1-3. Otatu ka mona uuwanawa washike ngele tatu holele Jehova mokuulika ohole?

“OKUGANDJA oku na elago ku vule okutaamba.” (Iilonga 20:35) Oohapu dhaJesus ndhoka otadhi tsu omuthindo oshili ya simana kutya ohole yokwaaihola mwene ohayi eta iizemo iiwana. Ohashi tu nyanyudha ngele tatu ulukilwa ohole, ihe oku yi ulukila yalwe ohashi tu nyanyudha unene noonkondo.

² Kapu na gumwe e shi nawa uushili mboka e vule Tate yetu gwomegulu. Ngaashi twe shi mona moontopolwa dha tetekele moshitopolwa shika, Jehova oye oshiholelwa dhingi shokuulika ohole. Kapu na omuntu u ulika ohole momukalo gwa tongomana nenge uule wethimbo ngaashi ye. Itashi kumitha sho ti ithanwa ‘Kalunga omunelago.’—1 Timoteus 1:11 OB-1954.

³ Kalunga ketu omunahole okwa hala tu mu holele, unene tuu ngele tashi ya pokuulika ohole. Aaefeso 5:1, 2 (KB) otaya ti: “Ningeni ano aaholeli yaKalunga ngaashi oyana aaholike, ne mu kale nokweenda mohole.” Ngele tatu holele ohole ye otatu ka mona enyanyu ndyoka hali zi mokugandja. Otatu ka kala wo twa nyanyukwa sho tu shi kutya otatu mu nyanyudha, molwaashoka Oohapu dhe otadhi tu ladhipike tu kale tu ‘holathane.’ (Aaroma 13:8) Ihe opu na omatompelo ogendji kutya omolwashike tu na ‘okweenda mohole.’

4, 5. Omolwashike sha simana tu ulukile ooitaali ooyakwetu ohole yokwiiyamba?

⁴ Omolwashike sha simana okuulukila ooitaali ooyakwetu ohole? Oku shi popya paufupi, ohole oyo uukwatya wa simana wAakriste yashili. Ngele katu yi na itatu vulu okukala nekwatathano lyopothingo nAakriste ooyakwetu, nokomeho gaayihe, itatu ka kala tu na oshilonga momeho gaJehova. Tala nkene Oohapu dhe tadhi tsu omuthindo oshili ndjika.

 ⁵ Uusiku wahugunina wokukalamwenyo kwe kombanda yevi, Jesus okwa lombwele aalanduli ye a ti: “Oshipango oshipe otandi shi mú pe, mu holathane. Ngaashika naanaa [nangame] nda kala ndi mú hole, osho nane wo omu na okuholathana. Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 23:34, 35) Uutumbulilo “ngaashika naanaa [nangame] nda kala ndi mú hole,” otawu ti kutya otu na okuulika ohole ya fa yaJesus. Ontopolwa 29 oye tu ulukila nkene e tu tulila po oshiholelwa dhingi shohole yokwiiyambo sho a pititha komeho oompumbwe dhayalwe. Ohole ndjoka otatu vulu wo oku yi ulika momukalo ngoka tagu vulu okumonika kwaamboka kaaye shi Aakriste. Ohole yokwiiyambela aamwatate oyo tayi tu ndhindhilikitha kutya otu li aalanduli yashili yaKristus.

6, 7. (a) Otu shi shi ngiini kutya Oohapu dhaJehova otadhi tsu omuthindo esimano lyokuulika ohole? (b) Oohapu dhaPaulus ndhoka dhi li mAakorinto yotango 13:4-8 otadhi popi unene ohole yini?

⁶ Ongiini ngele katu na ohole? Omuyapostoli Paulus okwa ti: ‘Ngele kandi na ohole, nena okupopya kwandje okwa fa owala ekudhilo lyokangendjo taka tono nenge lyongendjo tayi ngelengendja.’ (1 Aakorinto 13:1) Ongendjo ohayi kudhile ngele tayi tono. Ongiini kombinga yosheela? Omatoloko gamwe oga toloka uutumbulilo mboka taga ti: “Ekudhilo lyokangendjo.” Omathaneko ngoka otago opalele. Omuntu ngoka kee na ohole okwa fa oshihikomwa shontumba shoka hashi ningi ekudhilo nayi notashi kenyaneke pehala lyokunyanyudha. Ongiini omuntu a tya ngaaka ta vulu okunyanyukilwa uukuume wopothingo nayalwe? Paulus okwa ti ishewe: “Nonando ondi kale ndi na eitaalo tali vulu okudhikula po oondundu, ihe kandi na ohole, ongame oshinima showala.” (1 Aakorinto 13:2) Dhiladhila owala komuntu ngele ke na ohole “ke shi sha” nonando okulonge iilonga ya tya ngiini. Mbela shika itashi ulike kutya Oohapu dhaJehova otadhi tsu omuthindo ohole?

