1-3. (a) Jesus okwa li u uvite uuwehame wu thike peni moshikunino shaGetsemane, noshike a li ti ipula unene nasho? (b) Jesus okwa tula po oshiholelwa shini sheidhidhimiko, naashika osha pendutha omapulo geni?

 JESUS okwa li muudhigu uunene mboka inaa mona nando onale. Okwa li a gwililwa po pamadhiladhilo nokwa lulilwa noonkondo. Ethimbo lyokusa kwe olya thikana. Okwa yi pamwe naayapostoli ye koshikunino shaGetsemane hoka ya li haya tsakanene olundji. Ihe ongulohi ndjoka okwa li a pumbwa okukala oye awike. Okwa zi po paayapostoli ye okakako e ta yi moshikunino nokwa tsu oongolo e ta galikana. Okwa galikana a mana mo nokwa zi omazigudhe “ga fa omata gombinzi noga ndondele pevi.” — Lukas 22:39-44.

² Jesus okwa li ti ipula unene nashike? Okwa li a tseya kutya oku li pokuhepekwa masiku, ihe hasho a li ti ipula nasho. Okwa li ti ipula unene niinima ya simanenena, ngaashi okuyapulitha edhina lyaHe nokonakuyiwa yaantu ndjoka yi ikolelela kokukala kwe omudhiginini. Okwa li e shi kutya osha simanenena i idhidhimike. Ngele okwa kala inee shi ninga, ota ka shekitha lela edhina lyaJehova. Ihe okwa vulika. Mesiku olyo tuu ndyoka, Jesus ngoka a tula po oshiholelwa dhingi sheidhidhimiko okwi igidha mokule omanga inaa fudha mo omufudho gwe gwahugunina a ti: “Ayihe ya gwanithwa!” — Johannes 19:30.

³ Ombiimbeli otayi tu ladhipike ‘tu taleni kuJesus ngoka i idhidhimike.’ (Aahebeli 12:1-3) Shoka otashi etitha omapulo ngaashi: Jesus okwa li i idhidhimikile omayeleko geni? Oshike she mu kwathele i idhidhimike? Ongiini tatu vulu okulandula oshiholelwa she? Ihe manga inaatu yamukula omapulo ngaka, natu tale kutya eidhidhimiko olya kwatela mo shike.

4, 5. (a) ‘Eidhidhimiko’ oshike? (b) Ongiini tatu vulu okuulika kutya eidhidhimiko olya kwatela mo oshindji kaashi shi owala okupita muudhigu mboka wu vule oonkondo dhetu?

⁴ Ethimbo nethimbo atuheni ohatu adhika ‘komamakelo ogendji.’ (1 Petrus 1:6) Mbela ngele otu li memakelo lyontumba, osha hala okutya otwe li idhidhimikila? Aawe. Oshityadhina shOshigreka shoka sha tolokwa ‘eidhidhimiko’ otashi ti “okukakatela kusha nenge okwaahigandja kusha, kutya nduno owu li muudhigu wu thike peni.” Omulongwantu gumwe okwa popi kombinga yeidhidhimiko ndyoka tali popiwa mOmbiimbeli a ti: “Oli li uukwatya wokwiidhidhimikila iinima molwaashoka owu na etegameno lyolela, pehala lyokwiigandja . . . Ohali kwathele omuntu a kale itaa tengauka, nonando ota hepekwa. Olyo uukwatya mboka hawu lundululile emakelo enene li kale lya fa okapulu kelume molwaashoka owu wete ethikilo lyoye, nonando owu li muuwehame.”

⁵ Onkee ano, okwiidhidhimika itashi ti owala okupita muudhigu mboka wu vule oonkondo dhoye. PaMbiimbeli okwiidhidhimika okwa kwatela mo okukala wa tokola toko, okukala niikala yopamadhiladhilo yu uka nokukala netegameno nonando oto makelwa. Natu tye nduno: Aalumentu yaali oya kwatwa e taya tulwa mondjedhililo, ihe omolwomatompelo ga yooloka. Gumwe, omukaulinyanga ngoka e shiwike apuhe, na gumwe Omukriste ngoka a kwatwa omolwuudhiginini we. Omukaulinyanga okwa longele egeelo lye neyeme, omanga Omukriste a kala omudhiginini noku na etaloko ewanawa molwaashoka oku wete kutya oshi li ompito kuye u ulike eitaalo lye. Omukaulinyanga ina tula po oshiholelwa sheidhidhimiko, ihe Omukriste omudhiginini okwa tula po oshiholelwa dhingi sheidhidhimiko. — Jakob 1:2-4.

