1, 2. Ehiyo lya sheywa lini aantu haya vulu okumona, nomapulo geni tu na okwiipula?

 EHIYO lya sheywa lini wa li wa mono? Otashi vulika to dhiladhila sho wa li wa hiywa koshituthihango shookuume koye kopothingo nenge sho wa li wi ithanwa wu ka tameke iilonga ya simana. Ngele owa li wa mono omahiyo ga tya ngaaka, kapu na omalimbililo kutya owa li wa nyanyukwa nowu uvite wa simanekwa nokuli. Ihe opu na ehiyo limwe lya dhenga mbanda ndyoka wa mona. Kehe gumwe gwomutse okwe li mona. Momukalo moka hatu inyenge kehiyo ndyoka ogwe tu guma unene. Oshi li etokolo lya simanenena ndyoka tu na okuninga monkalamwenyo yetu.

² Ehiyo ndyoka olini? Ehiyo lya za kuJesus Kristus, Omwana awike gwaJehova Kalunga Omunankondoadhihe, ndyoka tali adhika mOmbiimbeli, muMarkus 10:21 tali ti: ‘Ila u landule ndje.’ Ehiyo lyaJesus ndyoka otali hiya kehe gumwe kunena. Otu na okwiipula kutya ‘otandi ki inyenga ngiini?’ Osha yela nale kutya eyamukulo lyoye olini. Ihe mbela opu na ngaa ngoka ta ka tinda ehiyo ndyoka ewanawaelela? Shoka tashi kumitha osho kutya aantu oyendji ohaye li tindi. Omolwashike mbela?

3, 4. (a) Oshike shi holike lela kaantu sha li shi niwe komulumentu ngoka e ya okupula Jesus kombinga yomwenyo gwaaluhe? (b) Omaukwatya omawanawa geni Jesus a li a mono momupangeli ngoka omugundjuka?

³ Natu tale koshiholelwa shomulumentu gumwe a simanekwa unene ngoka a li a mono ehiyo ndyoka omimvo 2 000 dha pita. Omulumentu ngoka a li a tumbalekwa, okwa li omugundjuka, omuyamba noku na oonkondopangelo,  iinima itatu mbyoka yi holike lela nohayi lalakanenwa kaantu. Ombiimbeli otayi hokolola omulumentu ngoka kutya okwa li “omugundjuka,” ye “elenga” (KB) nokwa li “e na eliko olindji.” (Mateus 19:20; Lukas 18:18, 23) Kakele kaashono, omulumentu ngoka okwa li e na uukwatya wa simana noonkondo. Okwa li u uvu kombinga yOmulongi Omunene, Jesus, nokwa li a hokwa shoka u uvu.

⁴ Aapangeli oyendji yopethimbo ndyoka kaya li ya simaneka Jesus. (Johannes 7:48; 12:42) Ihe omulumentu ngoka okwa li e mu simaneka. Ombiimbeli otayi tu lombwele tayi ti: “Jesus sho a zi mo megumbo, okwa tsikile ondjila ye. Omulumentu gumwe okwa matuka, e mu tsakaneke, nokwa tsu oongolo koshipala she e te mu pula: ‘Muhongi omwaanawa, nandi longe shike, ndi mone omwenyo gwaaluhe?’” (Markus 10:17) Omulumentu ngoka okwa li a halelela okupopya naJesus. Sho e mu mono, okwe mu matukile ngaashi naanaa oohepele naantu mboka yi ifupipika ya li haya ningi. Okwa tsile Jesus oongolo nesimaneko shoka tashi ulike kutya omwiifupipiki nokwa hala a kwathelwe pambepo. Jesus okwa li a hokwa uukwatya we mboka uuwanawa. (Mateus 5:3; 18:4) Onkee ano, itashi kumitha sho ‘Jesus e mu tala nohole.’ (Markus 10:21) Okwa li a yamukula epulo lyomugundjuka ngoka ngiini?

5. Jesus okwa yamukula ngiini omugundjuka ngoka omuyamba, notu shi shi ngiini kutya oluhepo halwo lwa li “oshinima shimwe” shoka a li a pumbwa? (Tala enyolo lyopevi.)

