Ontopolwa 125

Uuwehame we koshiti

AAYUGI yaali otaya pitithwa mo pamwe naJesus ya ka dhipagwe. Kaku shi kokule noshilando, osheendo otashi ya pehala hali ithanwa Golgata, nenge Oshala sholukwe lwomutse.

Oonkwatwa otadhi hulwa oonguwo dhadho. Opo nduno otadhi pewa omaviinu ga vongakanithwa nomirha. Osha yela kutya oga longekidhwa kaakiintu yokuJerusalem, nAaroma itayi indike mboka taya alelwa komuti oshingangamithi shokusitha omaiyuvo guuwehame. Ihe sho Jesus te shi lolo, ota tindi oku shi nwa. Omolwashike? Osha yela kutya okwa hala okukala e na omadhiladhilo ge li nawa pethimbo lyemakelo ndika enene lyeitaalo lye.

Ngashingeyi Jesus ote endjelelekwa koshiti niikaha ye ya yelulwa kombanda yomutse gwe. Opo nduno aakwiita otaya mbambalele oomboha oonene miikaha ye nomoompadhi dhe. Ota ligalala kuuwehame sho oomboha tadhi ulula moontumba dhe nomomithipa dhe. Uuwehame otau mu hepeke sho omuti tagu ukililithwa, oshoka iilalo yoomboha otayi tuuka omolwondjundo yolutu. Peha lyoku ya tilitha, Jesus ota galikanene aakwiita Aaroma ta ti: “Tate, ya dhimina po, oshoka kaa shiwo shoka taa longo.”

Pilatus ota mbambalelitha komuti endhindhiliko ndyoka tali ti: “Jesus Omunasaret, omukwaniilwa gwAajuda.” Osha yela kutya, shika ite shi nyola owala molwashoka a simaneka Jesus ihe omolwashoka e tonde aasaseri Aajuda omolwoku mu thiminika a pangulile Jesus eso. Opo ayehe ya vule okulesha endhindhiliko, Pilatus okwe li nyolitha momalaka gatatu—mOshiheberi, mOshilatina shopambelewa nomOshigreka shoka hashi longithwa apuhe.

Aasaseri aakuluntu mwa kwatelwa Kaifas naHannas oya teka omukumo. Etseyithompango ndika lyu uka otali yono esindano lyawo. Onkee ano taya tindi taya ti: “Ino nyola: Omukwaniilwa gwAajuda, ihe u tye, oye a tile: Ongame omukwaniilwa gwAajuda.” Pilatus ngoka e uvite nale nayi sho a longithwa kaasaseri a ninge shoka ya hala, ota yamukula nondhino a tokola toko ta ti: “Shono nde shi nyola, onde shi nyola.”

Ngashingeyi aasaseri pamwe nengathithi enene lyaantu otaya gongala pehala lyokudhipagela, naasaseri otaya pataneke uunzapo wendhindhiliko. Otaye endulula uunzapo wiifundja mboka wa gandjelwe nale pompangu yOsanhedrin. Onkee ano itashi kumitha sho mboka taye ende po taya tameke oku mu sheka nokwiipuka komitse taya nyonkele e taya ti: “Ongoye tuu nguka to kumuna po otempeli noto yi tungulula omasiku gatatu, ikwatha ngele ongoye Omuna gwaKalunga, ngu u ze ko [koshiti shomahepeko].”

“Okwa li ha kwatha aantu, ye ita vulu okwiikwatha,” aasaseri aakuluntu nookuume kawo yopalongelokalunga osho taya gwedha ko. “Oye Omukwaniilwa gwAaisrael; ano na ze ko ngashingeyi [koshiti shomahepeko opo], otatu mu itaale ihe. Oye okwi inekela Kalunga; Kalunga ne mu hupithe ano ngashingeyi, ngele e mu hokwa; oshoka oye mwene a tile: Ongame Omuna gwaKalunga.”—Yelekanitha NW.

Aakwiita nayo wo otaya kwatwa kombepo ndjoka e taya yolo Jesus. Otaye mu sheke moku mu pa omaviinu omalulu, sha yela kutya oye ga tula owala komilungu dhe dha kukuta. Otaye mu nyenkele taya ti: “Ongoye ngele omukwaniilwa gwAajuda, ikwatha ano ngoye mwene.” Nokuli naayugi—mboka gumwe a alelwa kolulyo lwaJesus nomukwawo okolumoho lwe—otaye mu sheke. Shi dhiladhila owala! Omuntu omunenenene ngoka a li ko nale, eeno, ngoka a li a kutha ombinga pamwe naJehova Kalunga okushita iinima ayihe, okwi idhidhimikile iihuna ayihe mbika nuudhiginini!

Aakwiita otaya kutha oonguwo dhaJesus dhokombanda e taye dhi topola miitopolwa ine. Otaye dhi umbile oshihogololitho ya tale kutya otadhi ningi dhalye. Ihe onguwo yomeni kayi na omuhondjo, noyi li yondilo. Onkee ano aakwiita otaya lombwelathana taya ti: “Inatu yi kondeni, tu yi umbileni oshihogololitho, yi na okupewa lye.” Moku shi ninga, oya gwanitha mokwaashisha enyolo ndyoka tali ti: “Oyo taa topolelathana oonguwo dhandje nomuzalo gwandje otaye gu umbile oshihogololitho.”

Konima yethimbo, gumwe gwomaayugi ota mono kutya Jesus oye e na okukala e li omukwaniilwa shili. Onkee ano ta ganda mukwawo e ta ti: “Iho tila tuu Kalunga, sho u li megeelo ndi li thike pamwe? Otse tatu hepekwa nokuli [pauyuuki], oshoka tatu pewa shono twe shi ilongele, ihe nguno ina longa uuwinayi nando washa.” Opo nduno ota popi naJesus e te mu indile ta ti: “Dhimbulukwa ndje, nge wa thiki [muukwaniilwa woye, KB].”

“Oshili tandi ku lombwele nena,” Jesus ta yamukula, “oto ka kala pamwe nangame mOparadisa.” (NW) Euvaneko ndika otali ka gwanithwa ngele Jesus ta pangele e li Omukwaniilwa megulu nota yumudha omuyoni nguka i iyela ombedhi okukala nomwenyo kombanda yevi mOparadisa ndjoka aahupipo puHarmagedon nosho wo ookuume kawo taya ka kala ye na uuthemba woku yi longa. Mateus 27:33-44; Markus 15:22-32; Lukas 23:27, 32-43; Johannes 19:17-24.

▪ Omolwashike Jesus ta tindi okunwa omaviinu ga vongakanithwa nomirha?

▪ Osha yela kutya omolwashike koshiti shaJesus kwa mbambangelwa endhindhiliko, nokwaahatsakumwe kuni tashi eta pokati kaPilatus naasaseri aakuluntu?

▪ Okushekwa kuni ishewe Jesus ta shekwa sho e li koshiti, nosha yela kutya okwe etithwa koshike?

▪ Ehunganeko otali gwanithwa ngiini kwaashoka tashi ningilwa oonguwo dhaJesus?

▪ Elunduluko lyashike gumwe gwomaayugi ta ningi, nongiini Jesus ta ka gwanitha eindilo lye?