Ontopolwa 16

Uulaadhi molwokulongela Jehova

AAMWAYINA yaJesus aamati—oyanamati yalwe yaMaria—oyo Jakob, Josef, Simon naJudas. Manga mbaka ayehe inaaya ya pamwe naJesus naalongwa ye kuKapernaum, oshilando shi li popepi nEfuta lyaGalilea, otashi vulika taya yi manga kaandjawo muNasaret opo yaandjawo ya vule oku ya longelela iinima mbyoka taya ka pumbwa.

Ihe omolwashike mbela Jesus ta yi kuKapernaum pehala lyokutsikila nuukalele we muKaana, muNasaret nenge mehala lilwe li ili mIikulundundu yaGalilea? Tango, Kapernaum osho ehala lya tongomana unene nosha yela kutya osho oshilando oshinene. Oyendji yomaalongwa yaJesus aape oya kala wo muKapernaum nenge popepi, onkee ano inaya pumbwa okuthiga po omagumbo gawo ya ka dheulwe kuye.

Pethimbo lyokukala kwe muKapernaum, Jesus ota longo iilonga iikumithi, ngaashi e shi ulikile oomwedhi dhontumba dha ka landula ko. Ihe nziyanziya Jesus naaendi pamwe naye oye li ishewe mela lyondjila. Osho oshitemamvula, noye li mela lyondjila yu uka kuJerusalem oku ka kala pOpaasa yomo 30 E.N. Manga ye li hoka, aalongwa ye otaya mono sha shi na ko nasha naJesus shoka tashi vulika inaaye shi mona nale.

PaMpango yaKalunga, Aaisrael oya pulwa okuninga omayambo giinamwenyo. Onkee ano opo shi kale oshipu kuyo, aahalithi yomuJerusalem otaya landitha iimuna nenge uudhila omolwelalakano ndyoka. Ihe otaye yi landithile meni lyotempeli, notaya nyokoma aantu moku ya pula oshindji noonkondo.

A geya noonkondo, Jesus ota ningi ongola yepando lyongodhi nota tidha mo aahalithi. Ota tilehi iimaliwa yaalandakanithi niitaafula yawo ote yi undulile pevi. “Tuteni mo mbino,” osho ta lombwele mboka taya landitha oonguti. “Ongulu yaTate inamu yi ninga oshilandelo.”

Sho aalongwa yaJesus taye shi mono, otaya dhimbulukwa ehunganeko tali popi kombinga yOmwana gwaKalunga: “Uulaadhi omolwongulu yoye otau li ndje.” Ihe Aajuda otaya pula: “Endhindhiliko olini po to tu ulukile, sho to longo mbika?” Jesus ota yamukula: “Hanaguleni po otempeli ndjika, notandi yi tungulula omasiku gatatu.”

Aajuda otaya dhiladhila kutya Jesus ota popi kombinga yotempeli yo yeneyene, nomolwashono taya pula: “Otempeli ndjika ya tungwa oomvula omilongo ne nahamano, ongoye noto yi tungu omasiku gatatu?” Ihe Jesus ota popi otempeli yolutu lwe. Nokonima yoomvula ndatu, sho a yumuka kuusi, aalongwa ye oya dhimbulukwa oohapu ndhika dhe. Johannes 2:12-22; Mateus 13:55; Lukas 4:23.

▪ Okomahala geni Jesus ta yi, konima yohango yomuKaana?

▪ Omolwashike Jesus a geya, noshike ta ningi?

▪ Aalongwa yaJesus otaya dhimbulukwa shike sho ye wete iilonga ye?

▪ Jesus ota ti shike kombinga ‘yotempeli ndjika,’ notashi ti shike?