⁵ Jesus okwa li u ulike kutya He okwa gandja nale uuyelele kombinga yepulo lya simanenena li na ko nasha noku ka mona omwenyo gwaaluhe. Sho a pula omugundjuka kutya Omanyolo otaga ti shike, omugundjuka okwe shi koleke kutya oha dhiginine Ompango yaMoses. Ihe omolwontseyo ye yomuule, Jesus okwa mono shono shi li momutima gwomugundjuka. (Johannes 2:25) Okwa ndhindhilike kutya  omupangeli ngoka oku na uupyakadhi uunene mboka tawu mu imbi a kale e na ekwatathano ewanawa naKalunga. Jesus okwa ti: “Owa pumbwa oshinima shimwe.” Osha li shike? Okwa ti: “Inda, u ka landithe po iinima yoye ayihe, iimaliwa e to yi pe oohepele.” (Markus 10:21) Mbela Jesus okwa li a hala okutya omuntu oku na okukala kee na sha opo a longele Kalunga? Aawe. * Okwa li te mu lombwele shoka sha simanenena.

6. Jesus okwa li a hiya omugundjuka omuyamba a ti ngiini, nomomukalo moka i inyenge ogwa holola shike kombinga yiikala yomomutima gwe?

⁶ Jesus sho a holola puuyelele shono omulumentu a pumbwa, okwe mu hiya ehiyo li ikalekelwa a ti: ‘Ila u landule ndje.’ Dhiladhila owala kwaashoka, Omwana gwaKalunga Omukombandambanda ta hiya ye mwene omulumentu ngoka e mu landule. Jesus okwe mu uvanekele wo ondjambi kaayi shi okuyelekwa nasha. Okwa ti: “Kala u na eliko megulu.” Mbela omupangeli ngoka okwa li a taamba ko nziya ehiyo ndyoka? Ombiimbeli otayi ti: “Oohapu ndhoka odhe mu alula komwenyo nokwa zi po a nika oluhodhi, oshoka okwa li e na eliko olindji.” (Markus 10:21, 22) Oohapu ndhono Jesus a popi odha holola shoka shi li momutima gwomulumentu ngoka. Osha yela kutya okwa li e hole unene eliko lye nosho wo oonkondopangelo nesimano ndyoka hali pewa aayamba, shi vulithe Kristus. “Oshinima shimwe” shoka a li a pumbwa osho ohole yokuhola Jesus naJehova nomutima aguhe noyokwiiyamba mwene. Molwaashoka omulumentu ngoka ka li e na ohole ndjoka, okwa tindi ehiyo ndyoka li ikalekelwa. Mbela ehiyo ndyoka nangoye olye ku kwatela mo?

7. Omolwashike tu na uushili kutya ehiyo lyaJesus olye tu kwatela mo nokunena?

 ⁷ Jesus ka li owala a hiya omulumentu ngoka nenge aantu aashona. Okwa ti: “Ngele ku na ngoka a hala okulandula ndje, oye ni idhimbwe ye mwene . . . ye na landule ndje.” (Lukas 9:23) Uutumbulilo “ngoka a hala” otawu ulike kutya kehe gumwe ota vulu okuninga omulanduli gwaKristus. Kalunga oye mwene ha hilile mboka ye na omitima dhu uka kOmwana. (Johannes 6:44) Aantu ayehe mboka ya li ko nale naamboka ye li ko pethimbo lyetu oya pewa ompito yokutaamba ko ehiyo lyaJesus kutya nduno aayamba nenge oohepele nopwaahena okutala komihoko nenge kiigwana moka ya za. Onkee ano, oohapu dhaJesus ‘ila u landule ndje’ nangoye odhe ku kwatela mo. Omolwashike wa hala okulandula Jesus? Osha kwatela mo shike oku mu landula?

