Mbela oto dhimbulukwa omathimbo omawanawa ngoka mwa li mwa tyapula pamwe naapiya yaJehova? Ongaashi geni mbela? Okugongala kwegongalo taku tungu, oshigongi shoshitopolwa tashi nyanyudha, oshimoniwa oshiwanawa muukalele nenge tuu oonkundathana tadhi hokitha ndhoka mwa li mu na nomwiitaali omukweni. Ngaashi owala ngoye inoo dhimbwa Jehova, naye ine ku dhimbwa. Okwa lenga iilonga yuudhiginini mbyoka we mu longela, noite yi dhimbwa. Okwa halelela oku ku kwathela wu galukile kuye.

Jehova ota popi moohapu dhe ta ti: “Ongame mwene tandi ka konga oonzi dhandje noku dhi sila oshimpwiyu, ngaashi omusita ta gongele oonzi dhe ndhoka dha halakanithwa e te dhi eta pamwe ishewe. Otandi ke dhi kongolola ko komahala agehe hoka dha halakanithilwa ko.” —  Hesekiel 34:11, 12.