Ontopolwa 64

Oshiilongomwa shi na ko nasha nokudhiminathana po

OSHA yela kutya Jesus oku li natango pamwe naalongwa ye megumbo muKapernaum. Okwa kundathana nayo nkene omaupyakadhi pokati kaamwayinathana ge na okukandulwa po, nomolwashoka Petrus ta pula ta ti: “Omuwa, olungapi ndi na [okudhimina po mukwetu a yono, OB-1986] kungame?” Molwashoka aalongi yelongelokalunga lyOshijuda otaya dhiladhila kutya omuntu oku na okudhimina po lutatu, otashi vulika Petrus ta dhiladhila kutya oshi li nawa unene okutya kutya “oluheyali lwa gwana?”

Ihe edhiladhilo alihe lyokukala to ndhindhilike oshinima sha tya ngeyi olya puka. Jesus ota pukulula Petrus ta ti: “Ongame otandi ku lombwele: haluheyali, aawe, omilongo heyali luheyali.” Otu ulike kutya kapu na okutulwa ongamba kutya iikando ingapi mbyoka Petrus e na okudhimina po omumwayina.

Opo a thindile maalongwa ye oshinakugwanitha shawo shokukala haya dhimine po, Jesus ote ya hokololele eudhi. Otali popi omukwaniilwa ngoka a hala okufutitha aapiya ye oongunga dhawo. Omupiya gumwe ngoka e mu lile oongunga odhindjidhindji dhiitalenti 10 000 (oondenari 60 000 000), ote etwa kuye. Ita vulu nando oku dhi futa. Onkee ano Jesus ota yelitha kutya omukwaniilwa ota gandja elombwelo kutya ye nomukiintu gwe naanona ye oye na okulandithwa po opo oongunga dhi vule okufutwa.

Pethimbo opo tuu mpoka omupiya ota gwile koompadhi dhomuwa gwe note mu galikana ta ti: “Tala ndje onteni, otandi ku futile adhihe.”

Omuwa otu uvile omupiya gwe ohenda note mu kuthile po oongunga dhe odhindjidhindji. Ihe halule sho e shi ningi, Jesus ta tsikile ko, omupiya ota yi nduno komupiya omukwawo ngoka e mu lile owala oongunga dhoondenari 100. Omulumentu ota kwata omupiya omukwawo momuligu, nota tameke te mu pondo e ta ti: “Futa oongunga dhandje.”

Ihe omupiya omukwawo ke na iimaliwa mbyoka. Onkee ano ta tsu oongolo koompadhi dhomupiya ngoka ye a lila oongunga note mu galikana ta ti: “Tala ndje onteni, otandi ku futile.” Omupiya ke na ohenda ngaashi omuwa gwe nota tulitha omupiya omukwawo mondholongo.

Jesus ota tsikile, aapiya yalwe mboka ya mono shoka sha ningwa po, otaya yi e taya lombwele omuwa kombinga yaashoka. Ota geye noonkondo noti ithanitha omupiya. “Omumati ngoye omudhudhu,” ye ta ti, “oongunga dhoye adhihe onde dhi ku kuthile po, sho wa galikana ndje; Nangoye wo ando wa li u na okusila omumati omukweni ohenda, ngaashi ngame nde ku sila ohenda?” E niwe kondjahi, omuwa ota gandja omupiya omukeenohenda kaalangeli yondholongo sigo ta futu oongunga dhe adhihe.

Opo nduno Jesus ota hulitha ta ti: “[NaTate] yomegulu osho te mú ningile wo, okoomwenyo dheni ngele itamu kuthile po okehe tuu ngoka omumwayina gwe.”

Oshiilongomwa mokudhiminathana po kashi shi tuu oshiwanawa! Mokuyelekanitha oongunga dhoondjo odhindji ndhoka Kalunga he tu dhimine po, eyono kehe ndyoka omumwatate gwetu Omukriste ha yono kutse olyo eshona lyowala. Niishewe, Jehova Kalunga ohe tu dhimine po iikando omayuvi. Olundji ihatu kala nokuli twa tseya omayono getu ngoka twa yona kuye. Onkee ano, mbela tse otse nduno itaatu vulu okudhimina po omumwatate iikando yontumba nonando otu kale tu na etompelo ewanawa oku mu tamaneka? Dhimbulukwa kutya ngaashi Jesus a longa mEuvitho lyokOndundu, Kalunga ohe tu ‘dhimine po oondjo dhetu, ngashika natse wo tatu dhimi po dhaamboka ya yono kutse.’ Mateus 18:21-35; 6:12; Aakolossa 3:13.

▪ Oshike tashi pulitha Petrus epulo kombinga yokudhimina po omumwahe, nomolwashike tashi vulika ta dhiladhila kutya eetopo lye lyokudhimina po gumwe luheyali oli li nawa?

▪ Einyengo lyomukwaniilwa keindilo lyomupiya gwe e mu sile ohenda olya yooloka ko ngiini keinyengo lyomupiya keindilo lyomupiya omukwawo?

▪ Otatu ilongo mo shike meudhi lyaJesus?