6. Eidhidhimiko ohatu li kokeke ngiini?

⁶ Eidhidhimiko olya simanenena opo tu ka hupithwe. (Mateus 24:13) Ihe inatu valwa nalyo. Otu na oku li kokeka.  Ngiini mbela? Aaroma 5:3 otaya ti: “Muudhigu ohamu zi eidhidhimiko.” Eeno, ngele otwa hala shili okukala neidhidhimiko, katu na okuhenuka nokukala twa tila emakelo kehe ndyoka tali tu adha omolweitaalo lyetu. Pehala lyaashono, otu na oku li kondjitha. Eidhidhimiko ohatu li ulike esiku nesiku mokusinda omamakelo omanene nomashona ngoka twa taalela. Emakelo kehe tatu piti mulyo otali tu koleke tu vule okupita mekwawo tali landula ko. Odhoshili kutya ihatu kokeke eidhidhimiko koonkondo dhetu yene, ihe ‘okoonkondo ndhoka tatu pewa kuKalunga.’ (1 Petrus 4:11) Jehova okwe tu pa oshiholelwa kamana shOmwana, shi tu kwathele tu kale aadhiginini. Natu taleni koshiholelwa shaJesus sha gwanenena sheidhidhimiko.

7, 8. Jesus okwa li i idhidhimikile shike pehulilo lyokukalamwenyo kwe kombanda yevi?

⁷ Jesus okwa li i idhidhimikile omahepeko ogendji gi ili nogi ili lwopehulilo lyokukalamwenyo kwe kokombanda yevi. Kakele owala kokukala a gwililwa po unene pamadhiladhilo muusiku mboka wa tetekele eso lye, okwa li wo a yematekwa, a hepekwa nokusithwa ohoni. Okwa li a kengelelwa kukuume ke kopothingo, aalongwa ye oye mu thigi po, okwa pangulwa shaahe li pauyuuki kaawiliki yomalongelokalunga mboka ye mu sheke, ye mu hiyile omayeye noye mu dhenge noongonyo. Ihe okwa li i idhidhimike nokupita mwaayihe mbyoka. — Mateus 26:46-49, 56, 59-68.

⁸ Sho Jesus e li pokusa okwa li i idhidhimikile uuwehame wamemememe. Okwa li a dhengwa nonyanya noongola sigo “oshipa she tashi toshoka nayi nokwa li ta ziya ombinzi.” Okwa dhipagwa momukalo ngoka “tagu uvitha omwenyo omutoye” sho a alelwa komuti gwomahepeko. Dhiladhila owala kuuwehame mboka a li u uvite sho oomboha oonene tadhi mbambangelwa miikaha ye nomoompadhi dhe opo dhi mu kwatele koshiti. (Johannes 19:1, 16-18) Dhiladhila  owala uuwehame mboka a li u uvite sho omuti gwomahepeko gwa thikamekwa naasho olutu lwe lwe endjelela komuti nosho wo ombunda ye ndjoka ya toshagulwa sho tayi iwegenyene kugwo. Jesus okwa li i idhidhimikile uuwehame auhe mboka nosho wo mboka wa popiwa petameko lyontopolwa ndjika.

9. Oshike sha kwatelwa mokwiitsika “omuti gwomahepeko gwetu” nokulandula Jesus?

⁹ Oshike tu na okwiidhidhimikila tu li aalanduli yaKristus? Jesus okwa ti: “Ngele ku na ngoka a hala okulandula ndje, oye . . . ni itsike [omuti gwomahepeko gwe NW] ye na landule ndje.” (Mateus 16:24) Uutumbulilo “omuti gwomahepeko” movelise ndjika owa longithwa pathaneko okuulika kokumona iihuna, kokusithwa ohoni nokeso nokuli. Kashi shi oshipu okulandula Kristus. Eihumbato lyetu lyopaKriste ohali tu yoolola ko. Uuyuni owu tu tonde molwaashoka katu li oshitopolwa shawo. (Johannes 15:18-20; 1 Petrus 4:4) Ihe nonando ongaaka, otu na ehalo okuhumbata omuti gwomahepeko gwetu, sha hala okutya, otwa hogolola okulandula Kristus nonando otatu hepekwa nokudhipagwa. — 2 Timoteus 3:12.

