Ontopolwa 124

Ta gandjwa nota falwa

SHO Pilatus, ngoka i inyengithwa kegundjilo lyokumwena kwomuhepekwa Jesus, ta kambadhala natango oku mu mangulula, otashi geyitha noonkondo aasaseri aakuluntu. Yo oya tokolatoko opo elalakano lyawo ewinayi kaali imbwe kusha. Onkee ano otayi igidha ishewe taya ti: “Mu alela koshiti! Mu alela koshiti!”—NW.

“Mu kutheni, ne mu mu alele,” Pilatus ta yamukula. (Mepingathano naashoka ya popi metetekelo, Aajuda otashi vulika ye na uuthemba okudhipaga aalongi yomuyonena molwomayono gopalongelokalunga ngoka ga kwata miiti noonkondo.) Opo nduno Pilatus ota tseyitha oshikando oshititano kutya Jesus ke na ondjo, ta ti: “Ngame kandi wete ko oondjo muye.”

Aajuda sho ye wete kutya omalundilo gawo gopapolitika oga nyengwa okweeta po sha, otaya shuna ishewe kelundilo lyopalongelokalunga li na ko nasha nokusheka Kalunga ngaashi ye shi ningile nale uule wootundi dha piti pokupangulwa kwaJesus kOsanhedrin. “Otu na ompango,” yo taya ti, “nompango ndjoka [otayi ti, OB-1986] oku na oondjo dhokusa, oshoka oye okwi iningi Omuna gwaKalunga.”

Elundilo ndika epe kuPilatus notali mu tilitha noonkondo. Ngashingeyi oku shi shi kutya Jesus ke shi omuntu gwowala, ngaashi nokuli ondjodhi yomukulukadhi gwe nosho wo oonkondo oondhindhilikwedhi dhuukwatya waJesus tayi shi ulike. Ihe “Omuna gwaKalunga” mbela? Pilatus oku shi shi kutya Jesus okwa za muGalilea. Ihe otashi vulika a li ko nale mbela? Pilatus ote mu fala ishewe mongulumbala nota pula ta ti: “Ongoye ogwapeni?”

Jesus ita yamukula sha. Nale okwa lombwelele Pilatus kutya oye omukwaniilwa ihe Uukwaniilwa we kau shi oshitopolwa shuuyuni mbuka. Ngashingeyi okutsikila nokuyelitha itaku ka kala ku na we oshilonga. Ihe Pilatus molwuuntsa we ote ehamekwa kokwaayamukula kwaJesus, nota popi naye nondjahi oohapu ndhika: “Ku shi shi, ongame ndi na epangelo oku ku etha nondi na epangelo oku ku alela [koshiti, NW]?”

“Andola wa li inoo pewa epangelo megulu, ando ku na epangelo lyasha mungame,” Jesus ta yamukula nesimaneko. Otu ulike kokugandja kwaKalunga oonkondo kaapangeli yopantu okulela iinima yokevi. Jesus ota gwedha po ta ti: “Onkee ano oongoka a gandja ndje kungoye, oye e na oondjo dhi vule ndhoka dhoye.” Dhoshili, omusaseri omukuluntu kuyakwawo Kaifas nooyakwawo nosho wo Judas Iskariot ayehe oye na oshinakugwanithwa oshidhigu ye vule Pilatus shokukala naJesus shaa li pauyuuki.

Molwashoka Pilatus okwa kumithwa nokuli noonkondo kuJesus nokwa tila kutya pamwe Jesus okwa za kuKalunga, ota ningi po ishewe oonkambadhala dhilwe oku mu mangululitha. Ihe Aajuda otaya keelele Pilatus. Otaye endulula elundilo lyawo lyopapolotika, notaye mu tilitha nekoto taya ti: “Ongoye ngele to mu etha, ku shi kuume komukesari; kehe tuu ngoka ti iningi omukwaniilwa, ota tsu ondumbo nomukesari.”

Nonando otashi vulika shi ete oshiponga, Pilatus ote eta natango Jesus pondje. “Tala, omukwaniilwa gweni!” osho natango ta ti.

“Za po, za po naye, mu alela [koshiti]!”

“Nandi alele [koshiti] omukwaniilwa gweni?” Pilatus ta pula a tyololoka.—Yelekanitha NW.

Aajuda kaye uvitile ombili epangelo lyAaroma. Dhoshili, yo oye tonde epangelo lyaRoma. Ihe aasaseri aakuluntu otaya popi niihelele taya ti: “Otse katu na omukwaniilwa, omukesari tuu.”

A tila molwondondo ye yopapolotika nosho wo uunedhina we, Pilatus lwahugunina oti igandja komaindilo gAajuda kaage na ehulilo. Ota gandja Jesus. Aakwiita otaya hula Jesus onguwo ontiligane notaye mu zaleke onguwo ye yokombanda. Jesus ota thininikwa a humbate omuti gwe gwomahepeko, sho ta falwa a ka alelwe kugo.

Ngashingeyi osho oshitumbetango mEtitano, 14 Nisan; tashi vulika ku li pokuninga pokati komutenya. Jesus okwa penduka nale ongula onene mEtine, nota mono iihuna yuuwehame wa landulathana. Oshi shi okuuviwa ko sho a vulwa nziya omolwuudhigu woshiti. Onkee ano omweendipo gumwe Simon Omukireni gwomuAfrika, ota thiminikwa e gu mu humbatele. Manga taye ende, aantu oyendji otaya landula mo, mwa kwatelwa aakiintu ya nika oluhodhi notaya lili molwaJesus.

Jesus ota pungulukile kaakiintu nota ti: “Aafuko ne Aajerusalem, inamu lila ndje, ilileni ne yene naana yeni. Oshoka, tala, omasiku tage ya, uuna taku tiwa: Aanelago oomboka aantimbe, nomala inaaga vala nomagundji inaaga yamutha . . . Oshoka omuti omutalala nge tagu ningwa ngeyi, omukukutu otagu ningwa ngiini?”

Jesus ota popi omuti ngoka gu li oshigwana shAajuda, ngoka omutalala gu na natango omwenyo mugo gwene molwokukala po kwaJesus nokukala po kwoshihupe shoka she mu itaala. Ihe uuna mbaka taya kuthwa mo moshigwana, omuti owala ngoka gwa sa gwopambepo tagu ka kala po, eeno, ehangano lya kukuta lyopaigwana. O! itapu ka kala tuu elilagano uuna omatanga gaakwiita gaRoma ge li omugwanithi gwetokolo gwaKalunga taga ka hanagula po oshigwana shAajuda! Johannes 19:6-17; 18:31; Lukas 23:24-31; Mateus 27:31, 32; Markus 15:20, 21.

▪ Elundilo lyashike aawiliki yelongelokalunga taya lundile Jesus sho omalundilo gawo gopapolitika ga nyengwa okweeta po sha?

▪ Omolwashike Pilatus a tila noonkondo?

▪ Oolye ye na ondjo onene yaashoka tashi ningilwa Jesus?

▪ Lwahugunina, aasaseri otaye shi tompola ngiini opo Pilatus a gandje Jesus a dhipagwe?

▪ Jesus ota lombwele shike aakiintu mboka taya lili omolwe, nokwa hala okutya shike mokupopya omuti “omutalala” nopo nduno “omukukutu”?