⁷ Ongiini tatu vulu okuulika uukwatya mboka momukalo ngoka hatu ungaunga nayalwe? Opo tu mone eyamukulo,  natu konakoneni oohapu dhaPaulus dhi li mAakorinto yotango 13:4-8. Oovelise ndhika itadhi tsu omuthindo kombinga yohole yaKalunga yoku tu hola nenge yohole yetu yoku mu hola. Ihe otadhi tsu omuthindo nkene tatu vulu okukala tu holathane. Okwa popya iinima yimwe mbyoka omuntu e na ohole e na okuninga naambyoka kee na okuninga.

8. Eidhidhimiko ohali tu kwathele ngiini tu ungaunge nayalwe?

⁸ ‘Ohole ohayi idhidhimikile ayihe.’ Okukala neidhidhimiko otashi ti kutya okwiidhidhimikila yalwe. (Aakolossa 3:13) Mbela otwa pumbwa okwiidhidhimikila yalwe? Molwaashoka inatu gwanenena nohatu mu longele twa tegemathana, otwa tegelela Aakriste ooyakwetu ye tu uvithe nayi omathimbo nomathimbo. Ihe eidhidhimiko nontalanteni otayi ke tu kwathela tu ungaunge nawa naamboka ye tu uvitha nayi nopwaahe na okuyona po ombili yegongalo.

9. Ongiini tatu vulu okuulukila yalwe olukeno?

 ⁹ ‘Ohole oyi na olukeno.’ Olukeno ohalu ulikwa mokukwathela yalwe nomokupopya nondjaalela. Ohole ohayi tu inyengitha tu konge oompito tu ulukile yalwe olukeno, unene tuu mboka ya pumbwa ekwatho noonkondo. Pashiholelwa, omwiitaali omukokele otashi vulika a sa ezaza nokwa pumbwa okutsuwa omukumo. Omumwameme ngoka ta tekula oyana oye awike nenge ngoka omusamane gwe kee shi omwiitaali otashi vulika a pumbwa ekwatho. Ngoka te ehama nenge e li moonkalo oondhigu otashi vulika a pumbwa okuuva oohapu dholukeno okuza kukuume kopothingo. (Omayeletumbulo 12:25; 17:17) Ngele tatu ningi oonkambadhala dhokuulika olukeno momikalo ndhoka, nena otatu ulike ohole yashili.—2 Aakorinto 8:8.

10. Ohole ohayi tu kwathe ngiini tu kale twa lenga oshili noku yi popya, nuuna kaashi shi oshipu oku shi ninga?

¹⁰ ‘Ohole ohayi nyanyukilwa oshili.’ Omatoloko gamwe otaga ti: ‘Ohole ohayi popile oshili nenyanyu.’ Ohole ohayi tu inyengitha tu dhiginine oshili ‘nokuhokololelathana oshili.’ (Sakaria 8:16) Pashiholelwa, uuna gumwe ngoka tu hole a yona, ohole yokuhola Jehova nomuyoni otayi ke tu kwathela tu kale twa kakatela omithikampango dhaJehova, pehala lyokuholeka eyono lye, oku mu popila nenge tu popye iifundja kombinga yeyono lye. Osha yela kutya otashi ka kala oshidhigu okutaamba ko onkalo ndjoka. Ihe ngele otu na ko nasha nakuume ketu, otatu ka kala twa hala a pewe egeeloputudho lyopahole okuza kuKalunga. (Omayeletumbulo 3:11, 12) Tu li Aakriste aanahole otwa hala wo ‘okweetha iifundja.’—Aaefeso 4:25.

11. Molwaashoka ‘ohole ohayi siikile ayihe,’ otu na okukambadhala tu ninge shike nomapuko gooitaali ooyakwetu?

¹¹ ‘Ohole ohayi siikile ayihe.’ (OB-1954) Petrus gwotango 4:8 ota ti: “Ohole ohayi siikile omayono ogendji.” Eeno, Omukriste ngoka e na ohole ita ka aneka pomutenya omapuko nokwaahagwanenena kwAakriste ooyakwawo. Omathimbo gamwe Aakriste ohaya ningi omapuko omashona ngoka tatu vulu okusiikila nohole.—Omayeletumbulo 10:12; 17:9.

