Ontopolwa 130

PEfuta lyaGalilea

NGASHINGEYI aayapostoli otaya shuna kuGalilea ngaashi Jesus e ya lombwele nale ye shi ninge. Ihe kaye shi wo shono ye na okuninga hoka. Konima yokathimbo, Petrus ota lombwele Tomas, Natanael, Jakob nomumwayina Johannes nosho wo aayapostoli yalwe yaali ta ti: “Otandi ka yula oohi.”

“Natse wo otatu yi nangoye,” mbaka yahamano taya yamukula.

Uusiku auhe inaya kwata sha. Ihe sho owala taku yele, Jesus ota holoka pomunkulofuta, ihe aayapostoli inaye mu dhimbulula kutya oye Jesus. Ote yi igidha: “Aamwandje, omu na sha shokuliwa?”

“Aawe,” tayi igidha wo ye li momeya.

“Oshiyulitho shi umbileni lwokolulyo lwowato notamu mono,” osho ta ti. Naashono ye shi ningi, oya nyengwa okuhila mo oshiyulitho shawo molwuuwindji woohi.

“Oye Omuwa”! Johannes ti igidha.

Sho Petrus te shi uvu, ota zala ombaikitha ye oshoka okwa adhika oonguwo dhe e dhi hula mo nota nukile momeya. Opo nduno ota yogo oometa omilongo omugoyi lwaampono okuya komunkulo. Aayapostoli yalwe otaye mu landula nokawato okashona, notaya hili oshiyulitho shu udha oohi.

Sho taya thiki komunkulo, opu na oohi dhi li komakala gomulilo nopu na wo oshikwiila. “Eteni nkuka [oohi dhimwe, OB-1986] ndhoka mwe dhi mono ngashingeyi,” Jesus ta ti. Petrus ota londo mowato nota hilile oshiyulitho komunkulo. Omu na oohi 153 oonene!

“Ileni, tu lyeni” (OB-1986), Jesus te yi ithana.

Kapu na ngoka gwomuyo a li e na omukumo okupula: “Ongoye olye?” oshoka yo ayehe oye shi shi kutya oye Jesus. Shika osho oshikando she oshitiheyali ta holoka konima yokuyumuka kwe nosho wo oshikando oshititatu ta holokele aayapostoli ye li ongundu. Ngashingeyi ote ya longekidhile oshuumbululwa, nota pe kehe gumwe gwomuyo oshikwiila nohi.

Sho ya mana okulya, otashi vulika Jesus ta tala oohi odhindji ndhoka ya kwata, e ta pula Petrus ta ti: “Simon yaJohannes, u hole ndje u vule mbaka?” Sha yela kutya okwa hala okutya: Ou hole iilonga yokuyula oohi shi vulithe iilonga mbyoka nde ku longekidhila u yi longe?

“U shi ndje, ndi ku hole tuu,” Petrus ta yamukula.

“Litha oonzigona dhandje,” Jesus ta yamukula.

Ote mu pula natango oshikando oshitiyali: “Simon yaJohannes, ou hole ndje?”

“Eeno, Omuwa, u shi ndje, ndi ku hole tuu,” Petrus ta yamukula a mana mo.

“Litha oonzi dhandje,” Jesus te mu lombwele natango.

Opo nduno ote mu pula natango oshikando oshititatu ta ti: “Simon yaJohannes, u hole ndje tuu?”

Ngashingeyi Petrus okwa nika oluhodhi. Otashi vulika ti ipula kutya pamwe Jesus okwa limbililwa shi na ko nasha nuudhiginini we. Dhoshili, sho Jesus a li ta hokololithwa ethimbo opo lya piti nomwenyo gwe gwa li moshiponga, Petrus okwe mu idhimbikile iikando itatu ta ti kutya ke mu shi. Onkee ano Petrus ota ti: “Omuwa, ayihe u yi shi; u shi shi, ondi ku hole tuu.”

“Litha oonzi dhandje,” Jesus te mu lombwele oshikando oshititatu.

Ano Jesus ota longitha Petrus opo u ulukile yalwe nkene oshilonga shoka ye a hala ye shi longe sha simana. Ota ka za ko mbala kombanda yevi, nokwa hala ya kwatele komeho mokuyakula mboka taye ke etwa moshigunda shoonzi shaKalunga.

Ngashingeyi Jesus otu ulike kutya ngaashi naanaa ye a mangelwe nokwa dhipagelwe molwashoka a longo iilonga mbyoka Kalunga e mu lombwele a longe, ota hokolola kutya naPetrus ota ka mona iihuna ya faathana. “Sho wa li omugundjuka,” Jesus te mu lombwele, “owi izaleke nowa yi nkoka wa hala; ihe nge to koko, nena to yelutha omaako goye, gulwe ote ku zaleke note ku fala nkoka ino hala ko.” Nonando Petrus okwa taalelwa keso molweitaalo, Jesus ote mu ladhipike ta ti: “Landula ndje.”

Sho Petrus ta punguluka, ota mono Johannes nota pula ta ti: “Omuwa, nguno ota ningwa ngiini?”

“Ongame ngele nda hala, a kale, manga tandi ya,” Jesus ta yamukula, “ou na shike nasho? Ongoye landula ndje.” Oyendji yomaalongwa oya li taya dhiladhila kutya oohapu ndhika dhaJesus otadhi ti kutya omuyapostoli Johannes ita ka sa nando. Ihe ngaashi omuyapostoli Johannes e shi yelitha konima yethimbo, Jesus ina tya kutya ita si nando, ihe Jesus okwa ti owala: “Ngele nda hala, a kale sigo tandi ya, ou na shike nasho?”

Konima yaashino Johannes okwa popi wo oohapu ndhika tadhi ti sha, ta ti: “Noku na iikwawo wo oyindji Jesus e yi longa, ihe andola kehe tuu sha nyolwa oshi ili, ondi shi, muuyuni itamu gwana mo omambo ngoka ge na okunyolwa ando.” Johannes 21:1-25; Mateus 26:32; 28:7, 10.

▪ Oshike tashi ulike kutya aayapostoli kaye shi shoka ye na oku ka ninga kuGalilea?

▪ Aayapostoli otaya dhimbulula ngiini Jesus pEfuta lyaGalilea?

▪ Iikando ingapi ngashingeyi Jesus ti iholola okuza peyumuko lye?

▪ Jesus ota tsu omuthindo ngiini shoka a hala aayapostoli ya longe?

▪ Jesus otu ulike ngiini omukalo ngoka Petrus ta ka sa?

▪ Oohapu dhini dhaJesus dhi na ko nasha naJohannes dha li kaadhi uvitiwe ko nawa koyendji yomaalongwa?