Ontopolwa 26

Ta galukile kegumbo muKapernaum

ETHIMBO ndyono etumbalo lyaJesus olyi ihanene shaa mpono, naantu oyendji oye li molweendo yu uka komahala gi ili nogi ili gokokule hoka e li. Ihe konima yomasiku gontumba, ota galukile kuKapernaum pEfuta lyaGalilea. Onkundana kutya okwa galukila kegumbo otayi taandele nziyanziya noshilando ashihe, noyendji otaye ya kegumbo hoka e li. Aafarisayi nAalongimpango otaya zi nokuli kokule kuJerusalem.

Engathithi lyaantu enene noonkondo olya thitike po osheelo, nokapwa li we omuntu ta vulu okupita a ye meni. Ayehe oyi ilongekidhila oshiningwanima oshindhindhilikwedhi noonkondo. Shoka tashi ningwa pompito ndjika osha simanenena noonkondo, oshoka otashi tu kwathele tu mone kutya Jesus oku na oonkondo okukutha po shoka hashi eta okumona iihuna kwaantu nokugalulila uukolele ayehe mboka ye a hala okwaaludha.

Manga Jesus ta longo engathithi lyaantu, aalumentu yane otaye eta megumbo omulumentu omusilombanda e li kontala. Oya hala Jesus a aludhe kuume kawo, ihe molwengathithi lyaantu, itaya vulu okuya mo meni. Kashi yemateka tuu! Ihe itaya si uunye. Otaya londo kombanda yondunda ndjoka, otaya ningi ko ombende, e taya kulukithile ontala hoka ku na omulumentu omusilombanda puJesus.

Mbela Jesus ota geye molwokupiyaganekwa? Hasho nando! Mepingathano naashika, okwa kumithwa unene keitaalo lyawo. Ota lombwele omusilombanda: “Omayonagulo goye taga dhimwa po.” Ihe Jesus ota vulu ngaa shili mbela okudhima po omayonagulo? Aanongoraamata nAafarisayi hasho taya dhiladhila. Otaya tompathana moomwenyo dhawo taya ti: “Ota popi ngiini ngawo? Ota tuku [Kalunga, OB-1986]! Olye ta vulu okudhima po omayonagulo, kee shi gumwe awike, oKalunga?”

Jesus mokutseya shoka taya dhiladhila, ota ti: “Oshike tamu dhiladhila shono moomwenyo dheni? Oshipu oshini po, okulombwela oshilema: Omayonagulo goye taga dhimwa po, nenge okulombwela: Thikama, kutha po iinguma yoye, ngu u ende?”

Opo nduno Jesus ota pitika engathithi lyaantu, mwa kwatelwa aapataneki ye, ya mone eulikilo endhindhilikwedhi ndyoka tali ku ulika kutya ye oku na oonkondopangelo okudhima po omayonagulo kombanda yevi nonokutya ye omuntu omunenenene shili ngoka a kala ko nale. Ota taalele komusilombanda e te mu lombwele: “Thikama, kutha po iinguma yoye, ngu u ye kaandjeni.” Ote shi ningi nziyanziya nokweenda u uka pondje nontala ye montaneho yawo ayehe! Aantu otaya hambelele Kalunga notayi igidha ya kumwa: “Iinima yi thike mpaka inatu yi mona nando olumwe.”

Owa ndhindhilika tuu kutya Jesus ota popi omayonagulo mekwatathano nomukithi nonokutya edhiminopo lyomayonagulo olya faathana nokumona uukolele wopanyama? Ombimbeli otayi yelitha kutya omukuluntu gwetu gwotango, Adam, okwa yono nonokutya tse atuhe otwa thigulula iilanduliko yuulunde mboka, sha hala okutya, omukithi nosho wo eso. Ihe kohi yelelo lyUukwaniilwa waKalunga, Jesus ota ka dhima po omayonagulo gaayehe mboka ye hole Kalunga nohaye Mu longele, nopo nduno omikithi adhihe otadhi ka kuthwa po. Itashi ka kala tuu oshiwanawa! Markus 2:1-12; Lukas 5:17-26; Mateus 9:1-8; Aaroma 5:12, 17-19.

▪ Oshike sha li she etitha po oshiningwanima oshindhindhilikwedhi noonkondo?

▪ Omusilombanda okwa thiki ngiini puJesus?

▪ Omolwashike tseni atuheni tu li aalunde, ihe ongiini Jesus a gandja etegameno kutya edhiminopo lyoondjo nosho wo uukolele wa gwanena otayi wapa?