1, 2. Omolwashike he omunahole ha kala a nyanyukwa okumona okamwana taka vulika kuye, nomaiyuvo ge otaga ulike ngiini nkene Jehova ha kala e uvite?

 OMUSAMANE gumwe okwa li a tala sho okamwanamati taka dhana etanga molugumbo nuukwawo. Okamati kamwe oka thanga etanga ka nana e tali nuka lyu uka koshitauwa. Okamati komegumbo oka li take li tala nawa sho tali ngoongola moshitauwa. Kuume kako gumwe okwe ka ladhipike ka tondoke ke ke li tale mo, ihe oki ipuku owala komutse. Oka ti: “Inandi pitikwa ndi ye koshitauwa.” He okwa tameke okwiimemeha sho e shi mono.

² Omolwashike he a li a nyanyukwa? Omolwaashoka okwe ka lombwela kutya kake na okweenda moshitauwa oko akeke. Sho okamati ka vulika, nonando kaka li ke shi kutya he ote ka tala, he okwa li e shi kutya okamwana otaki ilongo evuliko, naashoka otashi ke ka gamena. Omusamane ngoka okwa li uvite naanaa ngaashi Tate yetu gwomegulu, Jehova. Oku shi kutya ngele otwa kala aadhiginini notwa hala oku ka mona onakuyiwa ombwanawa ndjoka e tu pungulila, otu na oku mu inekela nokuvulika kuye. (Omayeletumbulo 3:5, 6) Opo tu shi ninge okwe tu tumina omulongi dhingi e vule aalongi ayehe yopantu.

3, 4. Gandja ethaneko kutya ongiini Jesus ‘i ilongo evuliko’ nongiini a li a “gwanitha ayihe”?

³ Ombiimbeli otayi popi oshinima oshikumithi kombinga yaJesus tayi ti: “Oye nando okwa li Omuna gwaKalunga, omahepeko oge mu longo okuvulika. Oye sho a gwanitha ayihe, okwa ningi oluthithiya lwehupitho lyaaluhe, olyaayehe mboka taa vulika kuye.” (Aahebeli 5:8, 9) Jesus okwa kala megulu uule woomvula odhindjidhindji. Okwa mona nkene Satana naayengeli ye ya tukulile He oshipotha, ihe ini imbwanga mumwe nayo. Ehunganeko lya nwethwa mo otali  mu popi noohapu ndhika tali ti: “Ngame inandi mu tinda.” (Jesaja 50:5) Ihe ongiini Omwana ngoka ha vulika lela kuHe taku tiwa kutya ‘okwi ilongo evuliko’? Ongiini omushitwa ngoka a gwanenena a “gwanitha ayihe”?

⁴ Natu tye nduno omutholomi gwoondhopi okwa landa oshitholomo oshipe, shoka sha kola. Ihe ongiini ta ka tseya shili kutya osha kola? Nonando otashi monika sha kola, okukola kwasho ote ke ku mona owala ngele a tameke oku shi longitha. Sha faathana, Jesus manga inee ya kombanda yevi okwa li a vulika kuHe thiluthilu. Ihe konima sho e ya kombanda yevi, okwa vulika momukalo gwi ili molwaashoka okwa li a tsakaneke oonkalo oondhigu ndhoka inaa pita nando onale mudho sho a li megulu.

5. Oshike sha ningitha evuliko lyaJesus li kale lya simana, notatu ka konakona shike montopolwa ndjika?

⁵ Evuliko olya li oshinima sha simanenena kuJesus sho e ya kombanda yevi. E li “Adam ngoka a hugunine,” okwe ya okulonga shoka aavali yetu yotango ya nyengwa okuninga, sha hala okutya, okuvulika kuJehova Kalunga, nonando okwa li a hepekwa. (1 Aakorinto 15:45) Evuliko lye kalya li owala lyokwiimonikitha. Okwa li a vulika nomutima aguhe, nomwenyo gwe aguhe nonomadhiladhilo ge agehe. Okwe shi ningi nenyanyu. Okwa li a simaneka unene okulonga ehalo lyaHe shi vulithe okulya. (Johannes 4:34) Oshike tashi ke tu kwathela tu holele evuliko lye? Natu tale tango shoka sha li hashi mu inyengitha a vulike. Okukokeka iikala ya fa ye otaku ke tu kwathela tu kondjithe omamakelo nokulonga ehalo lyaKalunga. Natu tale kuuwanawa wumwe mboka tatu ka mona ngele tatu vulika ngaashi Kristus.

