Ontopolwa 79

Oshigwana sha kana, ihe haashihe

NZIYANZIYA konima yoonkundathana dhaJesus naamboka ya gongala pondje yegumbo lyOmufarisayi, aantu yontumba otaye mu hokololele “Aagalilea mboka [omupangeli gwaRoma Pontius] Pilatus a loyakanitha ombinzi yawo mumwe nomayambo gawo.” Aagalilea mbaka otashi vulika oyo mboka ya li ya dhipagwa sho Aajuda omayuvi ya patanekele Pilatus sho a longitha iimaliwa yomoshiketha sheliko lyotempeli okutungitha omukanka gwokweeta omeya muJerusalem. Mboka taye shi hokololele Jesus, otashi vulika taya ti kutya Aagalilea otaya mono uupyakadhi molwiilonga yawo iiwinayi.

Ihe Jesus ote ya pukulula note ya pula ta ti: “Mu shi Aagalilea mbeyaka ya hepekwa ngeyi ya li aalunde ye vule Aagalilea ooyakwawo? Aawe,” Jesus ta yamukula. Opo nduno ota longitha oshiningwanima shoka opo a londodhe Aajuda ta ti: “Ngele itamu itedhulula, osho tuu tamu ka kana amuhe.”

Jesus ota tsikile ta tumbula sha shinikitha oluhodhi sha ningwa puyo, shoka tashi vulika shi na ko nasha netungo lyomukanka gwomeya. Ota pula ta ti: “Nenge mu shi omulongo [nayahetatu] mbeyaka ya si, sho ya gwilwa koshungongulu yomuSiloa, ya li aalunde ye vule Aajerusalem ooyakwawo ayehe?” Aawe, Jesus ota ti kutya aantu mbaka inaya sa molwuuwinayi wawo. Mepingathano naashono, “ethimbo neadhiko” olundji oyo hayi eta omaupyakadhi ga tya ngaaka. Ihe Jesus ota longitha ishewe ompito ndjika oku ya londodha ta ti: “Ihe nane wo ngele itamu itedhulula, osho tuu tamu ka kana amuhe.”

Opo nduno Jesus ota hokolola eudhi lye eleka nota yelitha ta ti: “Okwa li ku na omuntu e na omukwiyu gwa tsikwa meyana lye lyomiviinu, ye nokwe ya okukonga mo iiyimati, ye ine yi mona. Okwa lombwele ihe omuneyana: Tala, omimvo ndatu ndi ile okukonga oonkwiyu momukwiyu ngu, ngame inaandi mona mo sha, gu ka po, oshike tagu kutha owala evi oonkondo? Ihe ngwiyaka okwe mu yamukula a ti: Omuwa, gu etha manga, tandi gu [tula] uuhoho, pamwe tagu imi tuu omumvo tagu ya, ihe ngele itagu imi, nena gu ka po.”

Jesus okwa kambadhala uule woomvula dhi vulithe pundatu okutunga eitaalo mokati koshigwana shaJuda. Ihe aalongwa owala omathele gontumba ya li taya vulu okuyalulwa ye li iiyimati yiilonga ye. Ngashingeyi, pethimbo lyomumvo nguno omutine gwuukalele we, ota koleke oonkambadhala dhe, nota helele e ta tula uuhoho pathaneko pomukwiyu gwOshijuda mokuuvitha nokulonga nuulaadhi muJudea nomuPerea. Ihe inashi kwatha sha! Oshigwana otashi tindi okwiitedhulula nomolwashono tashi ka hanagulwa po. Oshihupe owala shoshigwana tashi inyenge nawa.

Nziyanziya konima yaashika Jesus ota longo mEsabati mosinagoga. Ota mono mo omukiintu ngoka molwokuhepekwa kompwidhuli, he ende a andalala uule woomvula 18. Jesus ote mu uvithile nolukeno ta ti: “Omukiintu, wa aluka kuuvu woye.” Ote mu tenteke iikaha ye, nopo tuu mpoka okwi iyukitha nokwa tameke okuhambelela Kalunga.

Ihe mwene gwosinagoga okwa geye. Ota nyenyeta ta ti: “Oku na omasiku gahamano giilonga, ileni ano omasiku ngoka, mu ipangithe, nohamEsabati.” Ano mwene gwasho ota zimine oonkondo dhaJesus dhokwaaludha, ihe ota pangula aantu molwashoka taye ya okwaaludhwa mEsabati!

Jesus ota yamukula ta ti: “Aafudhime ne, nane wo ihamu pititha mo ongombe nenge okasino keni moshigunda mEsabati, ne mu ke ka hugile? Nomuna ngu gwaAbraham, Satana e mu kwatelela moomango, tala, omimvo omulongo nahetatu nokuli, kaa mangululwe nani moomango mEsabati?”

Ano sho mboka taya pataneke Jesus taye shi uvu, otaya si ohoni. Ihe engathithi lyaantu olya nyanyukilwa iinima ayihe iiwanawa mbyoka ye wete Jesus ta longo. Jesus oti inyengithwa okweendulula omaudhi gomahunganeko gaali ge na ko nasha nUukwaniilwa waKalunga ngoka a hokololele pwa pita omvula yimwe lwaampono mowato pEfuta lyaGalilea. Lukas 13:1-21; Omuuvithi 9:11; Mateus 13:31-33.

▪ Omaupyakadhi geni taga tumbulwa mpaka, na Jesus ote ga longitha okulonga aantu oshiilongomwa shini?

▪ Eudhi li na ko nasha nomukwiyu ihaagu imi otali vulu okulongithwa ngiini, nosho wo oonkambadhala oku gu ninga hagu imi?

▪ Mwene gwosinagoga ota zimine ngiini oonkondo dhaJesus dhokwaaludha, ihe ongiini Jesus ta holola wo uufudhime womulumentu nguka?