Ontopolwa 93

Sho Omuna gwomuntu ta holoka

MANGA Jesus e li natango kolundume (muSamaria nenge muGalilea), Aafarisayi otaye mu pula shi na ko nasha nokuya kUukwaniilwa. Oyi itaala kutya otau ke ya neadhimo enene, ihe Jesus ota ti: “Uukwaniilwa waKalunga itau ya u wetike pamukalo omundhindhilikwedhi, naantu itaa ka tya wo: ‘Tala, oompoka!’ nenge, ‘Oompeyaka!’ Oshoka, tala! uukwaniilwa waKalunga ou li mokati keni.”—NW.

Oohapu dhaJesus “mokati keni” ethimbo limwe odha li dha tolokwa “meni mune.” Onkee ano yamwe oya li taya dhiladhila kutya Jesus okwa li a hala okutya kutya Uukwaniilwa waKalunga otau pangele momitima dhaapiya yaKalunga. Ihe osha yela kutya Uukwaniilwa waKalunga kau li momitima dhAafarisayi aakaaneitaalo mboka Jesus ta popi nayo. Ihe ou li mokati kawo, molwashoka Omukwaniilwa gwUukwaniilwa waKalunga ngoka a langekwa po, Jesus Kristus, oku li naanaa mokati kawo.

Otashi vulika konima sho Aafarisayi ya yi Jesus opo ta tsikile okupopya naalongwa ye kombinga yokuya kUukwaniilwa. Okwa li unene tuu ta dhiladhila okukala po kwe kwomonakuyiwa moonkondo dhUukwaniilwa sho ta londodha ta ti: “Notamu lombwelwa: Tala, oku li mpeyaka, nenge: Tala, oompaka, inamu ya ko, ne inamu matukila ko [kOomessias mbaka yiifundja]. Oshoka ongashika olwaadhi mokwaadhima talu shela okooha dhegulu sigo okooha oonkwawo, osho tuu Omuna gwOmuntu ta kala esiku lye.” Onkee ano Jesus otu ulike kutya ngaashi olwaadhi halu vulu okumonika moshitopolwa ashihe, osho naanaa euliko lyokukala po kwe moonkondo dhUukwaniilwa tali ka kala tali monika sha yela kwaayehe mboka ya hala oku li mona.

Opo nduno Jesus ota ningi omafaathanitho giiningwanima yonale okuulika nkene iikala yaantu tayi ka kala pethimbo lyokukala po kwe kwomonakuyiwa. Ota yelitha ta ti: “Nongashika pwa ningi pomasiku gaNoa, osho taku ningi pomasiku gOmuna gwOmuntu . . . Nongaashi pwa ningi pomasiku gaLot, ya kala haa li nohaa nu, ya landa, ya halitha, ya tsike noya tungu, ihe esiku ndyoka Lot a tembuka mo muSodom, megulu mwa loko omulilo nosulfuri noye ya yono po ayehe, osho tuu taku ningi esiku ndyoka Omuna gwOmuntu ta holoka.”

Jesus ita ti kutya aantu yopethimbo lyaNoa naLot oya hanagulwa po molwashoka owala ya tsikile niilonga yashaasiku yokulya, okunwa, okulanda, okulanditha, okutsika nokutunga. Nokuli Noa naLot nomaukwanegumbo gawo oya li wo haya ningi iinima mbika. Ihe aantu yalwe oya kala yi ipyakidhila niilonga mbika yakehe esiku noitaaya pulakene nando kehalo lyaKalunga, nomolwashono ya hanagulwa po. Aantu otaya ka hanagulwa po molwetompelo olyo tuu ndyoka, sho Kristus ta ka holoka pethimbo lyuudhigu uunene wonkalelo ndjika yiinima.

Jesus ota tsu omuthindo nkene sha simana okwiinyenga nziya keuliko lyokukala po kwe kwomonakuyiwa moonkondo dhUukwaniilwa nota gwedha po ta ti: “Esiku ndyoka, oongoka ta adhika kombanda yongulu e na iinima ye megumbo, kaa kuluke, e ke yi tale ko, nosho tuu ngoka ta adhika mepya ina galuka ko. Dhimbulukweni omukiintu gwaLot.”

Uuna euliko lyokukala po kwaKristus tali holoka, aantu itaya vulu okupitika nando okukakatela kwawo kiiniwe yopanyama ku ya imbe okukatuka nziya. Osha yela kutya omukiintu gwaLot sho a li mondjila okuza mo muSodom, okwa tala konima nondjuulukwe yiinima mbyoka a thigi po, nokwa shituka oshaanda shomongwa.

Jesus ota tsikile nokuhokolola onkalo ndjoka tayi ka kala po pethimbo lyokukala po kwe kwomonakuyiwa nota lombwele aalongwa ye ta ti: “Uusiku mbwiyaka aalumentu yaali taa kala montala yimwe, gumwe ta taambwa nomukwawo ta thigwa po. Aakiintu yaali taa tsu koshini shimwe, gumwe ta taambwa nomukwawo ta thigwa po.”

Okutaambwa otashi tsu kumwe nokuya monguluwato kwaNoa nuukwanegumbo we nonokukuthwa muSodom kwaLot nuukwanegumbo we kaayengeli. Otashi ti ehupitho. Mepingathano naashika, okuthigwa po otashi ti okuhanagulwa po.

Ngashingeyi aalongwa otaya pula taya ti: “Omuwa, openi?”

“Oonkoka ku na omudhimba, oko taku gongala oontsa,” Jesus ta yamukula. Mboka taya “taambwa” omolwehupitho oya fa oontsa hadhi mono kokule molwashoka otaya gongalele “omudhimba.” Omudhimba otagu ulike kuKristus gwashili pethimbo lyokukala po kwe ihaaku monika moonkondo dhUukwaniilwa nokoshituthi shopambepo shoka Jehova ta ningi. Lukas 17:20-37; Genesis 19:26.

▪ Uukwaniilwa owa li u li ngiini mokati kAafarisayi?

▪ Okomukalo guni okukala po kwaKristus kwa fa olwaadhi?

▪ Omolwashike aantu taya ka hanagulwa po molwiilonga yawo pethimbo lyokukala po kwaKristus?

▪ Okutaambwa nokuthigwa po otashi ti shike?