MBELA Jesus okwa li e ya a longe shike kombanda yevi? Jesus okwa ti: “Elaka etoye lyoshilongo shaKalunga ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.” (Lukas 4:43) Tala kiinima yi li ine mbyoka Jesus a longo aantu kombinga yUukwaniilwa, mboka wa li enenedhiladhilo lyeuvitho lye.

1. Jesus okwa li ta ka langekwa po a ninge Omukwaniilwa. Jesus okwa li e shi popi shu ukilila kutya oye Mesiasa ngoka a li u uvanekwa. (Johannes 4:25, 26) Okwa li wo e shi ulike kutya oye Omukwaniilwa ngoka omupolofeti Daniel a li a mono memoniko. Jesus okwa lombwele aayapostoli ye kutya ota ka kuutumba “koshipangelapundi shesimano” nonokutya nayo wo otaya ka kuutumba kiipangelapundi. (Mateus 19:28) Okwa li a popi kutya ongundu ndjino yaapangeli oyi li ‘oshigunda she oshishona’ nokwa ti wo kutya oku na “oonzi dhilwe” ndhono kaadhi shi dhomoshigunda shoka.—Lukas 12:32; Johannes 10:16.

2. Uukwaniilwa waKalunga otawu ka pangela pauyuuki. Jesus okwa li a popi kutya Uukwaniilwa waKalunga otawu ka hulitha po ondhino onene yokudhina Jehova Kalunga sho tawu ka yapulitha edhina lya ndyoka lya kala tali shekithwa kuSatana okuza kuunashipotha womuEden. (Mateus 6:9, 10) Jesus okwa li wo u ulike esiku kehe kutya ke na ontondo mokulonga aalumentu naakiintu, aayamba noohepele kee na ondjoolola. Nonando oshilonga she osha li unene tuu okulonga Aaisraeli, okwa li wo a kwathele Aasamaria naamboka kaaye shi Aajuda. Ka li a fa aawiliki yomalongelokalunga yopethimbo lye noka li e na okayoya nenge okugama ombinga.

3. Uukwaniilwa waKalunga itawu ka kala oshitopolwa shuuyuni mbuka. Sho Jesus a li kombanda yevi opwa li omapiyagano omanene gopapolotika. Oshilongo shaandjawo osha li tashi pangelwa kepangelo ekwiilongo. Ihe sho aantu ya li ya kambadhala oku mu ningitha a kuthe ombinga miinima yopapolotika, okwa yi ondapo. (Johannes 6:14, 15) Jesus okwa li a lombwele omunapolotika gumwe a ti: “Uukwaniilwa wandje kawu shi womuuyuni mbuka.” (Johannes 18:36) Okwa li wo a lombwele aalanduli ye a ti: ‘Ne kamu shi yomuuyuni.’ (Johannes 15:19) Ka li e ya pitike ya longithe iikondjitho nokuli naashono ya li taya kambadhala oku mu gamena.—Mateus 26:51, 52.

4. Kristus ota ka pangela pahole. Jesus oku uvaneke kutya ota ka pa aantu evululuko nokupupaleka omitenge dhawo. (Mateus 11:28-30) Shoka osho naanaa a li a ningi. Okwa li a gandja omayele gopahole taga longo ge na ko nasha nokwiidhidhimikila iimpwiyu, okuhwepopaleka ekwatathano, okukondjitha ohole yopamaliko nosho wo okumona enyanyu lyashili. (Mateus ontopolwa 5-7) Molwaashoka okwa li e na ohole, aantu oya li haya vulu okuya kuye ya manguluka. Aantu yi ili noyi ili, nokuli naamboka ya li ya dhinika, oya li haya mbombolokele kuye molwaashoka oya li ye na einekelo kutya ote ku ungaunga nayo pahole nonesimaneko. Okwa li u ulike shili kutya ota ka kala Omupangeli omwaanawa.

Jesus okwa li wo a longo aantu kombinga yUukwaniilwa waKalunga momukalo gulwe omundhindhilikwedhi. Okwa li a longo iikumithalonga oyindji. Omolwashike a li e yi longo? Natu taleni kutya omolwashike.

—Uuyelele moshitopolwa shika owa kankamena kembo lyaMateus, Markus, Lukas naJohannes.