8. Atuheni otwa pumbwa shike, nomolwashike?

⁸ Otu na okuzimina oshili kutya otwa pumbwa ewiliko li li nawa. Haantu ayehe haya zimine ompumbwe ndjoka, ihe otwe li pumbwa. Omupolofeti gwaJehova, Jeremia okwa nwethwa mo a nyole oshili ndjika a ti: “OMUWA, ondi shi shi kutya omuntu iha vulu okupangela shoka u uthilwa; kaku na omuntu hu utha okukalamwenyo kwe.” (Jeremia 10:23) Aantu itaya vulu okwiipangela yo yene nokaye na uuthemba woku shi ninga. Ondjokonona oye shi ulika shili kutya okupangela kwaantu inaku pondola. (Omuuvithi 8:9) Aawiliki yopethimbo lyaJesus oya li haya thindile aantu kongudhi, haye ya hepeke nohaye ya pukitha. Jesus okwa li a mono kutya aantu yowala oya li ya fa “oonzi dhaa na omusita.” (Markus 6:34) Aawiliki yokunena nayo osho ye li ngaaka. Atuheni otwa pumbwa ewiliko ndyoka tatu vulu okwiinekela nokusimaneka. Mbela Jesus okwa li a gwanitha po ompumbwe ndjoka? Eeno, natu tale kutya omolwashike tatu tile ngawo.

9. Jesus okwa yooloka ko ngiini kaawiliki yalwe ayehe?

 ⁹ Etompelo lyotango, Jesus okwa hogololwa kuJehova Kalunga. Aawiliki yopantu oyendji oya hogololwa kaantu ooyakwawo inaaya gwanenena mboka olundji haya kala ya pukithwa nohaya dhiladhila pambambo. Ihe Jesus okwa yooloka ko kaawiliki yalwe. Omadhinasimaneko ge “Kristus” nosho wo “Mesiasa” otage shi koleke molwaashoka otaga ti “Omugwayekwa.” Eeno, ye omugwayekwa nenge okwa hogololwa kOmuwa Omunamapangeloagehe a kale pondondo yi ikalekelwa. Jehova Kalunga okwe mu popi a ti: “Nguka oye omuntu gwandje nde mu hogolola. Oye ngoka ndi mu hole nonde mu hokwa. Ngame otandi mu tula Ombepo yandje.” (Mateus 12:18) Omushiti gwetu, Jehova, oye owala ta vulu okutseya omuwiliki ngoka a gwana oku tu wilika. Uunongo we kawu shi okuyelekwa, onkee ano, otu na etompelo lya kola okwiinekela ehogololo lye. — Omayeletumbulo 3:5, 6.

10. Omolwashike oshiholelwa shaJesus sha dhenga mbanda shi shi okulandulwa?

¹⁰ Etompelo etiyali, Jesus okwe tu tulila po oshiholelwa sha gwanenena nosha dhenga mbanda. Omuwiliki omwaanawa oku na uukwatya mboka aalelwa ye ya hokwa notaya vulu oku wu holela. Oha tula po oshiholelwa oshiwanawa noha nwetha mo yalwe ya hwepopale. Owa hala omuwiliki e na omaukwatya geni? Uulaadhi? Uunongo? Olukeno? Nenge owa hala a kale omwiidhidhimiki ngele a taalelwa kuudhigu? Sho to lesha kombinga yonkalamwenyo yaJesus yokombanda yevi, oto ka mona kutya okwa li e na omaukwatya ngoka nosho wo galwe. Okwa li e na uukwatya wa fa waHe thiluthilu. Okwa li omuntu a gwanenena mukehe shimwe. Otatu vulu okuholela iilonga ye, oohapu dhe nomaiyuvo ge gomeni ngono a holola. Ombiimbeli otayi ti kutya ‘okwe tu thigila oshiholelwa tu landule ondjila ndjoka a li e yi ende.’ — 1 Petrus 2:21.

11. Ongiini Jesus u ulike kutya ye ‘omusita omwaanawa’?

¹¹ Etompelo etitatu, Kristus okwa gwanitha po lela oohapu dhe ndhoka tadhi ti: ‘Ngame omusita omwaanawa.’  (Johannes 10:14) Aantu pethimbo lyOmbiimbeli oya li ya tseya nawa omupopyofano ngoka. Aasita yoonzi oya li haya longo nuudhiginini mokusila oshimpwiyu oonzi dhawo. ‘Omusita omwaanawa’ ihi ipula unene nuuwanawa we, ihe oha kala e na ko nasha nuusita we noku wu gamena. Pashiholelwa, hekulululwa yaJesus, David okwa li omusita pethimbo lyuugundjuka we nokwa li a tula omwenyo gwe moshiponga lwiikando opo a gamene oonzi dhe kiilikama. (1 Samuel 17:34-36) Jesus okwa li wo a ningile aalanduli ye oshindji. Okwa si omolwawo. (Johannes 10:15) Aawiliki yangapi ye na ombepo yeiyambo ngaashi ndjoka?