12. Omuyapostoli Paulus okwa li ulike ngiini kutya okwiinekela Filemon, notatu ilongo mo shike moshiholelwa shaPaulus?

 ¹² ‘Ohole ohayi itaale ayihe.’ Etoloko lyaMoffatt olya ti ohole “aluhe oya hala okwiitaala shoka oshiwanawa.” Katu na okukala twa limbililwa omainyengotompelo agehe gaamwatate. Ohole ohayi tu kwathele tu itaale “shoka oshiwanawa” kombinga yaamwatate nokukala twe yi ineekela. * Tala koshiholelwa shoka tashi adhika montumwafo ndjoka Paulus a nyolele Filemon. Ontumwafo ndjoka Paulus okwa li e yi nyola opo a kumagidhe Filemon a taambe ko nombili omupika gwe, Onesimus ngoka a li a ya ondapo, ihe konima okwa ka ninga Omukriste. Paulus ka li a thiminike Filemon, ihe okwe mu lombwele nohole. Okwa li i inekela kutya Filemon ota ka ninga shoka shu uka, sho a ti: “Otandi nyola ndi inekela kutya oto ka ninga shoka tandi ku indile, nonda tseya kutya oto ka ninga oshindji shi vule mpoka.” (Filemon 21) Ngele ohole oye tu inyengitha tu ulike kutya otwi inekela aamwatate, otatu ke ya kwathela ya holole omaukwatya gawo omawanawa.

13. Ongiini tatu vulu okuulika kutya otwa hala iinima yi endele nawa aamwatate?

¹³ ‘Ohole ohayi tegamene ayihe.’ Ohole ihayi tu inyengitha owala tu kale twi inekelathana, ihe ohayi tegamene wo. Omolwohole, ohatu kala tu na etegameno kutya iinima otayi ke endela nawa aamwatate. Pashiholelwa, omumwatate ngele ‘okwa gwile meyono lyontumba,’ otwi inekela kutya ota ka taamba ko omayele gopahole gaamboka taye ke mu pukulula. (Aagalati 6:1) Ohatu kala wo netegameno kutya mboka ya nkundipala pambepo otaya ka hwepopala. Otatu tegelele neidhidhimiko aantu mboka ya hwepopale nokuninga kehe shoka tatu vulu opo tu ya kwathele ya kale neitaalo lya kola. (Aaroma 15:1; 1 Aatessalonika 5:14) Ngele ookuume ketu oya yapuka mo moshili otu na okukala netegameno neinekelo kutya otaye ki iyela ombedhi siku limwe nokugalukila kuJehova  ngaashi omumati a kanene gwomeyele lyaJesus.—Lukas 15:17, 18.

14. Ongiini eidhidhimiko lyetu tali vulu okumakelwa megongalo, nohole otayi ke tu kwathela ngiini tu ungaunge nemakelo ndyoka?

¹⁴ ‘Ohole ohayi idhidhimikile ayihe.’ Eidhidhimiko ohali tu kaleke twa kola uuna tu uvithwa nayi kuyamwe nenge ngele tu li muudhigu. Ihatu uvithwa owala nayi kwaamboka kaaye shi iilyo yegongalo, ihe Aakriste ooyakwetu nayo ohaye tu uvitha nayi omathimbo gamwe omolwokwaahagwanenena. Ngele oya popi oohapu inaadhi dhilwadhilwa nawa otashi vulika shi tu ehameke. (Omayeletumbulo 12:18) Otashi vulika oshinima shimwe megongalo inaashi ungwaungwa nasho momukalo ngoka twa li twa dhiladhila. Omumwatate a simanekwa otashi vulika i ihumbate momukalo gwaa fele notashi vulika twi ipule kutya ‘omolwashike ta ningile ngawo?’ Mbela otatu ke etha po okugongala nokulongela Jehova ngele otwa ningilwa oshinima sha tya ngawo? Ngele otu na ohole itatu ke shi ninga. Otayi ke tu kwathela kaatu gandje eitulomo komapuko gaamwatate ngoka taga vulu oku tu posipaleka kaatu mone omaukwatya gawo omawanawa nenge gegongalo alihe. Otayi ke tu kaleka aadhiginini kuKalunga nokwaambidhidha egongalo kutya nduno yamwe otaya ti shike nenge otaya katuka ngiini omolwokwaahagwanenena.—Episalomi 119:165.

