Okuza ngaa kuunona wandje onda kala ndi hole eshito. Piihwa yetu, mondoolopa yedhina, Jyväskylä, ndjoka yi li pondingandinga yoshilongo shetu, Suomi, omu udha omiti odhindji nomilonga omiwanawa. Onkene aantu yaandjetu oya li ye hole okuya komahala ngoka. Ngaye ondi hole wo iinamwenyo paunshitwe. Sho nda li okanona, okambishi kehe nenge okambwa te mono, ohandi kala nda hala oku ka ukata. Sho nda koko, onda li handi kala nda geya uuna ndi wete aantu taya ningi nayi iinamwenyo. Konima yethimbo, onda ningi oshilyo shehangano ndyoka hali popile uuthemba wiinamwenyo. Onda tsakanene mo naantu mboka ye hole iinamwenyo ya fa ndje.

Otwa li hatu kala tatu kondjele uuthemba wiinamwenyo. Otwa kala hatu ningi omakanka, tatu andjaganeke uuyelele mboka wu li ompinge noongoshefa ndhoka hadhi landitha iinima ya longwa miipa yiinamwenyo nosho wo omandiki moka hamu etwa iinamwenyo, opo kuyo ku ningilwe omalolelo ku talike ngele omiti omipe otadhi longo. Otwa toto po nokuli ehangano epe lyokugamena iinamwenyo. Shaashi otwa li hatu ningi ngaashi tatu vulu tu popile nokugamena iinamwenyo, otwa li hatu iyadha olundji tu li mo nayi kopolisi. Onda kala handi kwatwa po iikando oyindji nokufalwa kompangu.

Kakele kokugeya uuna ndi wete iinamwenyo tayi ningwa nayi, onda li wo handi uvithwa nayi komaupyakadhi ngoka ge li muuyuni. Onkee onda waiyimine omahangano gi ili nogi ili, mwa kwatelwa ehangano lyuuthemba womuntu lyedhina: Amnesty International and Greenpeace. Onda li handi ambidhidha lela iilonga yalyo. Onda li handi popile oohepele, aasindjala nosho wo yalwe mboka kaaye na sha.

Nonando omahangano ngoka oga li ga kandula po omikundu omishona, omaupyakadhi ngoka omanene oga li owala taga pula komeho. Iinima iiwinayi oya li owala tayi humu komeho naantu oyendji kaya li ye na ko nasha. Konima yethimbo onda ka mona kutya nani itandi vulu okweeta elunduluko muuyuni. Onda li ndu uvite kutya kandi na shoka te vulu okuninga po.

Onda tameke okudhiladhila kombinga yaKalunga nosho wo yOmbiimbeli, oshoka onda li nda teka omukumo, sho itaandi vulu okweeta elunduluko lyasha. Onda li handi konakona nale Ombiimbeli nOonzapo dhaJehova. Onda li ndi dhi hole, oshoka odhi na ombili nodha li dhi na ko nasha nangame, ihe kanda li nda hala okuninga omalunduluko. Pompito ndjino, onda li nda hala okuninga omalunduluko.

Onda tameke ishewe okulesha Ombiimbeli yandje noya li ya hekeleke ndje. Onda lesha oovelise odhindji ndhoka tadhi ulike kutya otu na okusila oshimpwiyu iinamwenyo. Pashiholelwa, mOmayeletumbulo 12:10 omwa popiwa kutya “omuyuuki oha sile iimuna ye oshimpwiyu.” Onda li wo ndi ilongo kutya Kalunga haye omweetithi gwomaupyakadhi ngoka ge li muuyuni. Pehala lyaashono, omaupyakadhi ogi indjipala nayi, oshoka aantu oyendji inaya hala okulandula omilandu dhe. Sho ndi ilongo kombinga yohole yaJehova neidhidhimiko lye, osha li sha gumu omutima gwandje. — Episalomi 103:8-14.

Sho nda tameke okulesha Ombiimbeli, ondi itsu okambapila hoka nda li ndu udhitha, opo ndi tuminwe embo Omalongo gashili gOmbiimbeli ogeni naanaa? Inapu pita ethimbo nuule pegumbo lyandje, opwe ya Oonzapo dhaJehova, omusamane nomukulukadhi gwe. Oya pula ndje ngele onda hala okukonakona Ombiimbeli, nonda zimine. Onda tameke wo okugongala pamwe nayo kOshinyanga shUukwaniilwa. Kungawo, onda tameke okukala nda hokwa shoka tandi ilongo mOmbiimbeli.

Ombiimbeli oya kwathela ndje ndi ninge omalunduluko ogendji. Onde etha po okuhila omakaya nokunwa sha pitilila. Onda lundulula okuzala kwandje nomukalo gwandje gwokupopya. Onda li wo nda lundulula omukalo moka nda tala ko aapangeli. (Aaroma 13:1) Onda li ndi hole iipala nayi, ihe onde yi etha po.

Elunduluko ndyoka nda li te nyengwa okuninga, okukala ndi na etaloko lyomondjila li na ko nasha nomahangano ngoka haga popile uuthemba waantu nowiinamwenyo. Petameko onda li ndu uvite kutya ngele onda zi mo mugo, nena onde ga kengelela. Osha li sha pula ndje ethimbo lela ndi ga thige po. Ihe ondi ilongo kutya Uukwaniilwa waKalunga owo owala tawu ke eta iinima kondjila. Onkee ano, onda tokola ndi ambidhidhe Uukwaniilwa mboka noonkondo dhandje adhihe nokukwathela yalwe yi ilonge kombinga yawo. — Mateus 6:33.

Sho nda li tandi kambadhala okweeta elunduluko muuyuni, onda li handi topola aantu moongundu mbali. Ongundu yimwe oyaamboka aawanawa, nonkwawo oyaamboka aawinayi. Ngele onda mono kutya omuntu oku li mongundu yaamboka aawinayi, onda li ndi ilongekidha okuninga po sha. Ihe ngashingeyi kandi tonde we aantu ngaashi nale, oshoka Ombiimbeli oya kwathela ndje. Pehala lyaashono, ohandi kambadhala oku ulukila aantu ayehe ohole yopaKriste. (Mateus 5:44) Omukalo gumwe moka handi ulukile aantu ohole ndjoka omoku ya uvithila onkundana ombwanawa yUukwaniilwa waKalunga. Ondu uvite nawa okumona nkene iilonga mbika tayi humitha komeho ombili, enyanyu notayi pe wo aantu etegameno lyonakuyiwa.

Ngashingeyi ondi na ombili yopamadhiladhilo, oshoka ohandi ethele iinima miikaha yaJehova. Ondi na uushili kutya e li Omushiti, ita etha iinamwenyo naantu ya monithwe iihuna sigo aluhe. Ite etha wo evi lyetu li hanagulwe po. Pehala lyaashono, masiku ota ka longitha Uukwaniilwa we, opo a hulithe po iinima iiwinayi mbyoka hayi ningilwa iinamwenyo, aantu nosho wo evi. (Jesaja 11:1-9) Onda nyanyukwa sho nda tseya iinima mbika nondi hole wo okukwathela yalwe ya kale ye yi itaala wo. Mungame kamu na we omaiyuvo kutya onda pumbwa okweeta elunduluko muuyuni, oga kana mo thiluthilu.