Ontopolwa 2

Ta simanekwa manga inaa valwa

KONIMA sho omuyengeli Gabriel a lombwele omukiintu omugundjuka Maria kutya ota ka mona okanona okamati hoka taka ka ninga omukwaniilwa gwaaluhe, Maria ota pula ta ti: “Shika otashi ka ningwa ngiini, oshoka omulumentu kandi mu shi?”

“Ombepo Ondjapuki otayi ku lambele,” Gabriel ta yelitha, “noonkondo dhaanguka gwOkombandambanda otadhi ku siikile, onkee ano omuvalwa ngu omuyapuki ota ka lukwa Omuna gwaKalunga.”

Okukwathela Maria opo i itaale etumwalaka lye, Gabriel ota tsikile ta ti: “Tala, naElisabet omukweni, oonguka kwa tiwa omuntimbe, okwa ningi omusimba gwokamati omuukulupe we, nomwedhi nguka gwe ogwo omutihamano, oshoka Kalunga iha nyengwa kusha.”

Maria oti itaale oohapu dhaGabriel. Noti inyenge ngiini mbela? “Tala, ongame omuntu gwOmuwa,” osho ti igidha. “Nandi ningwe ngashika wa ti.”

Nziya konima sho Gabriel a yi, Maria oti ilongekidha nota yi a ka talele po Elisabet, ngoka ye nomusamane gwe, Sakaria, ya kala momukunda gu na oondundu gwaJudea. Nduka olwo olweendo olule tashi vulika lwomasiku gatatu nenge gane okuza pegumbo lyaMaria muNasaret.

Lwahugunina sho Maria ta thiki pegumbo lyaSakaria, ota yi meni note ya kundu. Opo nduno Elisabet oku udhithwa ombepo ondjapuki, nota lombwele Maria ta ti: “Ongoye omulalekwa nuuyamba mokati kaakiintu, nonakuvalwa nguka gwomungoye omulalekwa nuuyamba! Nosha zile ndje peni, yina yOmuwa gwandje te ya kungame? Oshoka ewi lyekundo lyoye sho lya thiki momakutsi gandje, okanona ka nuka kenyanyu mela lyandje.”

Sho Maria te shi uvu, ota yamukula nolupandu talu zi komutima ta ti: “Omwenyo gwandje otagu hambelele Omuwa pombanda, nombepo yandje otayi nyanyukilwa Kalunga, Omukulili gwandje, oshoka [okwa dhimbulukwa omuntu gwe mokwiishonopeka kwe, OB-1986]. Tala, okonena omapipi agehe otaga simaneke ndje omunelago. Oshoka Omunankondo a ningile ndje iinima iinene.” Ihe nonando Maria okwa silwa ohenda, ota gandja esimano alihe kuKalunga. ‘Edhina lye olyo eyapuki,’ ye ta ti, “nesilohenda lye otali ka thika koluvalo nomaluvalo okumboka haye mu tila.”

Maria ota tsikile ta hambelele Kalunga meimbilo lyopahunganeko lya nwethwa mo, ta ti: “Okwa longo iilongankondo kokwooko kwe nokwa halakanitha po oonakuholuuntsa moomwenyo dhawo. Aanamapangelo okwe ya shundula po kiipundi nokwa nenepekitha [aaishonopeki, OB-1986]. Aasindjala okwe ya kutitha nuuwanawa naayamba okwe ya tidha po owala. Okwa taamba Israel, omuntu gwe, opo a dhimbulukwe esilohenda lye sigo aluhe kuAbraham nokoluvalo lwe, ngashika a lombwele ootate.”

Maria ota kala puElisabet oomwedhi ndatu lwaampono, nosha yela kutya ye oku li ekwatho enene pethimbo lyiiwike mbino yahugunina Elisabet e li metegelelo. Oshi li nawa noonkondo opo aakiintu mbano yaali aadhiginini, mboka ayehe ya ningi omategelelo kekwatho lyaKalunga, ya vule okukala pamwe methimbo ndika lyonkalamwenyo yawo ya yambekwa.

Owa ndhindhilika tuu kutya Jesus okwa li a simanekwa nokuli omanga inaa valwa? Elisabet okwe mu ithana ‘Omuwa gwandje,’ nokanona ke hoka inaaka valwa natango oka nuka kenyanyu sho Maria e ya po oshikando shotango. Mepingathano naashika, konima yethimbo yalwe oya kala itaaya simaneke Maria nosho wo okanona ke hoka inaaka valwa natango, ngaashi tatu ke shi mona. Lukas 1:26-56.

▪ Gabriel ota popi shike opo a kwathele Maria a vule okuuva ko nkene ta ka ninga omusimba?

▪ Jesus okwa kala a simanekwa ngiini manga inaa valwa?

▪ Maria ota ti shike meimbilo lyopahunganeko lyokuhambelela Kalunga?

▪ Ethimbo li thike peni Maria ta kala puElisabet, nomolwashike shi li nawa opo Maria a kale puElisabet ethimbo ndyoka?