Ontopolwa 126

‘Oshili nguka okwa li Omuna gwaKalunga’

JESUS koshiti ina adhika a ninga ko ethimbo ele sho omilema omikumithi dhuule woowili ndatu dha holoka. Inadhi etwa keluudhotango, molwashoka eluudhotango ohali ya po owala ngele omwedhi opo gwe ya ko nongele gwa toka pethimbo lyOpaasa. Nokuli omaluudho getango ohaga kala owala uule wominute dhontumba. Onkee ano omilema odha li dhe etwa po kuKalunga. Otashi vulika tadhi mweneke mboka taya nyenkele Jesus, notadhi hulitha po nokuli omasheko gawo.

Ngele oshiningwanima shoka oshitilithi osha li sha ningwa manga omuyoni gumwe inaa ganda mukwawo e ta pula Jesus e mu dhimbulukwe, otashi vulika osho she mu kwathele i itedhulule. Otashi vulika opethimbo lyomilema sho aakiintu yane, oyo yina yaJesus nomumwayina Salome, Maria Magdalena naMaria yina yomuyapostoli Jakob omushona, ya yi ya ka thikame popepi noshiti shomahepeko. Johannes, omuyapostoli omuholike gwaJesus, oku li pamwe nayo mpoka.

Omutima gwayina yaJesus itagu ‘ululwa’ tuu sho ta tala omwana ngoka a yamutha nokwa putudha e endjelela mpoka muuwehame! Ihe Jesus ita dhiladhila uuwehame we mwene, ihe okombinga yonkalonawa yayina. Ota kambadhala noonkondo adhihe okukomonena kuJohannes nota ti kuyina: “Omukiintu, tala, omumwoye!” Opo nduno ota komonene kuMaria nota ti kuJohannes: “Tala, nyoko!”

Jesus esiloshimpwiyu lyayina, ngoka sha yela kutya oku li ngashingeyi omuselekadhi, ote li inekelele omuyapostoli ngoka e mu hole unene noonkondo. Shika ote shi ningi molwashoka oyanamati yalwe yaMaria inaaye shi ulika natango kutya oye mu itaala. Onkee ano ota tula po oshiholelwa oshiwanawa mokusila oompumbwe dhayina oshimpwiyu, haandhoka owala dhopanyama ihe naandhoka wo dhopambepo.

Lwopondatu yomutenya, Jesus ota ti: “Nda si enota.” Jesus oku uvite kutya He, okwa fa a kutha po egameno lye puye opo uudhiginini we u vule okumakelwa sigo oponkatu yahugunina. Onkee ano oti igidha newi lyopombanda ta ti: “Kalunga kandje, Kalunga kandje, oshike we ekelehi ndje?” Sho yamwe yomwaamboka ya thikama popepi mpoka taye shi uvu, otaya ti: “Tala, oti ithana [Elia].” Nziyanziya gumwe gwomwaamboka ota matuka nota kutha okawoya e te ka yaya momaetika omalulu note ka tula kohulo yoshihenguti e te ge mu nwetha. Ihe yalwe otaya ti: “Mweneni, tu taleni, [Elia] ngele te ya, e mu kuthe ko.”

Sho Jesus a nu omaviinu omalulu oti igidha ta ti: “Sha longwa sha pwa”! Eeno, ye okwa tsakanitha ayihe mbyoka He e mu tumine kombanda yevi a longe. Lwahugunina ota ti: “Tate, omwenyo gwandje otandi gu gandja miikaha yoye.” Jesus ota gandja oonkondo dhomwenyo gwe kuKalunga neinekelo kutya Kalunga ote ke gu mu galulila ishewe. Opo nduno oti isizimike e ta si.

Pethimbo ndyono Jesus ta fudha mo omufudho gwe gwahugunina, opwa holoka ekakamo lyevi edhigu ndyoka lya tandula omamanya. Ekakamo lyevi olya li enene noonkondo opo nduno oombila pondje yaJerusalem odha siikuluka nomidhimba odhu umbwa mo. Mboka taye ende po otaya mono omidhimba dha kunguwala kombanda, otaya yi koshilando e taye shi hokololele yamwe.

Natango pethimbo mpono Jesus ta si, etopolithonguwo enene ndyoka lya topola Uuyapuki kUuyapukielela motempeli yaKalunga olya tuuka wo pokati, okuza pombanda sigo opevi. Etopolithonguwo ndika lyokumonikitha nawa ewanawa osha yela kutya oli na oometa 18 okuya pombanda nedhigu noonkondo. Oshikumithalonga shika tashi kumitha itashi ulike owala ondjahi yaKalunga okugeela mboka ya dhipaga Omwana ihe otashi ulike wo kutya ngashingeyi oshi li tashi wapa okuya mUuyapukielela, egulu lyo lyene okupitila meso lyaJesus.

Aantu sho yu uvu ekakamo lyevi noya mono iinima mbika tayi ningwa, oya tila noonkondo. Omukuluntu gwaakwiita ngoka e li omutonateli pethimbo lyegwanitho lyetokolo lyeso ota simaneke Kalunga. “Oshili nguka [okwa] li Omuna gwaKalunga,” osho ta ti. Otashi vulika opo a li sho okupopya kwaJesus kutya ye Omwana gwaKalunga pethimbo lyiihokolola ye koshipala shaPilatus taku kundathanwa. Nongashingeyi okwi itaala kutya Jesus Omwana gwaKalunga, eeno, kutya ye omuntu omunenenene shili ngoka a li ko nale.

Yalwe oya tilithwa wo kiiningwanima mbino iikumithi notaya tameke okushuna komagumbo tayi idhenge poontulo shoka tashi ulike kutya oya nika oluhodhi olunene noya sa ohoni. Aakiintu oyendji ye li aalongwa yaJesus mboka ya gumwa noonkondo kiiningwanima mbika opo ya ningwa otaye yi tala ye li kokule. Omuyapostoli Johannes naye wo opo e li. Mateus 27:45-56; Markus 15:33-41; Lukas 23:44-49; 2:34, 35; Johannes 19:25-30.

▪ Omolwashike okuluudha kwetango itaaku vulu okukala oko kwe etitha omilema dhuule woowili ndatu?

▪ Okathimbo okafupi manga inaa sa, oshiholelwa oshiwanawa shini Jesus ta tulile po mboka ye na aakuluntu ya kulupa?

▪ Omapopyo gane gahugunina geni Jesus ta popi manga inaa sa?

▪ Ekakamo lyevi otali etitha shike, notashi ti shike sho etopolithonguwo lyotempeli lya tuuka pokati?

▪ Omukuluntu gwaakwiita ngoka e li omutonateli pethimbo lyegwanitho lyetokolo lyeso okwa gumwa ngiini kiikumithalonga mbika?