Ontopolwa 15

Oshikumithalonga shaJesus shotango

OSHA li konima yesiku limwe owala nenge gaali okuza sho Andreas, Petrus, Johannes, Filippus, Natanael, notashi vulika naJakob ya ningi aalongwa yaJesus yotango. Ngashingeyi mbaka oye li mondjila okushuna komagumbo gawo moshitopolwa shaGalilea, hoka yo ayehe ya zile. Hoka taya yi okuKaana, ondoolopa yopaandjawo yaNatanael, ndjoka yi li kiikulundundu kaaku shi kokule naNasaret moka Jesus mwene a putukila. Oya li ya hiywa koshituthihango muKaana.

Yina yaJesus naye wo okwe ya kohango. Molwashoka Maria okuume kaakwanezimo yoonakuhokana, osha yela kutya ye okwa li ta kwathele mokuyakula aayenda mboka oyendji. Onkee ano ota mono nziya kutya opu na sha sha pwa po e te shi lombwele Jesus ta ti: “Kaye na omaviinu.”

Sho Maria a ningi eetopo lya tya ngaaka, ndyoka muushili wo wene lya hala okutya Jesus na ninge po sha shi na ko nasha nokupwa po kwomaviinu, tango Jesus ka li a hala. “Ondi na shike nangoye, omukiintu?” osho ta pula. E li Omukwaniilwa a langekwa po kuKalunga, ke na okulombwelwa komukwanezimo nenge kookuume shoka e na okuninga. Onkee ano Maria ota katuka pandunge noshinima ote shi ethele miikaha yomwana, e ta lombwele owala aakalele ta ti: “Shaa shoka te mú lombwele, shi ningeni.”

Opu na iiyuma ihamano yomamanya yokukwatela mo omeya, mbyoka kehe shimwe tashi vulu okuhumbata oolitela dhi vulithe po 40. Jesus ota lombwele aakalele ta ti: “Tekeleni iiyuma, yu udhe.” Naakalele otaye yi udha sigo tayi udha komulungu. Opo nduno Jesus ota ti: “Pimpii mo, ne mu faalele [omukuluntu, OB-1986] gwaayenda.”

Omukuluntu gwaayenda okwa kumithwa kuuwanawa womaviinu, noka li a tseya kutya oga ningwa pashikumithalonga. Oti ithana ombushiki e ta ti: “Omuntu kehe ota gandja tango omaviinu omawanawa, ihe nge ya kolwa, nena oongeyaka goshipako. Ongoye wa holeke omaviinu omawanawa sigo ongashingeyi.”

Shika osho oshikumithalonga shotango shaJesus, naashono aalongwa ye aape ye shi mono, eitaalo lyawo olya kolekwa. Konima yaashino, otaya yi pamwe nayina naamwayinamati koshilando Kapernaum popepi nEfuta lyaGalilea. Johannes 2:1-12.

▪ Uunake ohango ya dhanwa muKaana pethimbo lyuukalele waJesus?

▪ Omolwashike Jesus a tindi eetopo lyayina?

▪ Oshikumithalonga shini Jesus a longo, nosha nwetha mo yalwe ngiini?