PAULUS ngoka a li nale omupataneki, okwa li a halelela noonkondo okuuvitha onkundana ombwanawa kombinga yUukwaniilwa waKalunga, ihe okwa li ta patanekwa. Omuyapostoli Paulus nguka omulaadhi okwa li a yi momalweendo ogendji gokuuvitha nokwa li e ende iinano iileeleka tu uvitha onkundana ombwanawa kombinga yUukwaniilwa mbono tawu ya okugwanitha po elalakano lyaKalunga lyopetameko li na ko nasha naantu.

MuListra pethimbo lyolweendo lwe lwokuuvitha lwotango, Paulus okwa li a aludha mo omulumentu ngoka a li a valwa oshilema. Ongundu yaantu oya tameke okwiigidha kutya Paulus nomweendi pamwe naye Barnabas oyo ookalunga. Paulus naBarnabas oya li ya kambadhala okukeelela aantu opo kaaye ya ningile nando omafikiloyambo. Engathithi lyaantu oyo tuu mboka ya li ya hekwa kaatondi yaPaulus konima yethimbo oya dhenge Paulus nomamanya noye mu thigi mpoka ye shi okwa sa. Paulus okwa li a hupu mokuponokelwa huka nokonima yethimbo okwa ka shuna ngaa natango koshilando hoka opo a ka ladhipike aalongwa noku ya tsa omukumo.

Aakriste yamwe mboka ya li Aajuda oya li taya ti kutya ooitaali ooyakwawo mboka kaaye shi Aajuda oya li ye na okuvulika kiitegelelwa yontumba yOmpango yaMoses. Paulus okwa fala oshinima shika kaayapostoli nokaakuluntu yegongalo muJerusalem. Konima yokukonakona nuukeka Omanyolo nokuwilikwa kombepo ondjapuki yaKalunga, aalumentu mbaka oya nyolele komagongalo noku ga pukulula opo gi idhilike okulongela iikalunga, okulya ombinzi nonyama yoshinamwenyo sha pondwa nokukala kokule noluhondelo. Iipango mbika oya li yi “na oshilonga,” ihe okuvulika kiipango mbika itashi ti kutya aantu oya li ye na okuvulika kOmpango yaMoses.—Iilonga 15:28, 29.

Paulus molweendo lwe olutiyali okwa li a talele po Berea shono hashi ithanwa ngashingeyi Greka. Aajuda mboka ya li ya kala moka oya li ya taamba ko oohapu dhawo nehalo ewanawa nokukonakona Omanyolo esiku kehe opo ya tale kutya shoka e ya longa oshoshili. Manga Paulus a li muAtena, okwa li a gandja oshipopiwa kaalongwantu Aayatena, shoka sha li tashi inyengitha omutima. Okupitila moshipopiwa shoka, Paulus okwe tu tulila po oshiholelwa oshiwanawa shi na ko nasha nokulonga yalwe noondunge dhokuyoolola nokutompathana pandunge.

Paulus okwa yi kuJerusalem konima yolweendo lwe lwokuuvitha olutitatu. Sho a li a talele po otempeli, Aajuda yontumba oya li ye mu ponokele ya hala oku mu dhipaga. Aakwiita Aaroma oye ya keelele kaaye mu dhipage opo ye ke mu pule okanaku. Molwaashoka Paulus okwa li Omuroma, okwa li i ipopile koshipala shomupangeli Omuroma Feliks. Aajuda kaya li ye na uunzapo mboka tawu yambidhidha iinima mbyoka ya li taya lundilile Paulus. Opo omupangeli gulwe gwAaroma, Festus, kee mu gandje kAajuda, Paulus okwi indile a ti: ‘Ngame otandi igameke komukesari.’ Festus okwe mu yamukula a ti: ‘Onkee ano, owu na okuya komukesari.’—Iilonga 25:11, 12, yelekanitha OB-1954.

Okuza mpoka, Paulus okwa li a falwa nosikepa kuItalia opo a ka pangulwe. Ihe molwaashoka osikepa oya li ya tekele mondjila, okwa kala kokantuntu kedhina Malta pethimbo lyokufu kwokiilongo mbyoka. Konima sho Paulus a thiki muRoma, okwa li a kala megumbo moka a kala te li futile ye mwene uule woomvula mbali. Ihe nonando omuyapostoli Paulus okwa li metonatelo lyaakwiita, okwa li a tsikile okuuvithila nuulaadhi ayehe mboka ya li ye mu talele po kombinga yUukwaniilwa waKalunga.

—Uuyelele moshitopolwa shika owa kankamena kIilonga 11:22–28:31.