Ta hogolola aayapostoli ye
Ontopolwa 34
Ta hogolola aayapostoli ye
OSHA LI omvula netata lwaampono okuza sho Johannes Omuninginithi a tseyitha Jesus e li Onzigona yaKalunga na Jesus a tameke uukalele we womontaneho. Pethimbo opo tuu mpoka Andreas, Simon Petrus, Johannes, tashi vulika naJakob (omumwayina gwaJohannes), nosho wo Filippus naNatanael (hi ithanwa wo Bartolomeus), oya ningi aalongwa ye yotango. Konima yethimbo, yalwe oyendji oya landula Kristus pamwe nayo.
Ngashingeyi Jesus okwi ilongekidha okuhogolola aayapostoli ye. Mbaka otaya ka kala ooyakwawo yopothingo mboka taya ka mona edheulo lyi ikalekelwa. Ihe manga Jesus inee ya hogolola, ota yi kondundu e ta kala hoka uusiku auhe ta galikana, tashi vulika ta pula uunongo neyambeko kuKalunga. Sho eluwa tali tende, oti ithana aalongwa ye nota hogolola mo 12 mokati kawo. Ihe molwashoka oye li natango aanongekwa yaJesus, otayi ithanwa wo natango aalongwa.
Yahamano mboka ya hogololwa kuJesus, mboka ya tumbulwa metetekelo, oyo mboka ya ninga aalongwa ye yotango. Mateus, ngoka i ithanenwe kuJesus pongulu yoompale, naye wo okwa hogololwa. Yalwe yatano mboka ya hogololwa oyo Judas (ngoka hi ithanwa wo Taddeus), Judas Iskariot, Simon Kananeus, Tomas naJakob, omwana gwaAlfeus. Jakob nguka ohi ithwanwa wo Jakob Omushona, tashi vulika molwashoka ye omushona molutu nenge e li omushona komuyapostoli gulwe Jakob.
Ngashingeyi mbano 12 oya kala pamwe naJesus ethimbo ele, noku ya shi nawa. Dhoshili, oyendji yomuyo oyo aakwanezimo lye. Jakob nomumwayina Johannes osha yela kutya oyo oontsezi yaJesus. Na Alfeus otashi vulika a li omumwayina gwaJosef, he yaJesus ngoka e mu tekula. Ano omwana gwaAlfeus, omuyapostoli Jakob, naye okwa li wo ntsezi yaJesus.
Dhoshili, Jesus ke na uupyakadhi wokudhimbulukwa omadhina gaayapostoli ye. Ihe mbela ngoye oto vulu oku ga dhimbulukwa? Dhimbulukwa owala kutya opu na ooSimon yaali, ooJakob yaali nooJudas yaali, nonokutya Simon oku na omumwayina Andreas, naJakob oku na omumwayina Johannes. Nguka ogwo omukalo to vulu okudhimbulukwa omadhina gaayapostoli yahetatu. Yalwe yane oya kwatela mo omuteloni (Mateus), ngoka konima yethimbo a li a limbililwa (Tomas), ngoka a li kohi yomuti sho i ithanwa (Natanael), nakuume ke Filippus.
Omulongo nagumwe yomaayapostoli oya zile kuGalilea, oshitopolwa shopaandjawo yaJesus. Natanael okwa za kuKaana. Filippus, Petrus naAndreas yo yene oya zile kuBetsaida; Petrus naAndreas konima yethimbo oya tembukile kuKapernaum, hoka sha yela kutya oko kwa li kwa kala Mateus. Jakob naJohannes oya li mongeshefa yokuyula oohi notashi vulika ya li wo ya kala muKapernaum nenge popepi nasho. Osha yela kutya Judas Iskariot, ngoka konima yethimbo a gwaaleke Jesus, oye awike omuyapostoli a za muJudea. Markus 3:13-19; Lukas 6:12-16.
▪ Aayapostoli yeni tashi vulika ya li aakwanezimo yaJesus?
▪ Aayapostoli yaJesus oyo oolye, nongiini to vulu okudhimbulukwa omadhina gawo?
▪ Aayapostoli oya zile kiitopolwa yini?
