Ontopolwa 20

Oshikumithalonga oshitiyali manga ye li muKaana

SHO Jesus ta galukile koshitopolwa shaandjawo konima yoshikonga shokuuvitha kwa tamununwa mo muJudea, ita vululukwa po. Pehala lyaashono, ota tameke nokuli nuukalele uunenenene muGalilea, moshilongo moka a kokela. Ihe aalongwa ye, pehala lyokukala puye, otaya shuna kegumbo komaukwanegumbo gawo nokomaithano gawo gonale.

Etumwalaka lini mbela Jesus ta tameke okuuvitha? Olyo ndi: “[Uukwaniilwa waKalunga owe, KB] ya popepi; itedhululeni, ne mu itaale evaangeli.” Neinyengo olya li ngiini? Aagalilea otaya taamba ko Jesus. Ayehe otaye mu simaneke. Ihe shika kasha li unene tuu molwetumwalaka lye, ihe shila omolwashoka oyendji yomuyo oomwedhi dha piti oya li kOpaasa muJerusalem noya monene omandhindhiliko omandhindhilikwedhi ngoka a ningi.

Osha yela kutya Jesus ota tameke nuukalele we uunene muKaana shomuGalilea. Oto dhimbulukwa ngiika kutya nale, sho a galuka kuJudea, okwa shitukithile omeya omaviinu poshituthihango moka. Pompito ndjika ontiyali, okanona komukwanepangelo elenga lyOmukwaniilwa Herodes Antipas otake ehama unene. Sho elenga tali uvu kutya Jesus ota zi kuJudea u uka kuKaana, otali yi okuza kegumbo lyalyo muKapernaum li ka mone Jesus. Omulumentu ote mu indile a nika oluhodhi olunene ta ti: ‘Ila alikana mbala, manga omumwandje inaa sa.’

Jesus ota yamukula: ‘Shuna kegumbo. Omumwoye okwa aluka!’ Elenga lyaHerodes otali mu itaale e tali tameke olweendo olule okushuna kegumbo. Mondjila otali tsakanekwa kaapiya yalyo, mboka taye endelele oku li lombwela kutya ayihe oyi li nawa—omwana okwa aluka! ‘Okwa kala nawa uunake?’ tali pula.

‘Ohela, po 1:00 yomutenya,’ taya yamukula.

Elenga otali mono kutya ndjika oyo naanaa otundi ndjoka Jesus e mu lombwele a ti: ‘Omumwoye okwa aluka!’ Konima yaashono, omulumentu nuukwanegumbo we auhe oya ningi aalongwa yaKristus.

Onkee ano Kaana ota ningi ehala lihokitha moka Jesus a longele iikumithalonga lwaali, okutseyitha kutya okwa galuka kuJudea. Dhoshili, mbika hayo awike iikumithalonga mbyoka a li a longo sigo opethimbo mpano, ihe otayi ti sha molwashoka oyu ulike egalukilo lye kuGalilea.

Ngashingeyi Jesus ota shuna kegumbo kuNasaret. Oshike mbela she mu tegelela hoka? Johannes 4:43-54; Markus 1:14, 15; Lukas 4:14, 15.

▪ Sho Jesus ta galukile kuGalilea, oshike tashi ningilwa aalongwa ye, nongiini aantu taye mu taamba ko?

▪ Oshikumithalonga shini Jesus ta longo, nongiini tashi nwetha mo mboka ye na mo ombinga?

▪ Kaana osha silwa ngiini ohenda kuJesus?