15. Efupa oshike, nongiini ohole hayi tu kwathele tu henuke uukwatya mboka hawu ehameke yamwe pamaiyuvo?

¹⁵ ‘Ohole ihayi si efupa.’ Ngele otu na efupa otashi vulika tu kale twa sila ondumbo iiniwe yayalwe, omayambeko nenge uunkulungu wawo. Efupa lya tya ngaaka, tali ulike iikala yokwiihola mwene, ngele olya kala inaali pangelwa, otali ka yona po ombili yegongalo. Oshike tashi ke tu kwathela tu ekelehi ombepo ‘yuukodhi’? (Jakob 4:5) Paufupi ohole. Uukwatya mbuka uuwanawa otawu ke tu kwathela tu nyanyukwe pamwe naamboka ye na omauwanawa gontumba ngoka tse kaatu na. (Aaroma 12:15) Ohole otayi ke tu kwathela twaaha kale  twa tsila meni ngele yamwe taya pandulwa omolwuunkulungu wawo nenge omolwokupondola kwawo.

16. Ngele otu hole shili aamwatate, omolwashike kaatu na okwiitadhela iilonga yaJehova mbyoka hatu longo?

¹⁶ ‘Ohole ihayi tuwalala.’ Ohole ohayi tu kwathele tu henuke okuninga omaitalitha omolwuunkulungu wetu nenge shoka twa pondola. Ngele otu hole shili aamwatate, mbela otu na okukala tatu itadha omolwokupondola kwetu muukalele nenge molwuuthembahenda mboka tu na megongalo? Iikala ya tya ngaaka itayi tungu, otayi teya yalwe omukumo noku ya ningitha ya kale yu uvite kutya yo kaye shi sha. Ohole ohayi tu kwathele kaatu itadhele omauthembahenda ngoka Kalunga e tu pa. (1 Aakorinto 3:5-9) Komeho gaayihe, ohole “ihayi tuwalala.” Ohayi tu kwathele twaaha kale tu wete tu vule yalwe.—Aaroma 12:3.

17. Ongiini ohole hayi tu inyengitha tu yaalele yalwe, niikala yoludhi luni twa pumbwa okuyanda?

¹⁷ ‘Ohole ihayi holoka nayi.’ Omuntu ngoka hi ihumbata nayi oha ningi iinima tayi yemateke yamwe. Kashi li pahole okuninga ngaaka molwaashoka otashi ulike kutya ku na nomaiyuvo gayalwe nosho wo nonkalonawa yawo. Mepingathano naashoka, ngele otu na ohole otayi ke tu inyengitha tu kale hatu yaalele yalwe. Ohole ohayi kwathele aantu yi ihumbate nawa momukalo ngoka Kalunga a hokwa noya simaneke ooitaali ooyakwawo. Onkee ano, ohole itayi ke tu pitika tu popye “oohapu tadhi sitha ohoni” nenge tu ulike eihumbato kehe ndyoka tali halutha Aakriste ooyakwetu nenge tali ya pundukitha.—Aaefeso 5:3, 4.

18. Omolwashike omuntu omunahole kee na okukomangela iinima ayihe yi ningwe momukalo moka a hala?

¹⁸ ‘Ohole ihayi kongo shayo yene.’ Etoloko limwe otali ti: “Ohole ihayi komangele shoka yi hole.” Omuntu omunahole ke na okukala ha komangele iinima yi ningwe momukalo moka a hala, sha fa ando kutya omadhiladhilo ge aluhe ogo ge li mondjila. Iha heke yamwe mokulongitha uunkulungu we wokutompathana opo a tompe mboka ye na omaetopo ga yooloka kuge. Okukala niikala ya tya ngaaka otaku ulike kutya omuntu  oku na uuntsa, nOmbiimbeli otayi ti: “Uuntsa tau tetekele ehanagulo.” (Omayeletumbulo 16:18) Ngele otu hole aamwatate otatu ka simaneka omataloko gawo, naampoka tashi vulika otatu ka tifuka. Ombepo yokwiigandja otayi tsu kumwe noohapu dhaPaulus tadhi ti: “Inaku kala nando omuntu ta longo owala shoka she mu opalela, ihe na tale wo shoka tashi opalele mukwawo.”—1 Aakorinto 10:24.

