Ontopolwa 115

Oontamanana tadhi holoka po

ONGULOHI oyo tuu ndjoka, Jesus okwa longo aayapostoli ye oshiilongomwa oshiwanawa miilonga yeifupipiko mokuyoga oompadhi dhawo. Konima yaashono, okwa tameke Edhimbuluko lyeso lye ndyoka tali hedha popepi. Ngashingeyi, unene tuu moku shi talela kwaashoka opo sha ningwa, otapu ningwa sha oshikumithi. Aayapostoli ye oye na oontamanana oondhigu kombinga yaangoka omunene mokati kawo! Osha yela kutya shika oshi li oshitopolwa shomaludhi taga tsikile.

Dhimbulukwa kutya sho Jesus a shituluka kondundu, aayapostoli oya li taya ningi omaludhi kombinga yaangoka omukuluntu mokati kawo. Kakele kaashono, Jakob naJohannes oya li ya pula oondondo dha simana mUukwaniilwa, shoka she eta natango omaludhi mokati kaayapostoli. Ngashingeyi, ongulohi yahugunina pamwe nayo, Jesus ina yemata tuu sho te ya tala taya ningi ishewe omaludhi! Ota ningi nduno ngiini?

Pehala lyokunyenyetela aayapostoli ye shi na ko nasha neihumbato lyawo, Jesus ota tompathana ishewe nayo neidhidhimiko ta ti: “Aakwaniilwa yiilongo ohaye yi pangele nomalenga gawo haga ithanwa oohekulu. Ihe one hangaaka, . . . Oshoka olye e vule omukwawo, oonguka ta kuutumba poshililo nenge oonguka ta yakula? Haangoka ta kuutumba poshililo?” Opo nduno ote ya dhimbulukitha oshiholelwa she e ta ti: “Ihe ngame ndi li mokati keni ongaanguka ta yakula.”

Nonando inaya gwanenena, aayapostoli oya kala puJesus momahepeko ge. Onkee ano ta ti: “Otandi ningi ehangano nane, ngaashi naanaa Tate a ningi ehangano nangame molwuukwaniilwa.” (NW) Ehangano ndika lyopaumwene pokati kaJesus naalanduli ye aadhiginini otali ya hanganitha naye okukala ye na ombinga melelo lyuukwaniilwa we. Omwaalu owala gwa ngambekwa gwo 144 000 lwahugunina gwa taambwa mehangano ndika lyUukwaniilwa.

Nonando aayapostoli oya pewa etegameno ekumithi okukala ye na ombinga melelo lyUukwaniilwa waKristus, pethimbo ndino oya nkundipala pambepo. “Uusiku mbuka wonena one amuhe otamu iyageke ndje,” Jesus ta ti. Ihe Jesus ota lombwele Petrus kutya Okwe mu galikanene note mu ladhipike ta ti: “Nge wa galuka ihe, koleka ooyakweni.”

“Aamwandje,” Jesus ta yelitha, “okathimbo natango ondi li pune. Otamu ka konga ndje, nongaashi nda lombwele Aajuda: Oonkoka tandi yi, kamu wapa okuya ko, osho tandi mú lombwele wo ngashingeyi. Oshipango oshipe otandi shi mú pe, mu holathane, ngaashi nda kala ndi mú hole; osho nane wo mu holathane. Opo mpoka ayehe taye mú dhimbulula, one aalongwa yandje, ngele mu holathane.”

“Omuwa, oto yi peni?” Petrus ta pula.

“Kokuma nkoka tandi yi, ku wapa okulandula ndje ngashingeyi,” Jesus ta yamukula, “ihe komeho oto ka landula ndje.”

“Omuwa, oshike itandi wapa oku ku landula ngashingeyi?” Petrus okwa hala e shi tseye. “Omwenyo gwandje otandi gu ku gandjele.”

“Omwenyo gwoye oto gu gandjele ndje?” Jesus ta pula. “Oshili tandi ku lombwele: onena, uusiku wonena, ekondombolo manga inaali iga lwaali, ongoye to idhimbike ndje lutatu.”

“Nando ndi se pamwe nangoye,” Petrus ta tindi, “itandi ku idhimbike nando okuli.” Nomanga aayapostoli yalwe taya ti wo ngaaka, Petrus oti itadha ta ti: “Nando ayehe naye ku iyageke, hangame tandi ku iyageke nando okuli.”

Jesus otu ulike kethimbo sho a tumine aayapostoli molweendo lweuvitho muGalilea kaaye na okampunda kiimaliwa nompunda yokweenda nayo e ta pula ta ti: “Omwa pumbwa sha?”

“Aawe nando osha,” osho taya yamukula.

Ota ti: “Ihe ngashingeyi, ngoka e na okampunda kiimaliwa, ne ka kuthe, a kale nako, nompunda osho wo, naangoka ke na, oye na lande po elwakani lye, ye ni ilandele egongamwele. Oshoka otandi mú lombwele: Omungame mu na okutsakanithwa shono sha shangwa: Oye a yalulilwa maakolokoshi, oshoka ayihe mbiyaka ya shangelwa ndje, otayi gwanithwa.”

Jesus ota popi ethimbo ndyoka ta ka alelwa pamwe naalongi yuuwinayi, nenge aakaanompango. Otu ulike wo kutya konima yaashika aalanduli ye otaya ka taalela omahepeko omadhigu. “Omuwa, tala, ope na omagongamwele gaali,” yo taya ti.

“Oga gwana” (NW), osho ta yamukula. Ngaashi tatu ka mona, okukala ye na omagongamwele, otashi ka pa nziya Jesus ompito oku ya longa natango oshiilongomwa sha simana noonkondo. Mateus 26:31-35; Markus 14:27-31; Lukas 22:24-38; Johannes 13:31-38; Ehololo 14:1-3.

▪ Omolwashike oontamanana dhaayapostoli oonkumithi unene?

▪ Jesus ota kandula po ngiini oontamanana?

▪ Oshike tashi tsakanithwa kehangano ndyoka Jesus ta ningi naalongwa ye?

▪ Oshipango oshipe shini Jesus ta gandja, nosha simana ngiini?

▪ Einekelo lya pitilila lini Petrus tu ulike, noshike Jesus ta popi?

▪ Omolwashike omalombwelo gaJesus ge na ko nasha nokuhumbata okampunda kiimaliwa nosho wo ompunda yokweenda nayo ga yooloka ko kwaangoka a gandjele nale?