Ontopolwa 17

Ta longo Nikodemus

MANGA Jesus e li pOpaasa yomo 30 E.N., ota longo omandhindhiliko omandhindhilikwedhi, nenge iikumithalonga. Oshilanduliko, aantu oyendji otaye mu itaala. Nikodemus, oshilyo shOsanhedrin, ompangu yopombanda yAajuda, okwa kumwa, nokwa hala okwiilonga oshindji. Onkee ano ote ya kuJesus momilema uusiku, tashi vulika a tila kutya pamwe otashi ka nayipika edhina lye kaawiliki yalwe Aajuda ngele okwa monika.

“Rabbi,” ye ta ti, “otu shi shi ongoye omuhongi wa zi muKalunga, oshoka kaku na ngoka ta vulu okulonga iikumithalonga mbyoka to yi longo, okuninga Kalunga e mu na.” Mokuyamukula, Jesus ota lombwele Nikodemus kutya opo omuntu a ye mUukwaniilwa waKalunga, oku na ‘okuvalululwa.’

Ihe ongiini mbela omuntu ta vulu okuvalululwa? “Ita wapa ndishi okushuna moshivalelo shayina nokuvalwa”? Nikodemus ta pula.

Aawe, okuvalululwa hasho taku ti ngaaka. “Omuntu ngele ita valwa momeya nomOmbepo,” Jesus ta yelitha, “ita wapa okuya [muukwaniilwa waKalunga, KB].” Sho Jesus a ninginithwa nosho wo ombepo ondjapuki ya kulukile kuye, ano okwa valwa “momeya nomOmbepo.” Okupitila metseyitho ndyoka lye endele pamwe nayo lya zi megulu tali ti: ‘Nguka Omumwandje nde mu hokwa,’ Kalunga okwa tseyitha kutya ye okwa vala omwana gwopambepo ngoka e na etegameno lyokuya mUukwaniilwa womegulu. Konima yethimbo, pOpentekoste yomo 33 E.N., aaninginithwa yalwe otaya ka pewa ombepo ondjapuki nonkee ano taya ka valululwa wo ye li oyana yaKalunga yopambepo.

Ihe oshilonga shOmwana gwaKalunga gwopantu i ikalekelwa osha simana noonkondo. “Nongashika Moses [kwa] yeluthile eyoka pombanda mombuga,” Jesus ta lombwele Nikodemus, “osho tuu Omuna gwOmuntu ota ka yeluthwa, opo shaa ngoka e mu itaale, a mone omwenyo gwaaluhe.” Eeno, ngaashi Aaisrael mboka ya lumatelwe komayoka guuzigo ya li ye na okutala keyoka lyoshikushu opo ya hupithwe, osho aantu ayehe ya pumbwa okukala ye na eitaalo tali longo mOmwana gwaKalunga opo ya hupithwe monkalo yawo yokusa.

Mokutsa omuthindo oshilonga shopahole shaJehova mwaashika, Jesus ota lombwele natangoNikodemus ta ti: “Oshoka osho Kalunga kwa li e hole uuyuni, oye a gandja Epona lye, opo shaa ngoka e [na eitaalo tali longo muye, NW], kaa kane, ihe a mone omwenyo gwaaluhe.” Ano muka muJerusalem, oomwedhi owala hamano konima yokutameka uukalele we, Jesus ota yelitha kutya Jehova Kalunga ota ka hupitha aantu okupitila muye.

Jesus ota tsikile ta yelithile Nikodemus ta ti: “Oshoka Kalunga ina tuma Omwana muuyuni, a pangule uuyuni,” sha hala okutya, haku wu pangulila omupya nenge okupangulila aantu yamo ehanagulo. Pehala lyaashono, ngaashi Jesus ta ti, ye okwa tumwa opo “uuyuni u hupithwe kuye.”

Nikodemus okwe ya kuJesus momilema molwashoka a tila. Onkee ano oshihokitha sho Jesus ta hulitha oonkundathana dhe naye mokutya: “Ihe epangulo olyo ndika: uuyelele [mboka wa ntuupekwa kuJesus monkalamwenyo ye nomelongo lye] we ya muuyuni, naantu ya li ye hole omilema komeho guuyelele, oshoka iilonga yawo oya li iiwinayi. Oshoka shaa ngoka ha longo uuwinayi, ota tondo uuyelele, ye iha holokele puuyelele, iilonga ye yaa geelwe. Ihe oongoka ha longo oshili, oye ha holokele puuyelele, iilonga ye yi holoke, oshoka oyo ya ningilwa muKalunga.” Johannes 2:23–3:21; Mateus 3:16, 17; Iilonga 2:1-4; Numeri 21:9.

▪ Oshike she etitha etalelopo lyaNikodemus, nomolwashike te ya uusiku?

▪ ‘Okuvalululwa’ otashi ti shike?

▪ Jesus ota yelitha ngiini oshilonga she mehupitho lyetu?

▪ Otashi ti shike sho Jesus ine ya okupangula uuyuni?