OSHITOPOLWA 7
Kalunga okwa li a kutha Aaisraeli muupika
Jehova okwa li a geyele Egipiti, Moses okwa li a kwatele komeho Aaisraeli oku ya pititha mo moshilongo moka. Kalunga okwa pe Aaisraeli ompango okupitila muMoses.
SHO oluvalo lwaIsraeli lwa kala muEgipiti uule woomvula odhindji, olwa kala nokuhepuluka nokwiindjipala. Ihe Farao omupe omukwanyanya nomukayamukulwa okwa li a tameke okupangela. Omupangeli nguka Farao ka li e shi Josef. Okwa li e na uumbanda kutya oluvalo lwaIsraeli otalu indjipala unene, okwa li e ya ningi aapika nokwa gandja oshipango kutya uunona auhe wuumati nawu umbilwe momulonga gwaNiili. Ihe omukulukadhi gumwe ependa okwa li a gamene okahanona ke kokamati, moku ka holeka moshimbamba pokati komanenge. Omwanakadhona gwaFarao okwa li a mono okanona hoka, okwe ka luku Moses nokwe ka putudhile mombala yaEgipiti.
Sho Moses a li e na oomvula 40, okwa li a yi muupyakadhi molwaashoka a li a gamene Omuisraeli ngoka a li ta monithwa iihuna komuEgipiti. Moses okwa yi ontuku koshilongo shokokule, hoka a kala muupongekwa. Sho Moses a li e na oomvula 80, Jehova okwe mu tumu a shune kuEgipiti a ka ye kuFarao e mu lombwele a mangulule oshigwana shaKalunga.
Farao okwa tindilile. Onkee ano, Kalunga okwa geele Egipiti nomageelo omulongo. Konima yegeelo kehe, Moses okwa li ha yi kuFarao e ke mu pule a mangulule Aaisraeli, opo a henuke egeelo ndyoka lya li tali ka landula ko. Ihe molwaashoka Farao okwa a dhina Moses nosho wo Jehova Kalunga, okwa li a kukutika omutima gwe. Hugunina, egeelo etimulongo olya li eso lyiisheeli ayihe yaEgipiti, kakele komaukwanegumbo ngoka ga vulika kuJehova mokugwayeka piikulo yomiyelo dhomagumbo gawo ombinzi yonzigona ndjoka ya li ya yambwa. Omuyengeli gwaKalunga ngoka a li e ya okudhipaga iisheeli ayihe okwa pitilile po omagumbo ngoka. Okuza mpono Aaisraeli oya li ya tameke okukala haya dhimbulukwa oshiningwanima shoka oshikumithi shokuhupithwa muupika waEgipiti, mokudhana oshituthi shoka ya li hayi ithana Opaasa omvula kehe.
Molwaashoka omwanamati gwaFarao gwosheeli okwa li a si pethimbo lyegeelo etimulongo, Farao okwa lombwele Moses nAaisraeli ayehe ya thige po Egipiti. Mbalambala oya li yu unganeke olweendo okuza muEgipiti. Opo nduno Farao okwa li a ninguluka e tu unganeke etangakwiita enene nomatembakwiita ogendji opo a ka galule Aaisraeli. Aaisraeli oya li ya kondekelwa komunkulofuta gwEfuta Etiligane. Jehova okwa topola pokati Efuta Etiligane, opo Aaisraeli ya vule okupita mefuta puukukutu, pokati komeya ngoka ga ninga omakuma. Sho Aaegipiti ye ya landula, Kalunga okwa shunitha omeya kumwe, Farao netangakwiita lye e ta ya sile mo.
Konima yethimbo sho Aaisraeli ya li ya yungu oontanda popepi nondundu yaSinai, Jehova okwa ningi ehangano nayo. Kalunga okwa longitha Moses e li omupokati a pe Aaisraeli oompango opo dhi ya wilike noku ya gamena mokukalamwenyo kwawo akuhe. Jehova okwa li ta ka kala pamwe nayo noku ya ninga oshigwana shoka tashi etele iigwana iikwawo omalaleko nuuyamba ngele Aaisraeli oya taamba ko nuudhiginini ompango yaKalunga.
Nonando Jehova okwa li a ningile Aaisraeli kehe shimwe, oyendji yomuyo oya li ye mu yemateke omolwokwaahe na eitaalo kwawo. Onkee ano, Jehova okwa li a ningitha oshigwana shoka shi kale tashi endagula mombuga uule woomvula 40. Opo ihe Moses okwa li a langeke po omulumentu omuyuuki Josua oye e mu landule. Hugunina, Aaisraeli oya li yi ilongekidha okuya kevi ndyoka Kalunga a li u uvanekela Abraham.
