Ontopolwa 67

Taya nyengwa oku mu kwata

MANGA Oshituthi shOmatsali tashi dhanwa natango, aawiliki yelongelokalunga otaya tumu aamati ya ka kwate Jesus. Ita kambadhala okuholama. Mepingathano naashono, Jesus ota tsikile nokulonga montaneho, ta ti: “Okathimbo okafupi natango ondi li pune notandi yi ihe kunguka a tuma ndje. One tamu ka kala ihe nokukonga ndje, ne itamu mono ndje; naankoka nda kala, kamu wapa okuya ko.”

Aajuda kaye uvite ko nonkee ano taya pulathana taya ti: “Nguno ota yi peni ano, sho itatu mu mono? Ota yi andola kumbeyaka ye li po ya halakana mokati kAagreka, a ka longe Aagreka? Oohapu ndhoka odha tya ngiini sho ta ti: Otamu kala ihe nokukonga ndje, ne itamu mono ndje, na: Oonkoka nda kala, kamu wapa okuya ko?” Dhoshili, Jesus ota popi eso lye ndyoka tali hedha popepi nosho wo okuyumukila omwenyo gwomegulu kwe, moka aatondi ye itaaya vulu oku mu landula.

Esiku etiheyali nolyo lyahugunina lyoshituthi olya thika. Ongula kehe yoshituthi, omusaseri okwa li a tilehi omeya, ngoka a kutha medhiya lyaSiloa, opo ga kungulukile kekota lyoaltari. Otashi vulika Jesus ta dhimbulukitha aantu omulandulwakalo nguka gwokudhana oshituthi gwesiku kehe, sho ti igidha ta ti: “Ngele ku na ngoka a si enota, ne ye kungame, ye na nwe. Oongoka i itaala ndje, ngaashi oraamata tayi ti, meni lye otamu ka tondoka mo omilonga dhomeya omanamwenyo.”

Muushili wo wene, Jesus mpaka ota popi kombinga yiilanduliko iikumithi uuna ombepo ondjapuki tayi ka tililwa aantu. Omvula tayi ka landula ko etililo ndika lyombepo ondjapuki olya li tali ka ningwa pOpentekoste. Mpoka, omilonga dhomeya omanamwenyo otadhi ka kala tadhi kunguluka sho aalongwa 120 taya tameke okuyakula aantu. Ihe sigo opethimbo ndyono, kapwa li pu na ombepo mondunge kutya kapu na nando ogumwe gwomaalongwa yaKristus a gwayekwa nombepo ondjapuki noku na eithano lyomwenyo gwomegulu.

Mokwiinyengithwa kelongo lyaJesus, yamwe oya tameke taya ti: “Nguka oshili omuprofeti ngwiyaka,” osha yela kutya otaya popi omuprofeti omunene e vule Moses ngoka u uvanekwa te ya. Yalwe otaya ti: “Nguka oKristus.” Ihe yalwe otaya ludhike taya ti: “Kristus ota zi tuu kuGalilea? Oraamata itayi ti, Kristus ota zi moluvalo lwaDavid nomoshilando oshishona shaBetlehem, nkoka kwa li David?”

Ano etopoko otali tameke mokati kengathithi lyaantu. Yamwe oya hala Jesus a kwatwe, ihe kapu na ngoka te mu kwata. Sho aamati taya galuka kaaye na Jesus, aasaseri aakuluntu nAafarisayi otaya pula taya ti: “Oshike ano inamu mu eta?”

“Kaku na omuntu noshitonale a popya, ongomulumentu nguka ta popi,” aamati osho ya yamukula.

Aawiliki yelongelokalunga oya geya notaye ya sheke, taye ya lundile notaye ya tuku. Otaya sheke taya ti: “Nane wo omwa hongololwa? Oku na tuu nando gumwe gwomaakuluntu e mu itaala, nenge gumwe gwomaafarisayi? Ihe oshigwana shono inaashi tseya ompango, osha thingwa.”

Opo nduno Nikodemus, Omufarisayi nomupangeli gwAajuda (sha hala okutya, oshilyo shOsanhedrin), ota popile Jesus kee na uumbanda. Otashi vulika to dhimbulukwa kutya oomvula mbali netata dha piti, Nikodemus okwi ile kuJesus uusiku nokwa popile kutya okwe mu itaala. Ngashingeyi Nikodemus ota ti: “Ompango yetu otayi pe tuu omuntu uusama, manga inaa pulakenwa, notu uvika shoka ta ningi?”

Shika otashi geyitha nokuli unene Aafarisayi sho gumwe gwomuyo ta popile Jesus. “Nangoye wo ogwomuGalilea nani?” yo taya pula taya sheke. “Konakona u tale, muGalilea ihamu zi nando omuprofeti.”

Nonando Omanyolo itaga popi shu ukilila kutya omuprofeti ota ka za muGalilea, go otagu ulike kutya Kristus ota ka za moka, taga ti kutya “uuyelele uunene” otau ka monika moshitopolwa moka. Niishewe, Jesus okwa valelwa muBetlehem, nokwa li oluvalo lwaDavid. Nonando Aafarisayi shika otape ya ye shi shi, otashi vulika oyo ya taandeleke edhiladhilo lya puka ndyoka aantu ye nine Jesus. Johannes 7:32-52; Jesaja 8:23; 9:1; Mateus 4:13-17.

▪ Oshike hashi ningwa ongula kehe yoshituthi, nongiini tashi vulika Jesus tu ukitha eitulomo kwaashino?

▪ Omolwashike aamati taya nyengwa okukwata Jesus, nongiini aawiliki yelongelokalunga tayi inyenge kwaashono?

▪ Nikodemus oye lye, noku na iikala yi li ngiini kombinga yaJesus, nAafarisayi ooyakwawo oye li naye ngiini?

▪ Uunzapo uni u li po kutya Kristus oku na okukala gumwe ngoka a za muGalilea?