12, 13. (a) Omeityo lini omusita e shi oonzi dhe, noonzi dhe odhi mu shi ngiini? (b) Omolwashike wa hala okukala wu li kohi yewiliko lyOmusita Omwaanawa?

¹² Jesus oku li ‘omusita omwaanawa’ meityo lilwe. Okwa ti: “Oonzi dhandje ondi dhi shi nadho odhi shi ndje.” (Johannes 10:15) Dhiladhila keityo lyoohapu dhe ndhoka. Omuntu shampa a tala uusita woonzi otashi vulika a dhiladhile kutya ihadhi silwa oshimpwiyu pauhandimwe. Ihe omusita gwadho oku shi onzi kehe. Oha kala e shi kutya ndhoka oosimba odha pumbwa ekwatho lye ngele dha vala, oku shi kutya uunzigona owu na okuhumbatwa molwaashoka uushona noitawu vulu okweenda, oha kala wo e shi ndhoka tadhi ehama nenge dhe ehamekwa kusha. Oonzi nadho odhi mu shi. Odhi shi ewi lye noihadhi li tompakanitha nando nolyaasita yalwe. Ngele okwe dhi hikile omwilwa te dhi londodha ohadhi ya kuye nziya. Ohadhi mu landula kehe mpoka ta yi noha kala e shi mpoka e na oku dhi fala. Oku shi mpoka pu na omwiidhi omutalala nogwa ziza nawa, mpoka pu na omeya omandjengwa naampoka tadhi vulu okukala megameno. Ohadhi kala dhu uvite dha gamenwa sho te dhi litha. — Episalomi 23.

¹³ Mbela ino hala omuwiliki a tya ngawo? Omusita Omwaanawa oku na uukwatya itaawu yelekwa nasha ngele tashi ya pokuungaunga nomulanduli gwe kehe. Oku uvaneka oku ke  ku pa onkalamwenyo yinyanyudha noyombili ngashingeyi nomonakuyiwa. (Johannes 10:10, 11; Ehololo 7:16, 17) Onkee ano, otwa pumbwa okutseya lela shoka sha kwatelwa mokulandula Kristus.

14, 15. Omolwashike inaashi gwana owala okutya ngoye omulanduli gwaKristus nenge owu na ekwatathano lyopothingo naye?

¹⁴ Aantu oyendji kunena oyu uvite kutya oya taamba ko ehiyo lyaKristus. Ohayi iyithana nokuli kutya yo Aakriste. Otashi vulika ye li moongeleka moka ya shashithilwa kaavali yawo. Nenge otashi vulika yu uvite ye na ekwatathano lyopothingo naJesus noye mu taamba ko e li Omuhupithi gwawo. Ihe mbela shono otashi ya ningitha ngaa aalanduli yaKristus? Osho mbela Jesus a li e na momadhiladhilo sho e tu hiya tu ninge aalanduli ye? Opu na oshindji sha kwatelwa mo.

¹⁵ Dhiladhila kUukwakriste nenge iigwana moka oyendji hayi iti aalanduli yaKristus. Mbela Uukwakriste ohawu tula ngaa miilonga omalongo gaJesus Kristus? Nenge mbela miilongo moka katu wete mo uutondwe, ethindilo kongudhi, aalongi yiikulumuna nokwaahenuuyuuki ngaashi naanaa shi li muuyuni auhe? Omuwiliki Omuhindu a simanekwa, Mohandas Gandhi okwa tile: “Kandi shi omuntu gulwe ngoka a ningile aantu uuwanawa owundji kee shi Jesus. Kapu na sha sha puka nUukwakriste.” Okwa tsikile ko a ti: “Ihe uupyakadhi owu li owala kune Aakriste. Ihamu landula omalongo geni.”

16, 17. Olundji mboka hayi iti Aakriste oya pumbwa shike, noshike hashi ndhindhilikitha aalanduli yashili yaKristus?

