JAKOB naJudas oya li aamwayina yaJesus. Petrus naJohannes oya li yomaayapostoli 12 yaJesus. Aalumentu mboka yane oya nyola oontumwafo adhihe kumwe heyali ndhoka tadhi adhika mOmanyolo gOshigreka gopaKriste. Kehe ontumwafo oyi na edhina lyomunyoli gwayo. Omalondodho ga nwethwa mo ngoka taga adhika moontumwafo ndhika oga nyolwa nelalakano lyokukwathela Aakriste ya kale ya kakatela uudhiginini wawo kuJehova nokUukwaniilwa we.

Nkene Aakriste ye na okuulika kutya oye na eitaalo. Okupopya owala kutya owu na eitaalo inaku gwana. Eitaalo lyashili oli na iilonga. Jakob okwa nyola a ti: “Eitaalo lyaa na iilonga olya sa.” (Jakob 2:26) Nonando otu makelwe, ngele otu na eitaalo, otatu ki idhidhimika. Opo Aakriste ya pondole oya pumbwa okwiindila uunongo kuKalunga ye na eitaalo kutya Kalunga ote wu ya pe. Ngele otwa kala tu na eidhidhimiko Kalunga ota ka kala e tu hokwa. (Jakob 1:2-6, 12) Omulongelikalunga ngoka e na eitaalo ota ka kakatela uudhiginini we, Jehova Kalunga ota ka hedha popepi naye. Jakob okwa ti: “Hedheni kuKalunga, oye nota hedha kune.”—Jakob 4:8.

Aakriste oye na okukala ye na eitaalo lya kola opo ya vule okukondjitha omamakelo nosho wo omanwethomo omawinayi. Molwaashoka pethimbo lyaJudas opwa li eyonuko lyopamikalo, Judas okwa li u uvite a thininikwa a ladhipike ooitaali ooyakwawo ya ‘kondjele’ eitaalo.—Judas 3.

Aakriste oye na okukala pamithikampango dhaKalunga. Jehova okwa tegelela aalongeli ye ya kale aayapuki, shoka tashi ti, oye na okukala aayogoki miinima ayihe. Petrus okwa nyola ta ti: “Kaleni aayapuki mwaayihe mbyoka tamu yi ningi . . . Oshoka enyolo otali ti: ‘Omu na okukala aayapuki, oshoka ongame omuyapuki.’” (1 Petrus 1:15, 16) Jesus Kristus okwe tu tulila po oshiholelwa, nomolwaashono Petrus a nyola ta ti: “Kristus wo okwa hepekwa omolweni nokwe mu thigile oshiholelwa, opo mu landule ondjila ndjoka a li e yi ende.” (1 Petrus 2:21) Nonando Aakriste otashi vulika ya hepekwe omolwokudhiginina kwawo omithikampango dhaKalunga ohaya kala ye na “eiyuvo ewanawa.” (1 Petrus 3:16, 17) Petrus okwa li a ladhipike Aakriste ya kale ye na eihumbato ewanawa noya kale taya longo iilonga mbyoka tayi ulike kutya oye na etilokalunga, manga ya tegelela esiku lyaKalunga lyepangulo nosho wo uuyuni uupe mboka wu uvanekwa, “moka tamu ka kala uuyuuki.”—2 Petrus 3:11-13.

Aakriste oye na okukala ye na ohole. Johannes okwa nyola a ti: “Kalunga oye ohole.” Omuyapostoli okwa popi kutya Kalunga oku ulike ohole ye onene sho a tumu Jesus Kristus e li “eyambo lyokudhima po oondjo dhetu.” Aakriste oye na okwiinyenga ngiini kwaashino? Johannes okwe shi yelitha a ti: “Ookuume aaholike, Kalunga ngele osho e tu hole ngeyi, nena natse wo otu na okuholathana.” (1 Johannes 4:8-11) Omukalo gumwe moka tatu vulu okuulika ohole ndjika, ogwo okuyakula oitaali ooyakwetu.—3 Johannes 5-8.

Ongiini mbela aalongeli yaJehova taya vulu okuulika kutya oye mu hole? Johannes okwa yamukula a ti: “Oshoka ohole yokuhola Kalunga oyo okuvulika kiipango ye. Iipango ye kayi shi iidhigu kutse.” (1 Johannes 5:3; 2 Johannes 6) Onkee ano, mboka ye hole Kalunga nohaya vulika kuye oya shilipalekwa kutya ota ka kala e ya hole noye na ‘etegameno lyomwenyo gwaaluhe.’—Judas 21.

—Uuyelele moshitopolwa shika owa kankamena kuJakob; Petrus gwo-1 naPetrus omu-2; Johannes gwo-1; Johannes omu-2 naJohannes omu-3; Judas.