Ontopolwa 84

Oshinakugwanithwa shokukala omulongwa

KONIMA sho Jesus a zi megumbo lyOmufarisayi omukuluntu, ngoka sha yela kutya oku li oshilyo shOsanhedrin, ota tsikile nolweendo ta yi kuJerusalem. Omangathithi omanene gaantu otage mu landula. Ihe oshike mbela tashi gi inyengitha? Okukala omulanduli gwe gwashili osha kwatela mo naanaa mbela shike?

Manga taye ende, Jesus ota pungulukile komangathithi gaantu notashi vulika te ya kunkitha sho ta ti: “Ngele pe na ngoka te ya kungame, ye ina tonda he nayina nomukiintu gwe noyana naamwayina nomwenyo gwe mwene nokuli, oye ita wapa okukala omulongwa gwandje.”

Jesus okwa hala okutya shike mbela? Jesus ita ti mpaka kutya aalanduli ye oye na okutonda aakwanezimo yawo lelalela. Mepingathano naashoka yo oye na oku ya tonda mondunge kutya ya kale ye ya hole kashona shi vulithe ngaashi ye mu hole. Okwa tiwa kutya hekulu yaJesus, Jakob, okwa li e “tonde” (NW) Lea nokwa li e hole Rakel, shoka tashi ti kutya ye okwa li e hole Lea kashona shi vulithe omumwayina Rakel.

Dhiladhila wo kutya Jesus okwa ti kutya omulongwa oku na okutonda ‘omwenyo gwe mwene nokuli,’ nenge onkalamwenyo ye. Shoka Jesus a hala okutya osho natango kutya omulongwa gwashili oku na okukala e Mu hole unene shi vulithe ngaashi e hole omwenyo gwe mwene. Onkee ano Jesus ota tsu omuthindo kutya okuninga omulongwa gwe osho oshinakugwanithwa sha kwata miiti. Kashi shi sha shoka omuntu e na oku shi ninga manga inee shi dhiladhila nawa.

Okukala omulongwa gwaJesus osha kwatela mo okumona iihuna nomahepeko, ngaashi ye ta tsikile oku shi ulika ta ti: “Ngoka ita humbata [omuti gwomahepeko gwe, NW] nota landula ndje, oye ita wapa okukala omulongwa gwandje.” Onkee ano omulongwa gwashili oku na okukala nehalo lyokuhumbata omutenge gwokudhinwa gwa faathana naangoka Jesus i idhidhimikile, nonando osha kwatela mo okudhipagwa kaatondi yaKalunga, mpoka sha pumbiwa, ngaashi sha li shi li pokuningilwa Jesus.

Onkee ano okukala omulongwa gwaKristus osho oshinima shoka omangathithi gaantu mboka ye mu landula ye na oku shi konakona nuukeka. Shika Jesus ote shi tsu omuthindo mokupitila meudhi. Ota ti: “Oshoka, ngele ku na ngoka gwomune a hala okutunga oshungongulu, ita kuutumba manga, ando a yalule iitungitha, ngele e na iimaliwa oku yi tsakanitha, opo shaa ninge, nge a tungu omunkanka nota nyengwa oku yi tsakanitha, ayehe mboka ye mu tala, taa tameke oku mu yola notaa ti: Omuntu nguno okwa tameke okutunga nokwa nyengwa oku yi tsakanitha?”

Ano Jesus ota yelithile omangathithi gaantu ngoka ge mu landula kutya manga inaaya ninga aalongwa ye, oye na okutokolatoko kutya otaya vulu okugwanitha oshinakugwanithwa shawo, ngaashi naanaa omulumentu ngoka a hala okutunga oshungongulu ta shilipaleke kutya oku na iitungithi yoku yi tsakanitha manga inaa tameka. Jesus ota hokolola eudhi lilwe nota tsikile ta ti:

“Nenge ngele ku na omukwaniilwa ta yi kelondo, a ka kondjithe omukwaniilwa gulwe, ita kuutumba manga, a dhiladhile, ngele ta vulu nomayuvi ge omulongo gumwe okutsakaneka ngwiyaka te ya nomayuvi omilongo mbali? Nongele a nyengwa, ota tumu ko aatumwa, omukwawo manga ku li kokule note mu indile ombili.”

Opo nduno Jesus ota tsu omuthindo enenedhiladhilo lyomaudhi ge, ta ti: “Osho tuu kaku na nando gumwe gwomune ta vulu okukala omulongwa gwandje, ngele ite etha ayihe e yi na.” Shika osho omangathithi gaantu ngoka ge mu landula ge na okukala ge na ehalo okuninga, eeno, nosho wo kehe gumwe ngoka ti ilongo kombinga yaKristus e na okukala e na ehalo okuninga. Oye na okukala ya hala okuyamba ashihe shoka ye na—omaliko gawo agehe, sha kwatela mo nokuli omwenyo gwo gwene—ngele yo oya hala okukala aalongwa ye. Mbela ngoye owa hala oku shi ninga?

“Omongwa ogwo omutoye,” Jesus ta gwedha ko. MEuvitho lye lyokOndundu okwa ti kutya aalongwa ye oyo “omongwa gwevi,” shoka tashi ti kutya okunwetha mo kwawo aantu oko taku ya gamene, ngaashi naanaa omongwa gwo gwenegwene gu li oshipungulitho. “Ihe omongwa ngele tagu hahuka, otagu toyithwa nashike? Kagu opalele nomelundu nomuuhoho,” osho Jesus ta ti lwahugunina. “Otagu ekelwahi owala pondje. Oongoka e na omakutsi gokuuva, nu uve ko.”

Onkee ano Jesus otu ulike kutya nokuli mboka ya kala uule wokathimbo aalongwa ye, kaye na okusa uunye mokutokolatoko kwawo okutsikila. Ngele taye shi ningi, otaya ka kala kaaye na oshilonga shasha, aayolwa kuuyuni mbuka noinaayo opala koshipala shaKalunga, muushili wo wene, taya dhinitha Kalunga. Onkee ano otaye ke ekelwahi pondje ngaashi omongwa ngoka kaagu na omulyo, gwa yonuka, eeno, taya ka hanagulwa po. Lukas 14:25-35; Genesis 29:30-33; Mateus 5:13.

▪ ‘Okutonda’ aakwanezimo yoye nangoye mwene otashi ti shike?

▪ Omaudhi gaali geni Jesus ta gandja, notaga ti shike?

▪ Oshike shi li enenedhiladhilo lyoohapu dhaJesus dhahugunina kombinga yomongwa?