¹⁶ Jesus okwa ti kutya aalanduli ye yashili otaya ka tseyika omolwiilonga yawo, ihe hangele tayi iti kutya oye li aalanduli ye. Pashiholelwa, okwa ti: “Hakehe ngoka ti ithana ndje ‘Omuwa, Omuwa,’ ta yi mOshilongo shegulu, aawe, oye tuu ngoka ta gwanitha ehalo lyaTate yomegulu.” (Mateus 7:21) Omolwashike oyendji mbono hayi ithana Jesus Omuwa gwawo ihaaya longo ehalo lyaHe? Olundji mboka hayi iti kutya  Aakriste, ‘oya pumbwa oshinima shimwe,’ okukala ye hole nomutima aguhe Jesus naaNgoka e mu tumu. Omupangeli omuyamba naye osho a li a pumbwa.

¹⁷ Shika otashi vulika ngiini? Mbela aantu oomiliyona mboka hayi ithana Aakriste, ihaya ti wo kutya oye hole Kristus? Osho haya ti. Ihe ohole yokuhola Jesus naJehova oya kwatela mo oshindji kakele owala kokutya otu ya hole. Jesus okwa ti: “Oongoka e hole ndje, ota vulika koohapu dhandje.” (Johannes 14:23) E li omusita okwa gwedha ko a ti: “Oonzi dhandje ohadhi uvu ewi lyandje; ngame ondi dhi shi, odho notadhi landula ndje.” (Johannes 10:27) Osha yela kutya ohole yetu yashili yokuhola Kristus itatu vulu owala oku yi ulika mokupopya kwetu nenge momaiyuvo getu, ihe omiilonga.

18, 19. (a) Okwiilonga kombinga yaJesus oshi na oku tu guma ngiini? (b) Elalakano lyembo ndika olya shike, notali etele ngiini uuwanawa mbono ya kala ethimbo ele nokudhiladhila kutya oye li aalanduli yaKristus?

¹⁸ Iilonga yetu ohayi ulike uuntu wetu womeni. Onkene otu na oku wu dheula nawa. Jesus okwa ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Ohashi gumu omitima dhetu uuna tatu ilongo ontseyo yashili nokutedhatedha kombinga yaJesus. Otatu ka kala tu mu hole shili, notashi ka kokeka mutse ehalo enenenene lyoku mu landula esiku nesiku.

¹⁹ Embo ndika otali tu kwathele tu kokeke ehalo ndyoka mutse. Itali popi ondjokonona yonkalamwenyo ayihe yaJesus nuukalele we, ihe otali tu kwathele tu mone lela nkene tu na oku mu landula. * Olya nuninwa oku tu kwathela tu italele mesipili lyOohapu dhaKalunga nokwiipula kutya ‘mbela onda landula ngaa shili Jesus?’ (Jakob 1:23-25) Otashi vulika wa kala to dhiladhila ethimbo ele kutya owu li onzi ndjoka tayi tonatelwa kOmusita Omwaanawa. Mbela ito shi zimine  kutya onkalamwenyo yetu otayi ka hwepopala uuna tatu mu landula? Ombiimbeli otayi tu ladhipike tayi ti: “Ikonakoneni, ne mu iyeleke, opo mu tale, ngele omu li tuu meitaalo.” (2 Aakorinto 13:5) Otwa pumbwa shili okulongitha oonkondo dhetu tu shilipaleke kutya otatu wilikwa kOmusita Omwaanawa, omunahole, Jesus, ngono a hogololwa kuJehova mwene e tu wilike.

20. Oshike tatu ka konakona montopolwa tayi landula?

²⁰ Okukonakona embo ndika naku ku kwathele wu kokeke ohole yoye yokuhola Jesus naJehova. Sho ohole ndjoka tayi ku wilike monkalamweyo yoye, oto ka kala wa mbilipalelwa lela nowa gwanenwa shili muuyuni mbuka wa kulupa noto ka hambelela Jehova sigo aluhe sho e tu pa Omusita Omwaanawa. Eeno, okwiilonga kwetu kombinga yaJesus oku na okukala kwa kankamena kekankameno lyashili. Onkee ano, oshe eleka sho mOntopolwa onti-2 tatu ka konakona onkandangala ndjoka Jesus ta dhana mokugwanitha po elalakano lyaJehova.