Komwiitaali omuholike

Ombiimbeli oyo embo enene moka tatu adha omahokololo kombinga yaantu yontumba. Oyendji mboka ya popiwa mo oya li aalumentu naakiintu aadhiginini, noya pita momashongo ga fa ngoka hatu iyadha mugo. Ooitaali ooyakwetu mboka nayo oya li owala ‘aantu ye tu fa.’ Oshinima shika nangoye owu shi shi nawa. (Jakob 5:17) Yamwe oya li ya gwililwa po komaupyakadhi nokiimpwiyu yi ili noyi ili. Yo yalwe oya li ye ehamekwa komitima kaantu yaandjawo, nenge kooitaali ooyakwawo. Opu na ishewe oyendji mboka ya kala nokwiilya ominwe omolwomapuko ngoka ya ninga.

Mbela aantu mbono oye etha po thiluthilu okulongela Jehova? Aawe. Oyendji oya fa omupisalomi ngoka a galikana ta ti: “Onda puka nda fa onzi ya kana; konga omupiya gwoye, oshoka iipango yoye inandi yi dhimbwa.” (Episalomi 119:176) Mbela nangoye owu li monkalo ya fa ndjono?

Jehova iha dhimbwa nando oonzi dhe ndhoka dha za mo moshigunda. Pehala lyaashono, ohe ke dhi konga. Olundji ohe shi ningi ta longitha aamwatate naamwameme. Jehova oha kwathele wo aapiya ye uuna ye li muudhigu wu vule oonkondo dhawo. Oshiholelwa shimwe, okwa li a kwathele omupiya gwe, Job, a pite muudhigu moka a li. Job okwa li a kanitha eliko lye, oyana nokwa li wo te ehama, te ehamenene sho Satana e mu umbu iitumbuka olutu aluhe. Okwa li wo e na okwiidhidhimikila oohapu dhookuume ke mboka ya li ye na oku mu kwathela andola. Okwa li ta dhiladhila kutya Kalunga oye e mu etele uudhigu mboka a li muwo. Ihe nonando ongawo, Job ina pilamena Jehova. (Job 1:22; 2:10) Mbela Jehova okwa li ngaa e mu kwathele? Eeno. Ngiini mbela?

Okwe shi ningi okupitila momwiitaali omukwawo Elihu. Sho Job a li ta popi uudhigu we, Elihu okwa li a pulakena. Konima yethimbo opo owala a ka popya sha. Okwa li a ti shike? Mbela okwa li a pe Job uusama? Mbela okwa li ta popi naye te mu pe oombedhi nenge te mu sheke? Mbela Elihu okwa li i iwete omuyuuki e vule Job? Shi valelwe. Ombepo yaKalunga oya li yi inyengitha Elihu a popye ta ti: “Tse nangoye otu thike pamwe koshipala shaKalunga; atuhe otwa kuthwa meloya.” Okwa shilipaleke Job a ti: “Ito pumbwa okutila ndje; oshikaha shandje itashi ku thindile pevi.” (Job 33:6, 7) Elihu okwa li a hungu Job omwenyo pethimbo e li muudhigu. Okwa li a yululula ko kuudhigu waJob moku mu pa omayele nosho wo moku mu tsa omukumo.

Okambo hano oka longekidhwa nelalakano ndyoka. Tango tse iilyo yOlutuwiliki otwa kala nokupulakena nawa kaantu oyendji mboka ya za moshigunda shaJehova. Otwa kala wo nokutala koonkalo dhawo nosho wo kiipopya yawo. (Omayeletumbulo 18:13) Opo ihe otwa kuutumba nawa e tatu konakona Omanyolo nkene Jehova a li a kwathele aapiya ye yonale mboka ya li moonkalo dha fa ndhoka. Sho tatu konakona omahokololo ngoka ge li mOmanyolo otwe shi ningi pamwe negalikano. Otwe ga faathanitha noonkalo dhokunena, opo ihe otwa nyanyangidha okambo haka. Otatu ku indile nesimaneko enene wu ka konakone. Otu ku hole unene noonkondo.

Olutuwiliki lwOonzapo dhaJehova