Ontopolwa 56

Oshike hashi nyateke omuntu?

EPATANEKO okupataneka Jesus otali nkondopala. Hayendji owala yomaalongwa ye taye mu thigi po ihe Aajuda yomuJudea oya hala oku mu dhipaga, nokuli ngaashi ye shi ningile sho a li muJerusalem pethimbo lyOpaasa yomo 31 E.N.

Ngashingeyi oyo Opaasa yomo 32 E.N. Otashi vulika metsokumwe noshitegelelwa shaKalunga opo a kale po, Jesus ta yi kOpaasa muJerusalem. Ihe ote shi ningi nekotoko molwashoka omwenyo gwe ogu li moshiponga. Konima yaashono ota galukile kuGalilea.

Otashi vulika Jesus e li muKapernaum sho Aafarisayi naanongoraamata yokuJerusalem taye ya kuye. Otaya kongo omatompelo goku mu lundila kutya okwa teya oompango dhelongelokalunga. “Aalongwa yoye oshike haa yono [omithigululwakalo, OB-1986] dhaakulu yonale?” osho taya pula. “Oshoka oyo ihaa yogo iikaha yawo, nge taa ka lya.” Shika hasho oshinima shoka Kalunga ta pula, ihe Aafarisayi otaya dhiladhila kutya osho eyono lya kwata miiti ngele omithigululwakalo ndhika, ndhoka dha kwatela mo okwiiyoga sigo opoongolo dhomaako, itadhi gwanithwa.

Pehala lyoku ya yamukula shi na ko nasha nelundilo lyawo, Jesus otu ulike kuukolokoshi wawo wokuteya Ompango yaKalunga owina. “Nane wo oshike ano [hamu] yono iipango yaKalunga [omolwomithigululwakalo, OB-1986] dheni?” osho a hala okutseya. “Oshoka Kalunga okwa ti: Simaneka ho nanyoko, na: Ngoka ta tuku he nenge yina, oye e na okusa shili. Ihe ne ohamu ti: Oongoka ta ti kuhe nenge yina: Iipalutha nda li ndi na oku ku paluthitha ando, oyo nda gandja omagano, oye ke na okusimaneka he nenge yina.”

Dhoshili, Aafarisayi otaya longo kutya oshimaliwa, iiniwe nenge shaa shoka tashi yapulilwa Kalunga shi li omagano, oshi na okukala shotempeli noitashi vulu okulongithwa melalakano lilwe. Ihe muushili wo wene, omagano ngoka ga yapulilwa Kalunga otaga kala pomuntu ngoka e ge mu yapulila. Mokuninga ngawo, omwanamati ota vulu a henuke oshinakugwanithwa she shokukwathela aavali ye ya kulupa, mboka tashi vulika ye li moluhepo olunene, mokutya owala kutya iimaliwa ye nenge iiniwe ye oyo “korban”—omagano ga yapulilwa Kalunga nenge otempeli.

Jesus okwa geyela shi li mondjila omukalo omwiinayi gwAafarisayi okupilika Ompango yaKalunga nota ti: “Mwa kukitha oohapu dhaKalunga [omolwomithigululwakalo, OB-1986] dheni . . . . Aafudhime ne, Jesaja okwe mú hunganeke dha tsa, sho a ti: Aantu mbaka ohaa simaneke ndje nomilungu, ihe oomwenyo dhawo odhi li kokule nangame; ihe otaa longele ndje owala nokulonga aantu omalongo giipango yaantu.”

Engathithi lyaantu otashi vulika lya hedha ko opo Aafarisayi ya vule okupula Jesus omapulo. Ngashingeyi sho Aafarisayi kaaye na we eyamukulo konima sho e ya nyenyetela nayi, Jesus oti ithana engathithi lyaantu li hedhe popepi. “Uvii ndje,” ye ta ti, “ne mu ndhindhilike: kaku na shoka shopondje tashi yi momuntu, tashi mu nyateke, aawe, [ooshono] tashi zi momuntu, osho tashi mu nyateke.”

Konima sho taya yi megumbo, aalongwa ye otaya pula taya ti: “U shi shi tuu, aafarisayi sho yu uvu oohapu ndhoka, oya ningi omwenyo omwiinayi?”

“Okehe tuu ontsika inaayi tsikwa kuTate, otayi vudhwa mo nomidhi dhayo,” Jesus ta yamukula. “Ya etheni; oyo aakwatiketi aaposi yaaposi; ngele ku na omuposi ta kwata keti lyomuposi omukwawo, ayehe yaali otaa gwile moshilambo.”

Jesus ota monika a fa a kumwa sho Petrus ta pula peha lyaalongwa, ya yelithilwe kombinga yaashoka hashi nyateke omuntu. “Nane wo onatango kamu na oondunge?” Jesus ta pula. “[Inamu] ndhindhilika, shaa shoka hashi yi mokana, otashi yi mela notashi piti mo? Ihe shaa shoka tashi zi mokana otashi zi komwenyo notashi nyateke omuntu. Pashiholelwa, momwenyo omo hamu zi omadhiladhilo omawinayi, omadhipago, omahengathano, oluhondelo, uufuthi, omalundilathano, omasheko gokusheka Kalunga. Oyo mbika tayi nyateke omuntu; ihe okulitha iikaha inayi yogwa ihaku nyateke omuntu.”

Jesus ita pataneke uuyogoki mbuka u li nawa. Ita patana kutya omuntu ina pumbwa okuyoga iikaha ye manga inaa tameka okulongekidha iikulya nenge okulya. Mepingathano naashoka, Jesus ota nyana uufudhime waawiliki yelongelokalunga aaniihelele mboka taya kambadhala pamukalo gwiineya okuhenuka oompango dhaKalunga dhuuyuuki mokukakatela omithigululwakalo ndhoka omanyolo taga ti odha puka. Eeno, iilonga iiwinayi oyo hayi nyateke omuntu, Jesus notu ulike kutya yo ohayi tameke momutima gwomuntu. Johannes 7:1; Deuteronomium 16:16; Mateus 15:1-20; Markus 7:1-23; Eksodus 20:12; 21:17; Jesaja 29:13.

▪ Jesus okwa taalelwa ngashingeyi kepataneko lini?

▪ Aafarisayi otaya lundile Jesus ngiini, ihe paye, Aafarisayi Ompango yaKalunga ohaye yi teya ngiini owina?

▪ Jesus otu ulike kutya iinima yini mbyoka hayi nyateke omuntu?