Ontopolwa 76

Ta li pamwe nOmufarisayi

KONIMA sho Jesus a yamukula aapataneki mboka taya pula mpoka pwa za oonkondo dhe dhokwaaludha omulumentu ngoka ihaa vulu okupopya, Omufarisayi okwe mu ithana komwiha. Aafarisayi oye na omukalondjigilile okuyoga iikaha yawo sigo opoongolo dhomaako manga inaaya lya. Ohaye shi ningi komeho nokonima yokulya nokuli nopokati kokulya. Nonando omuthigululwakalo ngoka itagu yono ompango yaKalunga ya nyolwa, gwo ogwa pitilila po pwaashoka Kalunga ta pula shi na sha nomikalo dhuuyogoki.

Sho Jesus inaa dhiginina omuthigululwakalo ngoka, osha kumitha ngoka e mu hiya. Nokuli nonando otashi vulika itaa popi kutya okwa kumwa, Jesus ote shi mono nota ti: “Ne aafarisayi, ohamu yogo oshitenga netemba kombanda, ihe meni lyeni omu udha eyugo nuudhudhu. Omagoya ne, oongoka a shiti shokombanda, haye tuu a shiti noshomeni wo?”

Onkee ano Jesus ta tula pomutenya iihelele yAafarisayi mboka haya yogo iikaha yawo pamikalondjigilile ihe ihaya yogo uuwinayi momitima dhawo. Ota ti: “Shino shomeni shi gandjeni omagano, ayihe notayi mú yogokele.” Uuna taya gandja, oye na okwiinyengithwa komutima gu na ohole, hakehalo lyokwiimonikitha kuyalwe kutya yo aayuuki.

Jesus ota tsikile ta ti: “Yaye ne, aafarisayi, sho hamu gandja iitimulongo yopepera, yiizimba noyomboga kehe nohamu pitilile uuyuuki nohole okuhola Kalunga, shino oshi na okugwanithwa naashiyaka shaa na okweethiwa.” Ompango yaKalunga kuIsrael otayi pula opo ya fute iitimulongo yomiikunwa yomepya. Opepera noshizimba oyo uumeno uushona nenge iigwanga mbyoka hayi longithwa okutoyaleka iikulya. Aafarisayi ohaya futu nawa oshitimulongo nokuli shiigwanga yowala, ihe Jesus ote ya pangula, molwashoka oya dhina oshitegelelwa shoka sha simanenena shokuholola ohole nokukala aanambili naaishonopeki.

Jesus ota tsikile te ya pangula ta ti: “Yaye ne, aafarisayi, sho mu hole iipundi yokomeho mosinagoga nomapopitho pomalandelo. Yaye ne, sho mwa fa oombila dhaa wetike, naantu taa ende kombanda yadho, yo kaye shi shi.” Okwaahenuuyogoki kwawo ihaku monika. Elongelokalunga lyAafarisayi otali monika ewanawa kombanda, ihe meni kali na ongushu yasha! Olya kankamena kiihelele.

Omunongompango, gumwe gwomwaamboka ya tseya nawa Ompango yaKalunga, ota pulakene komunyanena nguka nota nyenyeta ta ti: “Omuhongi, sho to popi [ngawo], natse wo to tu [shekitha, OB-1986].”

Jesus ota gandja wo uusama kaanongo yOmpango mboka ta ti: “Yaye nane wo, aanongompango, sho hamu tsike aantu omitenge omidhigu okuhumbatwa, ne yene ihamu dhi gumu nando okanwe keni kamwe. Yaye one mboka, hamu dhikile aaprofeti oompampa, yo ya dhipagwa kooho.”

Omitenge ndhoka Jesus ta tumbula odho omithigululwakalo dhopakana, ihe aanongompango mbaka itaya ka ningulula nando ogumwe gwomudho ye gu pupalekele aantu. Jesus ota holola kutya yo oya zimina nokuli edhipago lyaaprofeti, note ya londodha ta ti: “Epipi ndika [otali ka pulwa] ombinzi yaaprofeti ayehe ya tilwahi oketameko lyuuyuni, okombinzi yaAbel sigo ombinzi yaSakaria a dhipagelwa pokati keyambelo notempeli. Eeno, otandi mú lombwele, oyo tayi ka pulwa koluvalo nduka.”

Uuyuni waantu mboka taya vulu okumangululwa owa tameka nokuvalwa kwaanona yaAdam naEva; ano Abel okwa kala ko okuza ‘ketameko lyuuyuni.’ Konima yedhipago lyonyanya lyaSakaria, etangakwiita lyaSiria olya yugu ko Juda. Ihe Jesus ota hunganeke eyugoko ewinayi lyepipi lye mwene molwuuwinayi walyo uunene. Eyugoko ndika olya li tali ningwa konima yoomvula 38 lwaampono mo 70 E.N.

Jesus ota tsikile nomunyanena gwe, ta ti: “Yaye ne, aanongompango, sho mwa yugu oshipatululo shuunongo, one yene inamu ya mo, naamboka ya hala okuya mo, mwe ya kelela.” Aanongo yOmpango oye na oshinakugwanithwa shokuyelithila aantu Oohapu dhaKalunga nokufatulula shoka tadhi ti. Ihe ihaye shi ningi nohaya kutha nokuli aantu ompito yoku dhi uva ko.

Aafarisayi naanongompango oya geyela Jesus noonkondo molwashoka te ya yambulula. Sho ta zi mo megumbo, otaya tameke oku mu pataneka noonkondo notaye mu kondeke nomapulo. Otaya kambadhala oku mu tegela omwigo opo a popye sha shoka yo taya vulu oku mu kwatela. Lukas 11:37-54; Deuteronomium 14:22; Mika 6:8; 2 Ondjalulahokololo 24:20-25.

▪ Omolwashike Jesus ta nyana Aafarisayi nosho wo aanongo yOmpango?

▪ Omitenge odhini aanongompango haya tsike aantu?

▪ ‘Etameko lyuuyuni’ olya li uunake?