6, 7. Iinima yimwe yini ya li yi inyengitha Jesus a vulike?

⁶ Jesus okwa vulika omolwuukwatya uuwanawa mboka wu li momutima gwe. Ngaashi twe shi mono mOntopolwa onti-3, oku li omwiifupipiki. Uuntsa ohawu ningitha aantu ya kale nondhino, ihe eifupipiko ohali tu kwathele tu vulike  nehalo ewanawa kuJehova. (Eksodus 5:1, 2; 1 Petrus 5:5, 6) Natango, evuliko lyaJesus olya hololwa kwaashoka e hole naashoka e tonde.

⁷ Jesus oku hole unene He gwomegulu, Jehova. Ohole ndjoka otayi ka kundathanwa nawa mOntopolwa 13. Oyo ye mu kwathele a kale he mu tila. Oku hole Jehova unene noonkondo shoka she mu ningitha a kale a tila oku mu yemateka. Omolwetilo ndyoka, Jehova oha pulakene komagalikano ge. (Aahebeli 5:7) Okutila Jehova okwo wo kwe mu ndhindhilikitha kutya oye Omukwaniilwa gwopaMesiasa. — Jesaja 11:3.

8, 9. Ngaashi sha hunganekwa, Jesus okwa li e uvitile ngiini uuyuuki nosho wo uukolokoshi, nokwe shi ulike ngiini?

⁸ Ngele otu hole Jehova otatu ka tonda wo shoka e tonde. Pashiholelwa, tala kehunganeko ndika tali popi Omukwaniilwa gwopaMesiasa tali ti: “Ou hole shoka shu uka nou tonde uuwinayi. Onkee Kalunga, Kalunga koye, e ku hogolola nokwe  ku tilile eyambeko olindji, u vule omukwaniilwa kehe.” (Episalomi 45:7) Jesus oku vule ‘aakwaniilwa ayehe’ yomezimo lyaDavid. Jesus pethimbo lyokugwayekwa kwe a ninge omukwaniilwa okwa yambekwa e vule aakwaniilwa ayehe. Omolwashike mbela? Omolwaashoka ondjambi ndjoka a pewa onene yi vule yawo, nelelo lye otali ke etela aantu ayehe uuwanawa owundji. Okwe yi pewa molwaashoka oku hole uuyuuki noku tonde uukolokoshi noha vulika kuHe miinima ayihe.

⁹ Jesus okwa holola ngiini nkene ha kala e uvitile uuyuuki nosho wo uukolokoshi? Pashiholelwa, okwa li u uvite ngiini sho aalongwa ye ya vulika kelombwelo lye ye ku uvithe e taya mono iizemo iiwanawa? Okwa li a nyanyukwa unene. (Lukas 10:1, 17, 21) Okwa li u uvite ngiini sho aantu muJerusalem ya li yu ulike ombepo yokwaahavulika noinaya taamba ko oonkambadhala ndhoka a ningi pahole e ya kwathele? Okwa lili omolwuunashipotha wawo. (Lukas 19:41, 42) Okwa li a hokwa eihumbato lyawo ewanawa nokwa li ti ipula wo neihumbato lyayamwe ndyoka ewinayi.

10. Otwa pumbwa okukokeka iikala yini yaashoka shu uka naashoka sha puka, noshike tashi ke tu kwathela tu shi ninge?

¹⁰ Okutedhatedha komaiyuvo gaJesus otashi tu kwathele tu konakone omainyengotompelo getu gokuvulika kuJehova. Nonando inatu gwanenena, otatu vulu okukokeka ohole yaashoka oshiwanawa nokutonda thiluthilu shoka oshiwinayi. Otwa pumbwa okugalikana kuJehova e tu kwathele tu kokeke omaiyuvo ga fa ge nogOmwana. (Episalomi 51:10) Otwa pumbwa wo okuyanda omanwethomo ngoka haga nkundipaleke eiyuvo lyetu. Osha simanenena okuhogolola nuukeka omainyanyudho nosho wo mboka hatu endathana nayo. (Omayeletumbulo 13:20; Aafilippi 4:8) Ngele otwa kokeke iikala ya fa yaKristus, evuliko lyetu itali ka kala owala lyokombanda. Otatu ka longa shoka shu uka molwaashoka otu hole oku shi ninga. Itatu ka yanda owala iilonga ya puka molwaashoka twa tila okukwatwa, ihe omolwaashoka tu yi tonde.

11, 12. (a) Oshike sha li sha ningilwa Jesus petameko lyuukalele we? (b) Iineya yini Satana a li a longitha mokumakela Jesus?

