Ontopolwa 83

Ta yakulwa kOmufarisayi

JESUS oku li natango megumbo lyOmufarisayi omukuluntu nopo a aludha omulumentu ngoka ta hepekwa koshizinda. Sho Jesus a mono aayenda ooyakwawo taya hogolola omahala gokomeho pokulya, okwa tameke ta longo oshiilongomwa kombinga yeifupipiko.

“Ngele ku na ngoka e ku ithanene kohango,” opo nduno Jesus ota yelitha, “ino kuutumba koshipundi shokomeho, pwaa ninge, ngele pe na ngoka e ku vule, i ithanwa wo, naangoka e mu ithana amuhe, nge te ya, kaa tye kungoye: Pa nguka eha, ongoye nou na okuza po nokuya koshipundi shokooha wa si ohoni.”

Onkee ano Jesus ota gandja omayele ta ti: “Ihe ngele wi ithanenwa ko, kuutumba koshipundi shokooha, naangoka e ku ithana, nge te ya mo, ote ku lombwele: Kuume kandje, huma ko kombanda, ngoye nowa simanekwa montaneho yaayehe ye li pamwe nangoye poshililo.” Lwahugunina Jesus ota ti: ‘Oshoka shaa ngoka ti inenepeke, ota fupipikwa, naangoka ti ifupipike, ota nenepekwa.’

Konima yaashino, Jesus ota popi nOmufarisayi ngoka e mu hiya nota hokolola nkene omuntu ta vulu okugandja iikulya ku na shili oshilonga momeho gaKalunga. “Ngele to paka po omwiha nenge uulalelo, ino ithana ookuume koye nenge aamwanyoko nenge aakweni nenge aashiinda yoye aayamba, yaa ye ku ithane wo, ngoye u futwe ngaaka. Ihe ngele to ningi oshituthi, ithana oohepele niilema niitiningili naaposi, ngoye e to ningi omunelago, oshoka mbono kaye na sho taye ku pe.”

Okuhiya aakwanaluhepo kokulya kwa tya ngaaka, otashi ke etela nakuyahiya enyanyu, oshoka ngaashi Jesus ta yelithile ngoka e mu hiya: “[Oto] ka futilwa meyumuko lyaayuuki.” Okuhokolola kwaJesus okulya huka ku na oshilonga otaku dhiladhilitha omuyenda omukwawo okulya kwoludhi lulwe. “Omunelago [oongoka] ta ka lya oshikwiila [muukwaniilwa waKalunga, KB],” omuyenda nguka osho ta ti. Ihe haayehe ya pandula sha gwana etegameno ndyoka lyelago, ngaashi Jesus ta tsikile oku shi ulika mokupitila meudhi.

“Omulumentu gumwe okwa paka po uulalelo uunene nokwi ithanene mo oyendji. . . . Oye okwa tumu ko omumati gwe, a ka lombwele aaithanwa: Ileni, oshoka ayihe ya longekeka nokuli. Oyo ayehe noya tameke okutinda komukalo gumwe. Gwotango okwa ti kuye: Ngame ndi ilandele epya, ndi na okuya ko, ndi li tale, tandi ku galikana, popila ndje. Nomukwawo okwa ti: Ngame nda landa oonani dhoondjoko ntano, ondi na oku ke dhi yelekela, tandi ku galikana, popila ndje. Nomukwawo ishewe okwa ti: Ngame nda hokana omukiintu, kandi wapa okuya ko.”

Omaipopilo kage shi tuu gaa fele! Pandjigilile epya nenge iimuna ohayi talika manga inaayi landwa, omolwashono inaashi endelela shili oku ke yi tala konima yethimbo. Sha faathana, ondjokana yomuntu kayi na oku mu imba okutaamba ko ehiyo lya tya ngaaka lya simana. Onkee ano sho omuwa tu uvu omaipopilo ngaka, ota geye nota lombwele omupiya gwe ta ti:

“Endelela, inda noondjila nomapola goshilando, ngu u ka ete mo oohepele niilema naaposi niitiningili. Omumati nokwa ti: Omuwa, nda gwanitha oohapu dhoye nonatango oku na eha. Omuwa okwa lombwele omumati: Inda noondjila nomankolo, ngu u ya ithane shili okuya mo, egumbo lyandje li udhe, . . . kaku na nando gumwe maalumentu mbeyaka yi ithanenwe ta makele oshituthi shandje.”

Onkalo yini mbela tayi hokololwa keudhi? Ano, “omuwa,” ngoka ta hiya aantu kokulya, ota thaneke Jehova Kalunga; “omumati” ngoka ta hiya, oJesus Kristus; ‘nuulalelo uunene’ owo oompito dhokuya mUukwaniilwa womegulu.

Mboka ya li ya hiywa tango okuya mUukwaniilwa, oyo unene tuu aawiliki yelongelokalunga lyOshijuda yopethimbo lyaJesus. Ihe ehiyo oye li ekelehi. Onkee ano, unene tuu okuza pOpentekoste yomo 33 E.N., ehiyo etiyali lya hiya aadhinwa naashona yomoshigwana shaJuda. Ihe aantu inayi inyenga sha gwana okuudhitha omahala 144 000 mUukwaniilwa waKalunga womegulu. Onkee ano mo 36 E.N., konima yoomvula ndatu netata, ehiyo etitatu nolyo lyahugunina lya hiya mboka inaaya pita etanda nokaaye shi Aajuda, negongelo lyaamboka olya tsikile sigo omethimbo lyetu. Lukas 14:1-24.

▪ Oshiilongomwa shini Jesus ta longo kombinga yeifupipiko?

▪ Omuhiyi gwaayenda ota vulu ngiini okugandja okulya hoka ku na oshilonga momeho gaKalunga, nomolwashike tashi ke mu etela elago?

▪ Omolwashike omaipopilo gaayenda mboka ya hiywa ge li gaa fele?

▪ Eudhi lyaJesus kombinga ‘yuulalelo uunene’ otali thaneke shike?