Ontopolwa 114

Uulalelo wEdhimbuluko

SHO Jesus a yogo oompadhi dhaayapostoli ye, ota totha menyolo lyo mEpsalmi 41:10 ta ti: “Oongoka ta li oshikwiila pamwe nangame, oye okwa yeluthila ndje oshithi she.” Opo nduno ota tukuluka mombepo ye e ta yelitha ta ti: “[Gumwe] gwomune ota gwaaleke ndje.”

Aayapostoli otaya tameke okunika oluhodhi e taya lombwele Jesus ya landulathana taya ti: “Hangame, ndishi?” Nokuli naJudas Iskariot ota pula. Johannes, ngoka a kuutumba pooha naJesus koshililo, ote egamene pontulo yaJesus e ta pula ta ti: “Omuwa, olye ngo?”

“Gumwe gwomune omulongo nayaali, oongoka [te] elele moshiyaha pamwe nangame,” Jesus ta yamukula. “Eeno, Omuna gwOmuntu ota yi ngashika a shangwa, ihe yaye omuntu ngoka ta gwaaleke Omuna gwOmuntu. Omuntu ngoka andola kwa li ina valwa, ando she mu opalela ihwepo.” Konima yaashika, Satana ota yi ishewe muJudas, e ta mono uupitilo momutima gwe, omutima ngoka gwa ningi omwiinayi. Konima yethimbo ongulohi oyo tuu ndjoka Jesus ota luku Judas she eleka “omuna gwekano.”

Ngashingeyi Jesus ota lombwele Judas ta ti: “Shono to shi ningi, shi ninga nziya.” Nando gumwe gwomaayapostoli yalwe u uvite ko shoka Jesus a hala okutya. Yamwe otaya dhiladhila kutya molwashoka Judas oye e na okampunda kiimaliwa, Jesus ote mu lombwele ta ti: “Ka lande mbyoka twe yi pumbwa moshituthi,” nenge a ye a ka gandje sha koohepele.

Konima sho Judas a zi po, Jesus ota dhiki po edhano nenge edhimbuluko epe thiluthilu, pamwe naayapostoli ye aadhiginini. Ota kutha oshikwiila, ta hambelele, te shi pambula note shi ya pe e ta ti: “Kwateni, lyeni.” Ota yelitha ta ti: “Shino olutu lwandje talu gandjwa molweni, shi ningeni okudhimbulukwa ndje.”

Sho kehe gumwe a li ko koshikwiila, Jesus ota kutha oshitenga shomaviinu, shoka sha yela kutya osho oshitenga oshitine shoka hashi longithwa pOpaasa. Ota galikana wo molwasho, te shi ya pe, te ya pula ya nwe mo e ta ti: “Oshitenga shika osho ehangano ndyoka epe omombinzi yandje tayi tilwahi molweni.”

Dhoshili, shika osho edhimbuluko lyeso lyaJesus. Oli na okudhanwa omvula kehe mo 14 Nisan, ngaashi Jesus ta ti, oku mu dhimbulukwa. Otali ka dhimbulukitha mboka taye li dhana shoka Jesus naHe gwomegulu ya ningi okuhupitha aantu mokupangulilwa eso. KAajuda mboka taya ningi aalanduli yaKristus, edhano ndika otali ka pingena po Opaasa.

Ehangano epe, ndyoka tali kolekwa kokutika kwombinzi yaJesus, otali pingene po ehangano lyOmpango ekulu. Jesus Kristus oye omupokati pokati koongundu ndhika mbali—kombinga yimwe, oJehova Kalunga, nokombinga onkwawo, Aakriste aavalwa pambepo ye li 144 000. Kakele kedhiminopo lyoondjo, otapu ka kala wo oshigwana shomegulu shaakwaniilwa naasaseri omolwehangano ndika. Mateus 26:21-29; Markus 14:18-25; Lukas 22:19-23; Johannes 13:18-30; 17:12; 1 Aakorinto 5:7.

▪ Omehunganeko lyOmbimbeli lini Jesus ta totha shi na ko nasha nomweendi pamwe naye, note shi yelitha ngiini?

▪ Omolwashike aayapostoli ya nika oluhodhi noonkondo noshike kehe gumwe gwomuyo ta pula?

▪ Jesus ota lombwele Judas a ninge shike, ihe aayapostoli yalwe omalombwelo ngaka oye gu uvite ko ngiini?

▪ Sho Judas a zi po, oshituthi shini Jesus ta dhiki po, nelalakano lyasho olyashike?

▪ Oolye ya kwatelwa moongundu mbali dhehangano epe, noshike sha tsakanithwa kehangano?