OKWIIPA UUSAMA otaku vulu okukala omutenge tagu li epepe. Omukwaniilwa David okwa nyola a ti: “Otandi sile meyelu lyoondjo dhandje; odho omutenge omudhigu okuhumbata.” (Episalomi 38:4) Aakriste yamwe ohaya kala yi iyala shili. Ohaya kala ya tompwa kutya Jehova ite ke ya dhimina po nando. (2 Aakorinto 2:7) Mbela edhiladhilo lya tya ngawo oli li ngaa mondjila? Ngele owa gwile meyono enene, mbela shono otashi ti kutya Jehova okwe ku ekelahi noke na siku e ku dhimine po? Hasho dha li.

Jehova ihe ekelehi aayoni ngele oyi iyela ombedhi. Pehala lyaashono, ohe ya hilile kuye. Jesus okwa li a longitha eyele lyomumati a kanene moka ta yelekanitha Jehova nahe omunahole. Omumati okwa li a thigi po egumbo lyahe e ta yi nokuhanagula po eliko ndyoka a pewa kuhe mokukala muuholume. Sho ta mono iihuna okwa tokola a shune kegumbo. Ombiimbeli otayi ti: “Manga a li kokule, he okwe mu mono nokwe mu uvitile olukeno e ta matuka, e ke mu tsakaneke, okwe mu papatele e te mu thipi komilungu.” (Lukas 15:11-20) Mbela owa hala okuhedha popepi naJehova, ihe owu wete wa fa wu “li kokule” naye natango? Ngaashi owala he gwomeyele lyaJesus, Jehova naye oku ku uvitile olukeno. Ngele owa galukile kuye ote ke ku hambelela nomaako agehe.

Ongiini ngele owu uvite kutya Jehova ite ku dhimine po, molwaashoka omayono goye ogendji, nenge omanene unene? Tala shoka Jehova ta popi muJesaja 1:18: “‘Ileni tu ka tamananeni. Oondjo dheni nando nadhi kale dha tiligana mbyumbyumbyumbyu, otadhi ka toka dha fa oompawe; nonando nadhi kale dha tiliganenena, otadhi yele dha fa omafufu omatokele goonzi.’” Osha yela kutya Jehova ote ke tu dhimina po nuupu nuupenda, kutya nduno oondjo dhetu odhi kale dha fa ontongo ontiligane mbyumbyu yi li konguwo ontokele, ota vulu oku dhi dhima po.

Jehova ina hala wu kale to ili ominwe omolweiyuvo lyoye ndyoka tali ku pe uusama. Ongiini to vulu okumona epepelelo ndyoka hali zi mokudhiminwa po kuKalunga nosho wo eiyuvo lya yela? Omokulandula oonkatu mbali ndhoka omukwaniilwa David a li a katuka. Onkatu yotango okwa lombwele Jehova ta ti: “Onde ku hempululile oondjo dhandje.” (Episalomi 32:5) Dhimbulukwa kutya Jehova okwe ku indila nale wu galikane kuye nosho wo wu ye kuye mu ‘ka tamanane,’ sha hala okutya, mu ka ukithe iinima naye yi yele mo nawa. Onkee ano, taamba ko eindilo lye ndyoka. Mu hempululila oondjo dhoye noku mu mbumbulila omaiyuvo goye. Shoka sha ningilwa David oshe mu inyengitha a galikane neinekelo ta ti: ‘Theta po ondjo yandje. Omutima gwi itedhulula ito gu ekelehi.’ —  Episalomi 51:2, 17.

Onkatu ontiyali, David okwa li a taamba ko ekwatho ndyoka a pewa komupolofeti Natan, omukalelipo gwaKalunga ngoka a langekwa po. (2 Samuel 12:13) Kunena Jehova okwe tu pa aakuluntugongalo mboka ya dheulwa okukwathela aayoni mbo yi iyela  ombedhi ya tungulule ishewe ekwatathano lyawo naye. Uuna wa hedha paakuluntugongalo, otaya ka longitha Ombiimbeli nokugalikana pamwe nangoye tashi zi komutima. Shoka otashi ka shunitha pevi nenge shi kuthe po omaiyuvo goye omawinayi, noku ku kwathela wu aluke pambepo. — Jakob 5:14-16.

Otashi vulika wu kale wu uvite kutya okuhempululila Jehova Kalunga oondjo dhoye nosho wo okuya kaakuluntugongalo oshi li oshidhigu. Osha yela kutya David naye okwa li u uvite ngaaka. Opu na ethimbo limwe a li a kala ‘inaa hempulula’ oondjo dhe. (Episalomi 32:3) Ihe konima yethimbo okwa li a pandula uuwanawa mboka we mu zile mokuhempulula oondjo dhe nosho wo mokulundulula oondjila dhe.

David okwa li a mono uuwanawa kamana kandongo. Owashike mbela? Okwa li e na omutima tagu hunga enyanyu. Okwa nyola a ti: “Aanelago oomboka oondjo dhawo dha dhimwa po, mboka ya kuthilwa po omayono gawo.” (Episalomi 32:1) Okwa galikana wo a ti: “Omuwa, makula okana kandje, e tandi ku hambelele.” (Episalomi 51:15) David okwa li i inyengithwa, opo a lombwele yalwe kombinga yaJehova a manguluka. Oshike sha li she mu inyengitha? Olupandu lwokupandula Kalunga sho a dhimi po oondjo dhe.

Jehova okwa halelela wu kale wa pepelelwa nowu na eiyuvo lya yela. Okwa hala wo u lombwele yalwe kombinga ye nosho wo yomalalakano ge. To shi ningi nomwenyo aguhe nowu na enyanyu, ihe ina hala wu shi ninge nomitima mbali. (Episalomi 65:1-4) Dhimbulukwa kutya ote tu pula ta ti: “Itedhululeni, ne mu galukile kuKalunga, opo a dhime po oondjo dheni.” — Iilonga 3:19.

Oshinima shono osho sha li sha ningilwa meme Martha. Ota hokolola ta ti: “Omumwandjemati okwa kala aluhe nokutumina ndje iifo yOshungolangelo nosho wo yo-Awake! Kashona nakashona, onda tameke ishewe okukala ndi na ekwatathano naJehova. Ihe eshongo enene lyokugalukila moshili kungame olya li okupula ndi dhiminwe po omolwoondjo adhihe ndhoka nda ninga. Lwahugunina, onda galikana kuKalunga noku mu pula a dhimine ndje po. Oshidhigu okwiitaala kutya onda galukile kuJehova konima yomimvo 40. Ngame ondi li oshiholelwa shoka tashi ulike kutya omuntu ota vulu okupewa ompito yokulongela Kalunga, nokukala e holike kuye, kutya nduno opwa pita omimvo odhindji.”