Ontopolwa 48

Ta zi megumbo lyaJairus e ta talele po ishewe Nasaret

ESIKU olya li limwe lyomaipyakidhilo kuJesus—olweendo lwomefuta okuza kuDekapolis, ealudho lyomukiintu e niwe keziyo lyombinzi neyumudho lyomwanakadhona gwaJairus. Ihe esiku inali pwa ko natango. Osha yela kutya sho Jesus ta zi megumbo lyaJairus, aalumentu yaali aaposi otaye mu landula notayi igidha taya ti: “Omuna gwaDavid, tu silohenda!”

Mokwiithana Jesus “Omuna gwaDavid,” aalumentu mbaka otayu ulike kutya oyi itaala Jesus e li omuthigululi gwonkwaniilwapundi yaDavid noye ano Messias omuuvanekwa. Ihe Jesus okwa fa kee na ko nasha nokwiigidha kwawo ya kwathelwe, tashi vulika ta tala po eidhidhimiko lyawo. Ihe aalumentu itaya tyololoka. Otaya landula Jesus sigo oompoka a kala, naashono ta yi megumbo, otaye mu landula meni.

Moka Jesus ote ya pula ta ti: “One omwi itaale tuu, ndi na oonkondo oku shi ninga?”

“Eeno, Omuwa, otwi itaale,” yo taya yamukula yu udha einekelo.

Onkee ano Jesus ota gumu omeho gawo nota ti: “Mu ningilwe shi thike peitaalo lyeni.” Mbalambala otaya vulu okumona ko! Opo nduno Jesus ote ya kumagidha a mana mo ta ti: “Taleni, shino shaa uvike nando komuntu.” Ihe molwenyanyu enene, inaya vulika kelombwelo lyaJesus notaye mu hokolola shaa mpono momukunda aguhe.

Manga owala aalumentu mbaka taya yi, aantu otaye eta omulumentu omunampwidhuli kuye ngoka a kuthwa ewi lye kompwidhuli. Jesus ota tidha mo ompwidhuli, nanziya omulumentu ota tameke okupopya. Engathithi lyaantu olya kuminwa iikumithalonga mbika notali ti: “Oshinima sha tya ngeyi inashi monika nando olumwe muIsrael.”

Aafarisayi opo wo ya adhika. Yo itaya vulu okwiikala iikumithalonga mbika, ihe molwokwaaheneitaalo kwawo kwuukolokoshi yo otaye endulula elundilo lyawo li na ko nasha nonzo yiilonga yoonkondo yaJesus taya ti: “Oompwidhuli ohe dhi tidhitha mo komukuluntu gwoompwidhuli.”

Okathimbo okafupi konima yiiningwanima mbika, Jesus ota galukile koshilando shaandjawo Nasaret, oshikando shika oku li pamwe naalongwa ye. Nale, pwa pita konyala omvula yimwe, okwa talele po osinagoga nokwa longele aantu moka. Nonando aantu petameko oya li ya kuminwa oohapu dhe oombwanawa, konima yethimbo oya geyithwa kelongo lye noya kambadhala oku mu dhipaga. Ngashingeyi Jesus, molwohenda ye, ota kambadhala ishewe okukwathela mboka ya li nale aashiinda she.

Nonando aantu komahala galwe ohaya mbombolokele kuJesus, osha yela kutya mpaka yo itaye shi ningi. Onkee ano ta yi mEsabati kosinagoga e ke ya longe. Oyendji mboka taye mu pulakene, oya kumwa. “Oondunge ndhoka e dhi na niilonga yoonkondo e yi na, oyapeni?” yo taya pula. “Nguno ke shi omuna gwomutungi? Yina ke shi ti ithanwa Maria, naamwayina haamboka Jakob naJosef naSimon naJudas? Naamwayina aakiintu ayehe haamboka putse mpaka? Ihe oye ayihe mbika okwe yi adha peni?”

‘Jesus oye omulumentu gwaampaka, ngaashi owala tse,’ osho taya ti. ‘Otwe mu mona pokuputuka kwe, naakwanezimo ye otu ya shi. Ota vulu ngiini okukala oye Messias?’ Onkee ano nonando opu na uunzapo oundji—uunongo we oundji niikumithalonga ye—yo otaye mu ekelehi. Molwashoka oye mu shi nawa, nokuli naakwanezimo ye oye mu yemateke, nosha ningitha Jesus e ye pehulithodhiladhilo ta ti: “Omuprofeti iha dhinwa palwe, omoshilando tuu shaandjawo nomaakwawo nomegumbo lye.”

Dhoshili, Jesus okwa kuminwa okwaaheneitaalo kwawo. Onkee ano ye ina longa ko nando iikumithalonga yasha nkoka, kakele kokutenteka aavu yamwe iikaha noku ya aludha. Mateus 9:27-34; 13:54-58; Markus 6:1-6; Jesaja 9:6.

▪ Mokwiithana Jesus e li “Omuna gwaDavid,” aalumentu aaposi otayu ulike kutya oyi itaala shike?

▪ Aafarisayi otaya ti kutya iikumithalonga yaJesus otayi zi monzo yini?

▪ Omolwashike okushuna kwaJesus kuNasaret a ka kwathele mbono yamo oko euliko lyohenda?

▪ Jesus ota taambwa ko ngiini muNasaret, nomolwashike?