19. Ohole ohayi tu kwathele tu inyenge ngiini ngele yalwe ye tu yemateka?

¹⁹ ‘Ohole ihayi dhimbulukwa uuwinayi ye u ningilwa.’ Ohole ihayi dhimbulukwa uuwinayi mboka yamwe ya popya nenge ya ninga. Oshi li paunshitwe okuuva nayi ngele yalwe ye tu yemateka. Ihe nonando otwa geya, ohole otayi ke tu kwathela opo kaatu kale twa geya ethimbo ele. (Aaefeso 4:26, 27) Katu na okukala hatu ndhindhilike oohapu nenge iilonga iiwinayi mbyoka yamwe ye tu ningila twa fa omuntu ta nyola iinima membo lyiipotha opo kee yi dhimbwe. Pehala lyaashono, ohole ohayi tu inyengitha tu holele Kalunga ketu omunahole. Ngaashi twe shi mona mOntopolwa 26, oha dhimine po ngele opu na etompelo oku shi ninga. Ngele e tu dhimine po, oha dhimbwa, ihe iha ndhindhilike omayono ngoka opo e ke tu geele ishewe monakuyiwa. Mbela inatu pandula sho Jehova ihaa dhimbulukwa omayono ngoka hatu ningi?

20. Otu na okwiinyenga ngiini ngele omwiitaali omukwetu okwa gwile meyono nokwa mona iilanduliko yeyono lye?

²⁰ ‘Ohole ihayi nyanyukilwa uugoyoki.’ Etoloko limwe olya toloka oohapu ndhoka tali ti: “Ohole . . . ihayi nyanyukilwa omayono gaantu ooyakwawo.” Etoloko lyaMoffatt olya ti: “Ohole ihayi nyanyukwa ngele yamwe ya yona.” Ohole ihayi nyanyukilwa uugoyoki. Onkee ano, katu na okutala ko omikalo dha nyata kehe onga oshinima inaashi kwata miiti. Otatu ki inyenga ngiini ngele omwiitaali omukwetu okwa yona nokwa mona iilanduliko yeyono lye? Ohole otayi ke tu kwathela twaaha kale twa nyanyukwa, twa fa tatu ti: ‘Onawa naanaa! Okwe shi ilongela!’ (Omayeletumbulo 17:5) Ihe ohatu kala twa nyanyukwa ngele omumwatate ngoka a yona ta katuka oonkatu opo a kale ishewe e na uupambepo uuwanawa.

21-23. (a) Paulus okwa li a hala okutya shike sho a ti kutya “ohole itayi hulu po”? (b) Otatu ka kundathana shike montopolwa yahugunina?

²¹ ‘Ohole itayi hulu po.’ Paulus okwa li a hala okutya shike noohapu ndhoka? Ngaashi shi iwetikile montopolwa 12-13 yAakorinto yotango, Paulus okwa li ta kundathana kombinga yomagano gopambepo ngoka ga li ge niwe kAakriste yomethelemumvo lyotango. Omagano ngoka oga li euliko kutya Kalunga okwa hokwa egongalo epe ndyoka opo lya totwa po. Ihe Aakriste ayehe kaya li ye na omagano gokwaaludha, gokuhunganeka nokupopya omalaka. Shoka ka sha li shi na oshilonga unene molwaashoka omagano ngoka oga li taga ka hula po. Ihe opu na oshinima shilwe itaashi ka hula po shoka Omukriste  kehe ta vulu okukokeka. Oshinima shoka osha tongomana notashi kalelele shi vulithe omagano gopaikumithalonga. Paulus okwe shi ithana “omagano ngoka ge vule omakwawo.” (1 Aakorinto 12:31) “Omagano ngoka ge vule omakwawo” oshike? Ogo ohole.

²² Osha yela kutya ohole yopaKriste ndjoka Paulus a popi “itayi hulu po.” Sigo okunena, ohole yokwiiyambela aamwatate ohayi ndhindhilikitha mo aalanduli yaJesus yashili. Mbela ohole ndjoka katu yi wete momagongalo gaalongeli yaJehova muuyuni auhe? Ohole ndjoka otayi kalelele, molwaashoka Jehova oku uvanekela aapiya ye aadhiginini omwenyo gwaaluhe. (Episalomi 37:9-11, 29) Natu tsikile okuninga ngaashi tatu vulu tu ‘kale nokweenda mohole.’ Ngele tatu shi ningi otatu ka mona enyanyu enene ndyoka hali zi mokugandja. Kakele kaashono, otatu ka kala nomwenyo sigo aluhe nokuulika ohole sigo aluhe twa fa Jehova Kalunga ketu omunahole.

²³ Oshitopolwa shika shahugunina tashi popi kombinga yohole, otwi ilonga mo nkene tu na oku yi ulukilathana. Molwaashoka otwa mona uuwanawa oundji mohole yaJehova, moonkondo dhe, muuyuuki nomuunongo we, oshi li nawa twi ipule kutya ‘ongiini tandi vulu okuulika shili kutya ondi hole Jehova?’ Epulo ndika otali ka yamukulwa montopolwa yahugunina.