¹¹ Nonando Jesus oku tonde okuyona okwa li a makelwa petameko lyuukalele we. Konima sho a ninginithwa okwa kala mombuga omasiku 40 inaa lya sha, omutenya nuusiku. Pehulilo lyomasiku ngoka, Satana okwe ya oku mu makela. Tala kiineya mbyoka a longitha. — Mateus 4:1-11.

¹² Tango, Satana okwa ti: “Ngele ngoye Omuna gwaKalunga, lombwela omamanya ngaka, ga shituke iikwiila.” (Mateus 4:3) Mbela Jesus okwa li u uvite ngiini sho a kala ethimbo ele inaa lya sha? Ombiimbeli otayi ti: “Okwa li a sa ondjala.” (Mateus 4:2) Satana okwa li a tegelele sigo Jesus e etwa mo naanaa kondjala opo e mu makele nawa niikulya. Ndhindhilika nkene Satana e mu sheke ta ti: ‘Ngele ngoye Omuna gwaKalunga.’ Okwa li e shi kutya Jesus “oye omutango gwiishitwa ayihe.” (Aakolossa 1:15) Natango, Jesus ine etha Satana e mu hongolole. Jesus okwa li e shi kutya Kalunga ina hala a longithe oonkondo dhe nelalakano lyokwiihola mwene. Okwa tindi oku shi ninga shoka tashi ulike kutya okwi inekela Jehova e mu sile oshimpwiyu palutu noku mu wilike. — Mateus 4:4.

13-15. (a) Oshikando oshitiyali noshititatu Satana okwa makele Jesus nashike, naJesus okwi inyenge ngiini? (b) Otu shi shi ngiini kutya Jesus ine etha nando Satana a teye po uudhiginini we?

¹³ Oshikando oshitiyali, Satana okwa londeke Jesus koshihoko shotempeli. Okwa pengitha Oohapu dhaKalunga sho a lombwele Jesus i iyundulile pevi, oshoka aayengeli otaye mu hupitha. Andola Jesus okwa longele oshikumithalonga shoka, mbela aantu mboka ya li motempeli ando oya kala ngaa ya limbililwa kutya oye Mesiasa omuuvanekwa? Ngele aantu oyi itaale kutya oye Mesiasa molwaashoka a longo iikumithalonga, mbela ando itaya kala ya tila oku mu longela uuwinayi? Otashi vulika. Jesus okwa li e shi kutya Jehova okwa hala Mesiasa a longe iilonga ye momukalo gweifupipiko, ihe haku heka aantu ye mu itaale okupitila miikumithalonga. (Jesaja  42:1, 2) Natango, Jesus okwa li a vulika kuJehova noina yulwa komwigo gwokukala a tumbala.

¹⁴ Ongiini shi na ko nasha nomwigo kutya ota ningwa omupangeli? Oshikando oshititatu, Satana okwa ti kutya ota pe Jesus omapangelo agehe gomuuyuni ngele ote mu galikana. Mbela Jesus okwa li e shi zimine? Okwa yamukula a ti: “Za po, Satana.” Okwa gwedha ko a ti: “Okwa nyolwa: ‘Omuwa Kalunga koye oye awike u na oku mu galikana noye awike u na oku mu longela.’” (Mateus 4:10) Kapwa li ngoka ta vulu okuheka Jesus a galikane kalunga kalwe. Oonkondopangelo ndhoka a li ta pewa inadhi mu imba a kale ha vulika kuKalunga.

¹⁵ Mbela Satana okwa li a si uunye? Okwa zi po ngaashi Jesus e mu lombwele. Ihe Evaangeli lyaLukas otali ti kutya Ondiaboli oye mu “thigi po manga.” (Lukas 4:13) Satana okwa li a kongo oompito dhilwe a makele Jesus sigo omeso lye. Ombiimbeli otayi tu lombwele kutya Jesus okwa ‘makelwa miinima ayihe.’ (Aahebeli 4:15) Ihe ine etha nando Satana a teye po uudhiginini we, natse osho tu na okuninga.

