Ontopolwa 123

“Tala, omuntu!”

PILATUS a kumithwa keihumbato lyaJesus noku wete kutya ke na oondjo, ota kambadhala okukonga omukalo gulwe oku mu mangulula. “One mu na omukalo, handi mú mangululile omukwatwa gumwe pomasiku gOpaasa,” osho ta lombwele omangathithi gaantu.

Barabbas, omudhipagi a tseyika nawa, oku li wo mondholongo, onkee ano Pilatus ta pula ta ti: “Oguni po mwa hala, ndi mú mu mangululile, Barabbas nenge Jesus, haku tiwa Kristus?”

Omolwethininiko lyaasaseri aakuluntu mboka taye ya tsu omaminimini, aantu oya pula opo Barabbas a mangululwe ihe Jesus oku na okudhipagwa. Pilatus ita tyololoka nota yamukula nokupula natango ta ti: “Oguni po mwaambaka yaali mwa hala, ndi mú mu mangululile?”

“Barabbas,” osho tayi igidha.

“Jesus nguka, haku tiwa Kristus, otandi mu ningi ngiini?” Pilatus ta pula a nika oluhodhi.

Otaya yamukula ya dhiginina neigidho tali thitike omakutsi taya ti: “Na alelwe [koshiti]!” “Mu alela, mu alela [koshiti]!”—Yelekanitha NW.

Mokutseya kutya otaya pula omulumentu kee na oondjo a dhipagwe, Pilatus ote yi indile ta ti: “Uuwinayi washike a ningi ano? Ngame inaandi mona oondjo dhokusa muye. Ano nge nde mu dhengitha, otandi mu etha.”

Nonando ta ningi oonkambadhala, engathithi lyaantu lya geya noonkondo, mboka taya hongakanithwa kaawiliki yelongelokalunga lyawo, otali tsikile nokwiigidha tali ti: “Na alelwe [koshiti, NW]!” Engathithi lyaantu ndyoka tali hongaidhwa kaasaseri, oli na ehalo okutilahi ombinzi. Dhiladhila owala kutya otashi vulika yamwe yomuyo, omasiku gatano ga piti, ya li mokati kaamboka ya li taya hambelele Jesus e li Omukwaniilwa muJerusalem! Ihe ethimbo alihe ndika, aalongwa yaJesus oya kala ya mwena nando opo ye li, noya kala inaaya hala okumonika.

Pilatus oku wete kutya omaindilo ge itaga kwatha sha, ihe pehala lyaashono otapu tukuluka owala ombuyagano nota kutha omeya e ta yogo iikaha ye montaneho yengathithi lyaantu e ta ti: “Ongame kandi na ondjo yombinzi yomulumentu nguka. Italeni ne yene.” Opo nduno aantu otaya yamukula taya ti: “Ombinzi ye nayi ye kombanda yetu nokombanda yaana yetu!”

Onkee ano Pilatus ote ya mangululile Barabbas—opo a tse kumwe naashoka taya pula—nota kambadhala okumbilipaleka engathithi lyaantu, pehala lyokuninga shoka e shi kutya oshi li mondjila. Ota kutha Jesus nota gandja elombwelo kutya oonguwo dhe nadhi hulwe mo e ta nakagulwa. Ndika kalya li edhengo nongola ndyoka li shiwike. The Journal of the American Medical Association otali hokolola omukalo gwaRoma gwokunakagula nongola tali ti:

“Oshilongitho shoka hashi longithwa aluhe osha li ongola ofupi (oshidhengitho) yi na oonyemba dhoshipa dha pandwa dhi vulathane muule, moka mwa mangelwa uutanga woshiyela nenge iintimbu yomasipa gonzi ga honga. . . . Uuna aakwiita Aaroma taya dhenge nokudhengulula noonkondo dhawo adhihe pombunda yomwaalulwa, uutanga mboka wa longwa moshiyela ohau ningi po omadhidhimika ga ya muule, noonyemba dhoshipa nomasipa gonzi ohayi tete oshipa noontumba dhokohi yoshipa. Sho okudhenga taku indjipala, iilalo mbyoka ya shatagulwa ohayi yi nduno muule, kohi yomithipa sigo oontumba tadhi ningi oondjandjo ndhoka tadhi kala tadhi ziya ombinzi.”

Konima yokudhenga huka taku ehameke noonkondo, Jesus ota falwa mongulumbala yomupangeli naakwiita ayehe otaya gongelwa. Moka aakwiita otaye mu sheke natango moku mu tungila oshishani shomakwega notaye shi thindile komutse gwe. Otaye mu pe oshihenguti moshikaha she shokolulyo notaye mu zaleke onguwo ontiligane; ya fa ndjoka hayi zalwa kaakwaniilwa. Opo nduno otaye mu nyenkele taya ti: “U kundwe, omukwaniilwa gwAajuda!” Otaye mu hiyile wo omayeye notaye mu dhenge moshipala. Otaya kutha oshihenguti sha kola moshikaha she notaye shi longitha oku mu dhenga komutse notaya thindile nokuli muule moshipa shomutse gwe omakwega ga honga ‘goshishani’ she sho ku mu shundula.

Egundjilo lyaJesus endhindhilikwedhi nosho wo oonkondo dhe nonando ota ningwa nayi otali kumitha Pilatus noonkondo e tali mu inyengitha a ninge onkambadhala yilwe oku mu mangulula. “Andiya, ndi mú mu etele pondje mpaka, opo mu tseye, kandi wete ko oondjo muye nando okashona,” osho ta lombwele omangathithi gaantu. Otashi vulika ta dhiladhila kutya omitima dhawo otadhi ka nengena ngele taya mono onkalo yokuhepekwa yaJesus. Manga Jesus a thikama komeho gongundu yaantu kaaye na omaiyuvo, a zalekwa oshishani shomakwega komutse nokwa dhiingilwa onguwo ontiligane noshipala she tashi ziya ombinzi sha hililwa pombanda kuuwehame, Pilatus ota ti: “Tala, omuntu!”

Nonando okwa dhengwa shinyanyalitha, omuntu a dhenga mbanda mondjokonona ayihe ota thikama mpaka, dhoshili, omuntu omunenenene ngoka a li ko nale! Eeno, okugundjila nokumwena kwaJesus otaku ulike uunene we mboka Pilatus e na nokuli okuzimina, molwashoka osha yela kutya oohapu dhaPilatus otadhi ulike kutya ote mu simaneke noku mu uvitile wo ohenda. Johannes 18:39–19:5; Mateus 27:15-17, 20-30; Markus 15:6-19; Lukas 23:18-25.

▪ Okomukalo guni Pilatus ta kambadhala okumangulula Jesus?

▪ Pilatus ota kambadhala ngiini okwiikutha mo moshinakugwanithwa she?

▪ Okunakagulwa okwa kwatela mo shike?

▪ Jesus ota shekwa ngiini konima sho a nakagulwa?

▪ Onkambadhala yini natango Pilatus ta ningi okumangulula Jesus?