Ontopolwa 54

“Oshikwiila shoshili tashi zi megulu”

DHOSHILI, mesiku lya tetekele omwa li mwa ningwa oshindji. Jesus okwa palutha omayuvi gaantu pashikumithalonga nokonima ota yi ontuku sho aantu ya hala oku mu thiminika a ninge omukwaniilwa. Uusiku owo tuu mboka okwe ende kombanda yEfuta lyaGalilea lya nika oshikungulu; a hupitha Petrus, ngoka a tameke okuningina manga a li te ende kombanda yomeya goshikungulu; nokwa mweneke omakuthi opo osikepa moka mwa li aalongwa ye yaa teke.

Aantu yokuuzilolundume wEfuta lyaGalilea mboka ya paluthwa kuJesus pashikumithalonga otaye mu adha popepi naKapernaum notaye mu pula: “[Uunake] we ya po mpaka?” Jesus ote ya nyenyetele nota ti kutya otaye mu kongo owala molwashoka ya tegelela e ya pe natango iikulya oshali. Ote ya ladhipike ya longe, hakwiilongela iikulya mbyoka hayi hulu po, ihe iikulya mbyoka hayi kalelele sigo omomwenyo gwaaluhe. Ano aantu otaya pula taya ti: “Natu ninge shike, tu longe iilonga yaKalunga?”

Jesus ota tumbula owala oshilonga shimwe ashike shoka shi na ongushu onenenene. Ota yelitha ta ti: “Oshilonga shaKalunga osho shika, mu itaale nguka a tumwa kuye.”

Ihe aantu itayi itaale Jesus, nonando okwa longa iikumithalonga ayihe mbyoka. Itashi vulu okwiitaalwa nokuli sho konina yiinima ayihe mbino iikumithi mbyoka ye a ningi, taya pula taya ti: “Endhindhiliko olini po [to] li ningi ano, tu li mone, tse tu ku itaale? Oto longo shike? Ootate oya lile mombuga omanna, ngaashi kwa shangwa: Oshikwiila shomegulu okwe ya pe okulya.”

Meyamukulo keindilo lyawo ya pewe endhindhiliko, Jesus ota yelitha Onzo yomasiloshimpwiyu gopashikumithalonga, ta ti: “HaMoses e mú pa oshikwiila shomegulu, ihe Tate oye te mú pe oshikwiila shoshili tashi zi megulu. Oshoka oshikwiila shaKalunga [otashi] zi megulu notashi pe uuyuni omwenyo.”

“Omuwa,” aantu taya ti, “tu pa aluhe oshikwiila shoka.”

“Ongame oshikwiila shomwenyo,” Jesus ta yelitha. “Oongoka te ya kungame, oye ita si ondjala, naangoka i itaale ndje, ita si enota sigo aluhe. Ihe ongame nde mú lombwele, one mwa mono ndje, ne inaamu itaala. Ashihe shoka Tate te shi pe ndje, otashi ya kungame: naangoka te ya kungame, itandi mu ekelehi. Oshoka ongame nda za megulu hakugwanitha ehalo lyandje mwene, aawe, olyaanguka a tumu ndje. Nehalo olyaanguka a tumu ndje olyo ndika, ndaa kanithe po nando gumwe mwaamboka e ya pa ndje, ihe ndi ya yumudhe esiku lyahugunina. Oshoka ehalo lyaTate olyo ndika, shaa ngoka ta mono omwana note mu itaale, oye e na omwenyo gwaaluhe.”

Opo nduno Aajuda otaya tameke okungungutula Jesus, molwashoka a ti: “Ongame oshikwiila shoka sha zi megulu.” Oye mu tala ko owala e li omuna gwaantu notaya patana ano ngaashi aantu yomuNasaret ye shi ningile, taya ti: “Nguno ke shi nani Jesus, omuna gwaJosef? He nayina otu ya shi. Ongiini ano ngashingeyi, sho ta ti kutya okwa za megulu?”—OB-1986.

“Inamu ngungutulilathana,” Jesus ta yamukula. “Kaku na ngoka ta vulu okuya kungame, okuninga Tate, oonguka a tumu ndje, te mu hili; ongame notandi mu yumudha esiku lyahugunina. Mooprofeti omwa shangwa: Ayehe notaa kala ya longwa kuKalunga. Kehe tuu ngoka tu uvu Tate nokwa longwa kuye, oye te ya kungame. Hakutya ando, ku na ngoka a mono Tate, oye tuu awike a zi muKalunga; oye a mono Tate. Oshili, oshili tandi mú lombwele: Oongoka i itaala, oye e na omwenyo gwaaluhe.”

Jesus ota tsikile te shi endulula: “Ongame oshikwiila shomwenyo. Ooho oya lile mombuga omanna noya sa. Oshikwiila osho shika tashi kuluka megulu, omuntu e shi lye, ye kaa se. Ongame oshikwiila shoka shi na omwenyo, sha kuluka megulu. Ngele ku na ngoka ta li oshikwiila shika, oye ta kala e na omwenyo aluhe.” Eeno, mokukala neitaalo tali longo muJesus, ngoka a tumwa kuKalunga, aantu otaya vulu okumona omwenyo gwaaluhe. Kaku na omanna, nenge oshikwiila shasha shoka tashi vulu oku gu gandja!

Osha yela kutya oonkundathana kombinga yoshikwiila shoka sha zi megulu odha tameke konima yokathimbo sho aantu ya mono Jesus popepi naKapernaum. Ihe otadhi tsikile, notadhi adha oshitsa shopombanda konima sho Jesus ta longo mosinagoga muKapernaum. Johannes 6:25-51, 59; Epsalmi 78:24; Jesaja 54:13; Mateus 13:55-57.

▪ Iiningwanima yini po ya tetekele oonkundathana dhaJesus kombinga yoshikwiila shoka sha zi megulu?

▪ Okutala kwaashoka Jesus opo owala a ningi, omolwashike eindilo okupewa endhindhiliko inaali eleka nando?

▪ Omolwashike mbela Aajuda taya ngungutula kombinga yokupopya kwaJesus kutya oye oshikwiila shoshili shoka sha zi megulu?

▪ Oonkundathana kombinga yoshikwiila shoka sha zi megulu odha ningilwa peni?