16. Satana oha makele ngiini aapiya yaKalunga kunena, nongiini tatu vulu okweekelahi iineya ye?

¹⁶ Satana ota tsikile nokumakela aapiya yaKalunga kunena. Shinikitha oluhodhi, okwaahagwanenena kwetu ohaku tu ningitha nuupu iihakanwa ye. Iineya ye ohayi kwata unene mboka yi ihole, ye na uuntsa notaya lalakanene oonkondopangelo. Oha longitha omwigo gwomaliko opo e tu kwate ko omboko niinima ayihe mbyoka pethimbo limwe. Osha simanenena omathimbo gamwe twi ikonakone nawa. Oshi li nawa tu tedhatedhe koohapu ndhoka dhi li muJohannes gwotango 2:15-17. Ngele tatu shi ningi, otashi vulika twi ipule ngele okahalu kwopantu kokuhola iinima yuuyuni, okulalakanena omaliko, nuutumbendundu oya nkundipaleka ohole yetu yokuhola Tate yetu gwomegulu. Uuyuni mbuka owu li pokuhula po, ngaashi omupangeli gwawo Satana. Natu ekelehi oomwigo dhiineya ndhoka ha tege e tu yule e tatu landula  oshiholelwa shOmulongi gwetu ngoka inaa “yona nando.” — 1 Petrus 2:22.

17. Jesus okwa li a tala ko ngiini okuvulika kuHe, ihe yamwe otashi vulika ya dhiladhile ngiini?

¹⁷ Evuliko olya kwatela mo oshindji kaashi shi owala okuhenuka okulonga uulunde. Kristus okwa li a gwanitha po omalombwelo gaHe. Okwa ti: “Otandi longo aluhe shoka she mu opalela.” (Johannes 8:29) Evuliko olya li lye mu etele enyanyu enene. Yamwe otashi vulika ya tye oshipu kuye okuvulika. Otashi vulika ya dhiladhile kutya ye oku na owala okuvulika kuJehova ngoka a gwanenena, omanga tse tu na okuvulika kaapangeli yopantu mboka inaaya gwanenena. Ihe oshili oyo kutya Jesus okwa li a vulika nokaapangeli yopantu inaaya gwanenena.

18. Jesus okwa tula po oshiholelwa shini shevuliko sho a li omugundjuka?

¹⁸ Sho ta putuka Jesus okwa li e na okuvulika kaavali ye yopantu Josef naMaria mboka inaaya gwanenena. Otashi vulika a li ha mono uusama wontumba nowongandi muyo ngaashi owala aanona oyendji kunena. Mbela okwa li ihaa vulika kuyo nenge e ya lombwele nkene ye na okuungaunga nuukwanegumbo? Tala nkene Lukas 2:51 ta popi Jesus sho a li e na omimvo 12 ta ti: ‘Okwa kala ha vulika kuyo.’ Okwa tulila po aagundjuka Aakriste oshiholelwa dhingi mboka taya kambadhala okuvulika kaavali yawo noku ya simaneka. — Aaefeso 6:1, 2.

19, 20. (a) Jesus okwa li a taalela omamakelo gi ikalekelwa geni ge na ko nasha nokuvulika kaantu inaaya gwanenena? (b) Omolwashike Aakriste yashili kunena ye na okuvulika kaakwatelikomeho yawo?

¹⁹ Jesus okwa li a taalela eshongo ndyoka Aakriste yashili itaaya ka tsakaneka nando, lyokuvulika kaantu inaaya gwanenena. Ye okwa li ko methimbo inaali fa ndika tu li. Jehova okwa kala a hokwa elongelokalunga lyOshijuda nosho wo otempeli yalyo ndjoka ya li muJerusalem naasaaseri yawo, ihe oya li tayi ka hulithwa po nokupingenwa po nelongelokalunga  lyopaKriste. (Mateus 23:33-38) Mokweendela ko kwethimbo, oyendji yomaawiliki yelongelokalunga oya li ya longo aantu iifundja ya kankamena kuufilosofi wOshigreka. Motempeli omwa li tamu longwa uulingilingi owundji nomolwaasho Jesus e yi ithana “ombogo yaayugi.” (Markus 11:17) Mbela Jesus okwa li e etha po okuya kotempeli nokosinagoga? Aawe! Jehova okwa li natango ta longitha elongekidho ndyoka. Jesus okwa kala ha yi kiituthi mbyoka ya kala hayi ningwa potempeli noposinagoga sigo oosho Kalunga a katuka onkatu a ninge po omalunduluko. — Lukas 4:16; Johannes 5:1.

