Opo tu uvithile “omihoko adhihe, omaludhi agehe, omalaka agehe niigwana ayihe” “onkundana ombwanawa,” ohatu nyanyangidha iileshomwa momalaka ge vulithe po-600. (Ehololo 14:6, yelekanitha NW.) Oshilonga shika nonando kashi shi oshipu, ohatu shi longo ngiini? Ohatu shi longo kekwatho lyaanyoli mboka ya za miilongo yi ili noyi ili nolyaatoloki 3 000 lwaampo, mboka ye li Oonzapo dhaJehova.

Ohayi nyolwa tango mOshiingilisa. Olutuwiliki ohalu tonatele iilonga mbyoka hayi longwa kOshikondo shOkunyola okuza koombelewa oonene. Oshikondo shika ohashi unganeke iilonga yaanyoli mboka haya longo koombelewa oonene nomiitayimbelewa yimwe. Molwaashoka otu na aanyoli ya za momaputuko gi ili nogi ili, ohashi tu kwathele tu vule okunyola iinima yi na ko nasha nomaputuko gi ili nogi ili, shoka hashi ningitha iileshomwa yetu yi kale yi holike moshilongo kehe.

Ohayi tuminwa aatoloki. Ngele shoka sha nyolwa osha talululwa e ta ku monika kutya oshi li nawa, ohashi tuminwa aatoloki muuyuni auhe okupitila mokompiuta, konima ngele ye shi toloka ohaya tala ngele oye shi toloka mondjila opo nduno ohaye shi leshulula ya tale ngele omu na omapuko. Ohaya kambadhala okunyola ‘oohapu dhu uka nodhoshili’ ndhoka tadhi gandja eityo lya faathana naanaa naandyoka lyOshiingilisa. — Omuuvithi 12:10.

Okompiuta ohayi endeleleke iilonga. Okompiuta itayi vulu okulonga po oshilonga shaanyoli nenge shaatoloki. Ihe nonando ongaaka, ohaya vulu okulonga iilonga yawo neendelelo molwomambwiitya ngoka ge li mokompiuta, nomolwiikwathitho yokukonga omauyelele mbyoka nayo yi li mokompiuta. Oonzapo dhaJehova odha nduluka opolohalama yedhina Multilanguage Electronic Publishing System (MEPS) ndjoka hayi longithwa okunyola iinima momalaka omathele, tayi gwedha ko omathano kwaashoka sha nyolwa, e tayi yi longekidha yi kale tayi vulu okupilintwa.

Omolwashike hatu ningi oonkambadhala dha tya ngeyi nonando omalaka gamwe ohaga popiwa owala kaantu omayuvi gontumba? Omolwaashoka Jehova okwa hala “aantu ayehe ya hupithwe noya tseye oshili.” — 1 Timoteus 2:3, 4.

• Iileshomwa yetu ohayi nyolwa ngiini?

• Omolwashike hatu tolokele iileshomwa yetu momalaka ogendji?