Komuleshi omuholike

Jesus okwa li a hiya omulumentu gumwe a ti: ‘Ila u landule ndje.’ (Markus 10:21) Ehiyo ndika nangoye olye ku kwatela mo wo. Mbela owa taamba ko ngaa ehiyo ndyoka? Ngele owe li taamba ko, onkalamwenyo yoye otayi ka kala yi na eityo lyolela. Omolwashike tatu tile ngawo?

Jehova okwa li a tumu Omwana epona kombanda yevi opo e tu kulile. (Johannes 3:16) Kakele owala koku tu kulila, okwe tu ulukile kutya otu na okukala nonkalamwenyo ya tya ngiini. Okwa kala nokunyanyudha omutima gwaHe mukehe shoka ta ningi nokwa kala omudhiginini. Jesus okwe tu ulukila wo nkene tatu vulu okuholela He. Jesus okwa li a popi nokuninga iinima momukalo gwa gwanenena nokwa longo metsokumwe nehalo lyaHe. — Johannes 14:9.

Ombiimbeli otayi ti kutya Jesus okwe tu ‘thigile oshiholelwa tu landule ondjila ndjoka a li e yi ende.’ (1 Petrus 2:21) Ngele owa hala okuhedha popepielela naJehova nowa hala okukala nonkalamwenyo tayi ti sha ngashingeyi nosho wo ngele owa hala okukala mondjila ndjoka tayi fala komwenyo gwaaluhe, owu na okulandula oshiholelwa shoka Kristus a tula po.

Opo wu kale mondjila ndjoka, owa pumbwa okutseya onkalamwenyo yaJesus sho a li kombanda yevi. Onkee ano, owa pumbwa okukonakona nuukeka omahokololo kombinga yaJesus ngoka ge li mOmbiimbeli. Ngele oho tedhatedha iinima mbyoka Jesus a popya naambyoka a ninga noku yi holela, otashi ke ku kwathela wu mone ondjila nkene to vulu oku mu landula.

Embo ndika otali vulu oku ku kwathela wu kokeke ohole yoye yokuhola Jesus naJehova. Ohole ndjoka otayi ke ku inyengitha wu landule oshiholelwa shaJesus opo wu nyanyudhe omutima gwaJehova ngashingeyi nosigo aluhe.