Ontopolwa 117

Uuwehame uunene moshikunino

SHO Jesus ta mana okugalikana, ye naayapostoli ye aadhiginini 11 otayi imbile Jehova oondjimbo dhehambelelo. Opo nduno otaya londoloka taya zi mondjugo yopombanda, taye ende momilema dhuusiku wa talala nomondjila yokushuna kuBetania e taya taaguluka esilu lyaKidron. Ihe otaya vululukwa po manga mondjila pehala li holike, oshikunino shaGetsemane. Shika oshi li kondundu yOomono nenge popepi nayo. Jesus opo ha tsakanene olundji naayapostoli ye mpaka pokati komiti dholumono.

Jesus ota thigi po yahetatu yomaayapostoli—tashi vulika popepi nosheelo shoshikunino—note ya lombwele ta ti: “Kamutumbeni mpaka, manga tandi yi nkwiyaka, ndi [ka] galikane.” Opo nduno ota kutha yalwe yatatu—Petrus, Jakob naJohannes—notaya yi mokati koshikunino. Jesus okwa nika oluhodhi nokwa nika uuthigwa uunene. “Omwenyo gwandje ogwa sa oluhodhi sigo okusa,” osho te ya lombwele. “Kaleni mpaka, mu tonate pamwe nangame.”

Jesus ota hedha ko kashona, ota tsu oshipala she pevi e ta galikana a mana mo ta ti: “Tate, ngele tashi wapa, oshitenga shika nashi pitilile ndje po; ihe hangashika ngame nda hala, aawe, ongaashi ngoye.” Okwa hala okutya shike mbela? Omolwashike mbela a “sa oluhodhi sigo okusa”? Okwa shuna monima mbela netokolo lye lyokusa nosho wo okugandja iikulila?

Nandonando! Jesus ita pula a hupithwe meso. Nokuli edhiladhilo lyokuyanda eso lyopayambo, ngaashi Petrus a gandjele edhiladhilo oshikando shimwe, olyo etondithi kuye. Mepingathano naashino, oku li muuwehame uunene molwashoka okwa tila omukalo gweso ndyoka masiku ta ka sa—e li ongomulongi gwomuyonena a dhinika—notagu ka shekitha edhina lyaHe. Ngashingeyi oku uvite ko kutya meni lyoowili dhontumba ota ka alelwa koshiti e li ngaashi omukolokoshi omunenenene—omushekikalunga! Shika osho tashi mu nikitha uuthigwa uunene.

Konima yokugalikana ethimbo ele, Jesus ota galuka nota adha aayapostoli yatatu ya kotha. Ota lombwele Petrus ta ti: “Ano osho mwa nyengwa okutonata okathimbo kamwe pamwe nangame! Tonateni, ne mu galikane, mwaa pwile momamakelo.” Ihe mokuzimina kutya oya li muudhigu nonokutya okwa toka noonkondo ota ti: “Ombepo oyo ya hala, ihe onyama onkundi.”

Ngashingeyi Jesus ota shuna ko oshikando oshitiyali noti indile opo Kalunga a pitililithe po “oshitenga shika” puye, sha hala okutya, oshitopolwa shoka Jehova a pa Jesus, nenge ehalo lye shi na ko nasha naye. Sho ta galuka, ota adha ishewe mboka yatatu ya kotha omanga ya li ye na okukala taya galikana opo yaa pwile momamakelo. Sho Jesus ta popi nayo, kaye shi shoka ye na oku mu yamukula.

Lwahugunina, Jesus ota zi po puyo oshikando oshititatu, konyala oshikako shi thike pedhaadhigo lyemanya nota tsu oongolo e ta galikana newi lyopombanda nokulila ta ti: “Tate, ngele wa hala, kutha ndje oshitenga shika.” Jesus oku uvite uuwehame uunene noonkondo molwondhino ndjoka eso lye a fa omulongi gwomuyonena tali ke etela edhina lyaHe. Okupewa ondjo a fa omushekikalunga—omuntu ngoka ta thingi Kalunga—ita vulu oku ku idhidhimikila!

Nonando ongaaka, Jesus ota tsikile ta galikana ta ti: “Haashono nde shi hala, aawe, ooshono we shi hala.” Jesus oti igandja nevuliko kehalo lyaKalunga. Pethimbo opo tuu mpono, omuyengeli ote mu holokele okuza megulu note mu koleke noohapu dhontumba tadhi mu ladhipike. Otashi vulika omuyengeli ta lombwele Jesus kutya ota kala a hokiwa kuHe.

Jesus ke na tuu oshinakugwanithwa oshidhigu komapepe ge! Omwenyo gwe gwaaluhe nosho wo gwaantu ayehe ogu li moshiponga. Uuwehame wopamaiyuvo owo uunenenene. Onkee ano Jesus ota tsikile ta galikana neitulomo enene noonkondo, nomazigudhe ge otaga ndondele pevi ga fa omata gombinzi. The Journal of the American Medical Association otayi ti: “Nonando omazigudhe gombinzi ogo oshinima sha pumba noonkondo, go . . . otaga vulu okumonika uuna omuntu e uvite nayi unene pamaiyuvo.”

Konima yaashono, Jesus ota galukile oshikando oshititatu paayapostoli ye note ya adha ishewe ya kotha. Oya vulwa kokunika oluhodhi kwolela. “Otamu kotha notamu vululukwa!” osho ti igidha. “Sha gwana ihe. Okathimbo ke ya; tala, Omuna gwOmuntu ota gandjwa miikaha yaalunde. Thikameni, tu yeni; tala oongoka ta gwaaleke ndje, oku li popepi.”

Manga ta popi natango, Judas Iskariot ote ya te ende pamwe nengathithi lyaantu enene, ya humbata oonyeka noolamba niikondjitho. Mateus 26:30, 36-47; 16:21-23; Markus 14:26, 32-43; Lukas 22:39-47; Johannes 18:1-3; Aaheberi 5:7.

▪ Konima yokuza mondjugo yopombanda, openi Jesus ta fala aayapostoli ye, noshike ta ningi hoka?

▪ Manga Jesus ta galikana, aayapostoli otaya ningi shike?

▪ Omolwashike Jesus e li muuwehame uunene, nota pula Kalunga shike?

▪ Oshike tashi ulikwa komazigudhe gaJesus ngoka taga ningi ga fa omata gombinzi?