²⁰ Ngele Jesus okwa kala ha vulika moonkalo dha tya ngaaka, Aakriste yashili nayo oye na okuvulika kunena. Otu li shili methimbo lyi ili ndyoka lya hunganekwa nale lyokutungulula elongelokalunga lya yogoka. Kalunga okwa shilipaleka kutya ita ka pitika nando Satana a yone po oshigwana she shoka sha yogoka. (Jesaja 2:1, 2; 54:17) Odhoshili kutya aantu nomegongalo lyopaKriste ohaya yono molwaashoka inaya gwanenena. Ihe mbela otu na okweetha po okuvulika kuJehova omolwomapuko gayalwe, tashi vulika tu ethe po okugongala kopaKriste nenge tu pe aakuluntugongalo uusama? Hasho nando. Otu na okwaambidhidha nomutima aguhe mboka taya  kwatele komeho megongalo. Otu na okuvulika nokukala pokugongala kwopaKriste, piigongi nokutula miilonga omayele gopamanyolo ngoka hatu pewa po. — Aahebeli 10:24, 25; 13:17.

21. Jesus okwi inyenge ngiini sho a li ta thininikwa kaaha vulike kuKalunga, nokwe tu tulila po oshiholelwa shini?

²¹ Jesus ina pitika nando aantu nookuume ke mboka ya li ye na omainyengotompelo omawanawa ye mu imbe a vulike kuJehova. Pashiholelwa, omuyapostoli Petrus okwa li a kambadhala okwiitaalitha Jesus kutya inashi pumbiwa a mone iihuna nokusa. Ihe okwe ekelehi omayele gaPetrus ngoka ga li ga fa taga longo sho a ti kutya Jesus ni iyetele ohenda. (Mateus 16:21-23) Kunena aalanduli yaJesus olundji ohayu ungaunga naakwanezimo mboka haya kambadhala oku ya hongolola ye ethe po oompango nomakotampango gaKalunga. Ngaashi aalanduli yaJesus yomethelemumvo lyotango, natse otwa tokola toko “okuvulika kuKalunga, hakaantu.” — Iilonga 5:29.

22. Jesus okwa gandja eyamukulo kepulo lini, nongiini?

²² Evuliko lyaJesus olya li lya makelwa unene sho a taalela eso. Okwa li ‘i ilongo evuliko’ shi vulithe nale. Okwa longo ehalo lyaHe, ihe haandyoka lye mwene. (Lukas 22:42) Okwa tula po oshiholelwa sha gwanenena shuudhiginini sho a piti momamakelo ngoka. (1 Timoteus 3:16) Okwa yamukula epulo ndyoka lya kala uule womimvo kutya: Omuntu a gwanenena ota vulu ngaa okuvulika kuJehova uuna ta makelwa? Adam naEva inaya vulika kuye. Ihe Jesus okwe ya kombanda yevi a se opo u ukithe iinima. Jesus, oshishitwa shaJehova shoka shi vule iishitwa ayihe, okwa gandja eyamukulo lya yela. Okwa li a vulika nonando okwa hepekwa nokudhipagwa.

23-25. (a) Okuvulika okwa pambathana ngiini nuudhiginini? Shi yelitha. (b) Otatu ka konakona shike montopolwa tayi landula?

²³ Uudhiginini nenge okuvulika nomutima aguhe kuJehova,  ohaku ulikwa okupitila mevuliko. Molwaashoka Jesus okwa li a vulika nokwa kala a kanyatela uudhiginini we, oshe etele aantu ayehe uuwanawa. (Aaroma 5:19) Jehova okwe mu yambeke noonkondo. Ote ke tu yambeka wo ngele tatu vulika kuKristus Omuwa gwetu. Okuvulika kuKristus otaku ke tu petha ‘ehupitho lyaaluhe.’ — Aahebeli 5:9.

²⁴ Ngele otwa kala aadhiginini otatu ka pewa ondjambi. Omayeletumbulo 10:9 otaga ti: “Ngoka te ende pauyuuki, ote ende kee na mbudhi.” Ngele otwa kala tatu ende pauyuuki onkatu yetu kehe otayi vulu okufaathanithwa netungo enene lya tungwa noondhopi dha kola, onkatu yetu kehe otayi vulu okuyelekanithwa nondhopi kehe. Ondhopi yimwe otashi vulika yi kale tayi monika ya fa kaayi na oshilonga, ihe kehe yimwe oyi na ongushu kaaku na we. Ngele oondhopi odhindji odha tentekwa kumwe, ohadhi thikameke po etungo li na ongushu. Okukala hatu vulika esiku nesiku, omumvo nomumvo otashi ke tu kwathela tu kale aadhiginini shili.

²⁵ Ngele omuntu okwa kala omuvuliki uule wethimbo, oha kokeke uukwatya wumwe wa simana: eidhidhimiko. Ontopolwa tayi landula otayi ka kundathana oshiholelwa shaJesus sheidhidhimiko.