Ontopolwa 66

POshituthi shomatsali

JESUS okwa tseyika apuhe muule woomvula ndatu okuza peninginitho lye. Omayuvi ogendji gaantu oga mona iikumithalonga ye, nomahokololoningomwa kombinga yiilonga ye oga taandele noshilongo ashihe. Ngashingeyi, manga aantu ya gongala muJerusalem omolwOshituthi shOmatsali, otaye mu kongo hoka. “Oye oku li peni?” oya hala ye shi tseye.

Jesus okwa ningi oshinima shokutsilwa oompata. “Oye omwaanawa,” yamwe taya ti. “Aawe, oye ta hongolola aantu,” yalwe osho taya ti. Pomasiku gotango goshituthi opwa li pu na oonkundathana odhindji tadhi nongonwa ngaandhika. Ihe kapu na nando ogumwe i itumba a popile Jesus montaneho. Shika oshi li ngawo molwashoka aantu oya tila okukatukilwa onkatu kaawiliki yAajuda.

Sho ngaa oshituthi shi li metifa, ye Jesus ota thiki hoka. Ota yi kotempeli, hoka aantu ya kuminwa oonkondo dhe dhoku ya longa. Molwashoka Jesus ina hita nando oosikola dhuuhongi, Aajuda otayi ipula taya ti: “Nguka oku shi ngiini omanyolo, nando ina longwa?”

“Elongo lyandje kali shi lyandje,” Jesus ta yelitha, ihe “olyaanguka a tumu ndje. Ngele ku na ngoka a hala okugwanitha ehalo lye, oye ta ka dhimbulula, elongo ndika ngele olyomuKalunga nenge te popi mungame mwene.” Elongo lyaJesus oli li naanaa pampango yaKalunga. Onkee ano oshi na okukala sha yela kutya ye ota kongo esimano lyaKalunga, halye mwene. “Moses ine mú pa nani ompango?” Jesus ta pula. Ota popi pamukalo gwoku ya ganda ta ti: “Kapu na nando ogumwe gwomune ta vulika kompango.”—OB-1986.

“Oshike mwa hala okudhipaga ndje?” ano Jesus osho ta pula.

Aantu mengathithi, tashi vulika mboka ye ya koshituthi, oonkambadhala dha tya ngaaka kaye dhi shi. Oye shi tala ko shilimbilika sho gumwe a hala okudhipaga omulongi omukumithi a tya ngaaka. Onkee ano taya dhiladhila kutya opu na sha sha puka naJesus sho ta dhiladhila ngawo. “Ongoye u niwe kompwidhuli,” osho taya ti. “Olye a hala oku ku dhipaga?”

Aawiliki Aajuda oya hala Jesus a dhipagwe, nonando engathithi lyaantu inali shi tseya. Sho Jesus a aludha omulumentu mEsabati pwa pita omvula netata, aawiliki oya li taya kambadhala oku mu dhipaga. Onkee ano Jesus ngashingeyi tu ulike kokwaahe na ondjeleke kwawo moku ya pula ta ti: “Omuntu ngele ta fukalekwa mEsabati, ompango yaMoses yaa yonwe, one tamu geelele ndje shike ano, ongame sho nda aludha omuntu aguhe mEsabati. Inamu pangula pameho, panguleni epangulo lyu uka.”

Aakalimo yomuJerusalem mboka ya tseya onkalo ndjika, ngashingeyi otaya ti: “Haye tuu nguka taye mu kongo, ye mu dhipage? Ano tala, oye ta popi ontananeka, yo itaa ti sha kuye. Nenge aakuluntu oya dhimbulula tuu shili, nguno oye Kristus?” Aakalimo yomuJerusalem mbaka otaya yelitha molwashike yo itaayi itaale kutya Jesus oye Kristus taya ti: “Nokuli nguka otu mu shi nkoka a za; ihe Kristus nge te ya, kaku na ngoka e shi shi nkoka a za.”

Jesus ota yamukula ta ti: “One mu shi ndje, naankoka nda za omu shi ko; noinaandi za mungame mwene, ihe oonguka a tumu ndje, oye gwashili, oye nokamu mu shi. Ongame ondi mu shi, oshoka ongame gwomuye, noye a tuma ndje.” Molwaashika, otaya kambadhala oku mu kwata, tashi vulika oku mu tula mondholongo nenge oku mu dhipagitha. Ihe itaye shi pondola molwashoka kali shi ethimbo lyaJesus lyokusa.

Nonando ongaaka, aantu oyendji otayi itaale Jesus, ngaashi naanaa ye na oku shi ninga. Dhoshili, okwe ende kombanda yomeya, a mweneke oombepo, a mweneke efuta lyoshikungulu, a kutitha pashikumithalonga aantu omayuvi niikwiila noohi dhontumba, a aludha aavu, e enditha iilema, a tonatitha omeho gaaposi, a aludha aanashilundu nokwa yumudha nokuli aasi. Onkee ano taya pula taya ti: “Kristus nge te ya, ota longo tuu omandhindhiliko ogendji ge vule gaanguka?”

Sho Aafarisayi yu uvu engathithi lyaantu tali popi tali nongona kombinga yiinima mbika, yo naasaseri aakuluntu oya tumu ko aamati ya ka kwate Jesus. Johannes 7:11-32.

▪ Uunake mbela Jesus ta thiki koshituthi, naantu otaya popi shike kombinga ye?

▪ Omolwashike yamwe taya ti kutya Jesus oku niwe kompwidhuli?

▪ Aakalimo yomuJerusalem ohaya tala ko ngiini Jesus?

▪ Omolwashike aantu oyendji yi itaale Jesus?