ano olutu lwoye aluhe ngele lwa yela, mwaa na nando ontumba yi li momilema, otalu ningi uuyelele auke, ngoye wa fa wa minikilwa koonte dhonyeka.” Lukas 11:14-36; Eksodus 8:14, 15; 31:18; Mateus 12:22, 28.

▪ Aantu otayi inyenge ngiini sho Jesus a aludha omulumentu?

▪ “Omunwe gwaKalunga” oshike, nongiini Uukwaniilwa waKalunga we ya kaapulakeni yaJesus?

▪ Onzo yelago lyashili oyini?

▪ Omuntu ota vulu ngiini okukala e na eho li li nawa?