Ontopolwa 40

Oshiilongomwa shokukala omunamutimahenda

JESUS otashi vulika e li natango muNain, moka opo a adhika a yumudha omwanamati gwomuselekadhi, nenge tashi vulika ta talele po oshilando shopopepi mpoka. Omufarisayi gwedhina Simon okwa hala okutseyathana naangoka ha longo iilonga iindhindhilikwedhi ya tya ngaaka. Onkee ano ota hiya Jesus a ka lye kuye.

Okutala kompito ndjika yi li ompito yokuyakula mboka ye li po, Jesus ota zimine ehiyo, naanaa nokuli ngaashi a ziminine omahiyo oku ka lya pamwe naateloni nonaalunde. Ihe sho Jesus ta yi megumbo lyaSimon, ita yakulwa neyakulo tali zi komutima ndyoka hali yakulwa nalyo aayenda pandjigilile.

Oompadhi dhi li moongaku dhoosandala ohadhi pupyala nohadhi kaka molwokweenda moondjila dha nika ontsi noshi li omukalondjigilile gwokuyakula aayenda okuyoga oompadhi dhawo nomeya omatalala. Ihe oompadhi dhaJesus inadhi yogwa sho a thiki moka. Noita hambelelwa nando nethipo lyokomilungu, shoka shi li omukalondjigilile gwaapuhe. Nomafufu ge inaga gwayekwa omugwayo ngoka hagu longithwa okuyakula aayenda.

Pethimbo lyokulya, manga aayenda taya li poshitaafula, omukiintu inaa hiywa ote ya mo mondunda a tya thilu. Okwa tseyika moshilando kutya okwa kala monyata yiipala. Otashi vulika u uva omalongo gaJesus, mwa kwatelwa okwiithana kwe ‘ayehe mboka ya lolokithwa ye ye kuye e ya pe evululuko.’ Nomolwokwiinyengithwa sha ya muule kwaashoka a mono noku uvu, ye okwe ya ngashingeyi kuJesus.

Omukiintu ota yi konima yaJesus poshitaafula shokulila e ta tsu oongolo poompadhi dhe. Sho omahodhi ge taga gwile koompadhi dhe, ote ga theta po nomafufu ge. Ota kutha wo omugwayo gwa nika nawa mohanga ye e ta thipi oompadhi dhe nolukeno, note dhi gwayeke omugwayo ngoka. Simon ota tala kee na ohokwe. “Nguka andola omuprofeti,” ye ta tompathana, “ando a dhimbulula, omukiintu nguka omushike nokwa tya ngiini nokutya, oye omulunde.”

Jesus mokutseya shoka ta dhiladhila, ota ti: “Simon, ondi na uuhapu oku ku lombwela.”

“Omuhongi, popya,” osho ta yamukula.

Jesus ota tameke ta ti: “Okwa li ku na omulandakanithi gwiimaliwa e na aantu yaali ye mu lile oongunga, gumwe kwe mu lile oongunga dhomadenari omathele gatano nomukwawo omilongo ntano. Sho ya nyengwa okufuta, okwe dhi ya dhimine po ayehe mboka yaali, olye ano mwaambaka yaali ta kala noku mu hola e vule omukwawo?”

Simon, ngoka tashi vulika kee na onkwa nepulo ndyoka lya fa itaali opalele, ota ti: “Ndi shi, oye ngoka a dhiminwa po odhindji.”

“Wa pangula nawa,” Jesus ta ti. Nopo nduno ota pungulukile komukiintu, e ta ti kuSimon: “Omukiintu nguka u mu wete ano? Ngame nde ya megumbo lyoye, ngoye inoo pa ndje omeya gokwiiyoga [koompadhi], oonguka a shashamina oompadhi dhandje nomahodhi nokwe dhi thetitha omafufu ge. Ngoye inoo thipa ndje komilungu, ihe nguka hela tuu e ya mo, ina etha okuthipa oompadhi dhandje. Ngoye inoo gwayeka omutse gwandje [omugwayo, NW], ihe nguka okwa gwayeka oompadhi dhandje omugwayo.”

Ano omukiintu oku ulike eiyelombedhi tali zi komutima molwashoka a kala nale monyata yiipala. Onkee ano Jesus ota hulitha ta ti: “Ano tandi ku lombwele: nguka okwa dhiminwa po oondjo odhindji, onkee oku na ohole oyindji, ihe oongoka ta dhiminwa po oonshona, oye e na ohole ofupi.”

Jesus iha popile onyata yiipala nenge e yi humithe komeho. Mepingathano naashoka, oshiningwanima shika otashi holola okuuva ko kwe aantu kwolukeno mboka taya ningi omapuko monkalamwenyo ihe opo nduno otayu ulike kutya oye shi uvitile nayi e taye ya kuKristus e ya talaleke. Mokupa omukiintu evululuko lyashili, Jesus ota ti: “Oondjo dhoye odha dhimwa po. . . . Eitaalo lyoye lye ku hupitha, inda nombili.” Lukas 7:36-50; Mateus 11:28-30.

▪ Jesus ota taambiwa ko ngiini komuhiyi gwe, Simon?

▪ Olye te ya kuJesus, nomolwashike?

▪ Eudhi lini Jesus ta hokolola, nongiini te li longitha?