Ontopolwa 41

Oshitsa shopokati shoompata

KONIMA yokathimbo okafupi sho a taambwa megumbo lyaSimon, Jesus okwa tameke nolweendo lwe olutiyali lweuvitho muGalilea. Molweendo lwe lwa tetekele moshitopolwa shika, okwa yile pamwe naalongwa ye yotango Petrus, Andreas, Jakob naJohannes. Ihe ngashingeyi aayapostoli 12, nosho wo aakiintu yontumba, oyo taya yi pamwe naye. Mbaka oya kwatela mo Maria Magdalena, Susanna naJohanna, ngoka omusamane gwe elenga lyomukwaniilwa Herodes.

Sho uukalele waJesus tau tamunuka mo neendelelo, dho noompata dhi na ko nasha niilonga ye otadhi nenepala wo noonkondo. Omulumentu omunampwidhuli, ngoka omuposi noiha popi, ote etwa kuJesus. Sho Jesus te mu aludha, opo a manguluke kokuhepekwa kompwidhuli noku vule okupopya nokumona ko, omangathithi gaantu otage shi kuminwa unene. Otaga tameke taga ti: “Pamwe oye tuu nguka omuna gwaDavid?”

Omangathithi gaantu oyendji otaga ngundumana moongundu ga kundukidha egumbo moka Jesus e li nopo ihe ye naalongwa ye kaya li taya vulu nokuli okulya sha. Kakele kaamboka taya dhiladhila kutya ngiika oye “omuna gwaDavid” ngoka u uvanekwa, opu na wo aanongoraamata nAafarisayi mboka ye ende ondjila onde okuza kuJerusalem ye ye oku mu dhinitha kaantu. Sho aakwanezimo lyaJesus tayu uvu epiyagano ndyoka Jesus e li mulyo, otaye ya oku mu kutha po. Omolwashike?

Nokuli naamwayina yaJesus inayi itaala natango kutya oye Omwana gwaKalunga. Niishewe epiyagano lyomontaneho nekuthathanopo mbyoka Jesus e etitha po kayi shi nando uukwatya we mboka ya kala ye shi sho ta putukile muNasaret. Onkee ano, oyi itaala kutya opu na sha sha puka nayi naJesus pamadhiladhilo. “Ota yi [oonkwengu],” yo taya ti, noya hala oku mu kwata noku mu kutha po.

Ihe opu na uunzapo wa yela kutya Jesus okwa aludha omulumentu omunampwidhuli. Aanongoraamata nAafarisayi oye shi shi kutya itaya vulu okutinda uushili waashika. Onkee ano opo ya dhinithe Jesus otaya lombwele aantu taya ti: “Oompwidhuli ote dhi tidhitha [mo, NW] kuBelsebul awike, omukuluntu gwoompwidhuli.”

Molwashoka Jesus oku shi shoka aanongoraamata nAafarisayi taya dhiladhila, ote yi ithana kuye nota ti: “Okehe tuu [uukwaniilwa tau itsile ondumbo, otau, NW] teka po, nongaashi kaku na oshilando nenge egumbo tali itsile ondumbo, tali kala po. Ano ngele Satana ta tidha mo Satana onkwawo, nena oye i itsile ondumbo; [uukwaniilwa we otau, NW] kala po ngiini?”

Oohapu dhe kadhi shi tuu dhopandunge! Molwashoka Aafarisayi otaya ti kutya aantu yomuyo oya tidha mo nale oompwidhuli, Jesus ote ya pula wo ta ti: “Nangame nge tandi tidhitha mo oompwidhuli [kuBelsebul], aana yeni ano otaye dhi tidhitha mo kulye?” Noohapu dhimwe, shono taya lundilile Jesus oya gwana wo ye shi lundililwe. Opo nduno Jesus ote ya londodha: “Ihe ongame nge tandi tidhitha mo oompwidhuli kOmbepo yaKalunga, nena [uukwaniilwa waKalunga wa, NW] thiki kune.”

Oku shi ulika kutya okutidha mo oompwidhuli kwe oko euliko lyoonkondo dhe okupangela Satana, Jesus ota ti: “Nenge olye ta vulu okugwayela megumbo lyependa noku mu yuga iinima ye, okuninga ta manga tango ependa mwene? Opo ta yugu ihe egumbo lye. Oongoka kee li pamwe nangame, oye e na ondumbo nangame, naangoka [itaa] gongele pamwe nangame oye ta halakanitha po.” Osha yela kutya Aafarisayi oya tsila Jesus ondumbo, tayu ulike kutya yo aakalelipo yaSatana. Yo otaya halakanitha Aaisrael ya ze po puye.

Onkee ano Jesus ta londodha aapataneki mbaka yopasatana ta ti kutya “okusheka Ombepo Ondjapuki itaku dhiminwa po.” Ota yelitha ta ti: “Nongele ku na ngoka ta popi ohapu a tsa ondumbo nOmuna gwOmuntu, otayi mu dhiminwa po; ihe oongoka ta popi ohapu a tsa ondumbo nOmbepo Ondjapuki, oye ite yi dhiminwa po, nomuuyuni mbuka nomwaambwiyaka tau ya.” Aanongoraamata nAafarisayi mbaka oya longa uulunde waahe shi okudhiminwa po sho taya ti kutya oshikumithalonga shombepo ondjapuki yaKalunga shi igalala osha longwa kuSatana. Mateus 12:22-32; Markus 3:19-30; Lukas 8:1-3; Johannes 7:5.

▪ Olweendo lwaJesus olutiyali muGalilea olwa yooloka ko ngiini kwaandoka lwotango?

▪ Omolwashike aakwanezimo yaJesus taya kambadhala oku mu kwata po?

▪ Aafarisayi otaya kambadhala ngiini okudhina iikumithalonga yaJesus, nongiini Jesus te ya tompo?

▪ Aafarisayi mboka oye na ondjo yashike, nomolwashike?