10-12. (a) Omolwashike omaunkundi gayamwe ga li eshongo kuJesus? (b) Jesus okwa li i idhidhimikile omamakelo gamwe geni?

¹⁰ Pethimbo lyuukalele we, Jesus okwa li wo a taalela omamakelo ngoka ge etithwa kokwaahagwanenena kwaamboka ya li puye. Okwa li “engomba” ngoka Jehova a longitha okushita evi naashihe shoka shi li ko. (Omayeletumbulo 8:22-31) Jesus okwa tseya nawa elalakano lyaJehova li na ko nasha naantu. Oya li ye na okuholela omaukwatya gaJehova opo ya nyanyukilwe onkalamwenyo ye na uukolele. (Genesis 1:26-28) Sho Jesus a li kombanda yevi, okwa li omuntu ngaashi tse. Okwa li hu uvu nayi nokwa li wo a mono iilanduliko yinyanyalitha yuulunde momikalo dhi ili nodhi ili. Osha li she mu ehameke noonkondo okumona kutya aantu oye li kokule negwaneneno nokaye li ngaashi Adam naEva  ya li petameko. Jesus okwa li e na okwiidhidhimikila iinima mbyoka. Mbela okwa li a teka omukumo nokutala ko aantu aalunde kutya kaye na etegameno lyasha? Natu tale.

¹¹ Jesus okwa li a yematela Aajuda nokwa lili omolwokwaahenakonasha kwawo netumwalaka lye. Mbela osha li she mu teya omukumo nenge e ethe okuuvitha? Aawe. Mepingathano naashoka, “esiku kehe Jesus okwa li ta longo aantu motempeli.” (Lukas 19:41-44, 47) Okwa li a “nika oluhodhi” omolwuukukutu womitima dhAafarisayi mboka ya li taye mu tala ngele ota aludha omulumentu gwontumba mEsabati. Mbela shoka osha li she mu tilitha? Hasho nando. Okwa li e na omukumo nokwa aludha omulumentu ngoka mokati kaantu mosinagoga. — Markus 3:1-5.

¹² Omaunkundi gaalongwa ye oga li wo ge mu yematitha. Ngaashi twi ilongo mOntopolwa onti-3, oya li taya lalakanene  oondondo dha simana. (Mateus 20:20-24, Lukas 9:46) Iikando niikando, Jesus okwe ya pe omayele kutya oya pumbwa okukala aaifupipiki. (Mateus 18:1-6; 20:25-28) Ihe inaya tula nziya omayele ngoka miilonga. Muusiku we wahugunina sho a li pamwe nayo, mokati kayo omwa “penduka edhiladhilo” kutya olye omukuluntu e vule ooyakwawo ayehe. (Lukas 22:24) Mbela Jesus okwa li a kanitha einekelo muyo kutya kaye na siku yu ulike eifupipiko? Aawe. Okwe ya tala aluhe onteni e yi inekela, nokwa tsikile okutala komaukwatya gawo omawanawa. Okwa li e shi kutya oye hole Jehova noya li lela ya hala okulonga ehalo lye. — Lukas 22:25-27.

13. Omamakelo geni Jesus a li i idhidhimikile taga vulu oku tu adha?

¹³ Otatu vulu okwaadhika komamakelo ngoka Jesus a li i idhidhimikile. Pashiholelwa, otatu vulu okutsakaneka mboka kaye na ko nasha nenge ya tinde etumwalaka lyetu lyUukwaniilwa. Mbela shono otashi ke tu teya omukumo nenge otatu ka tsikila owala okuuvitha nuulaadhi? (Titus 2:14) Omaunkundi gAakriste ooyakwetu otaga vulu okukala eshongo kutse. Shoka haya popi nohaya ningi otashi vulika shi tu ehameke. (Omayeletumbulo 12:18) Mbela otatu ka sa uunye ooitaali ooyakwetu omolwomaunkundi gawo nenge otatu ke yi idhidhimikila nokutala komaukwatya gawo omawanawa? — Aakolossa 3:13.

14. Iinima iyali yini ya li ya kwathela Jesus a kale itaa tengauka?

¹⁴ Oshike sha li sha kwathela Jesus a kale itaa tengauka nomudhiginini, nonando okwa li a dhinika, a yematekwa nokuhepekwa? Opu na iinima iyali ya tongomana mbyoka ya li ye mu kwathele. Shotango, okwa li a pula “Kalunga, ngoka oluthithiya lweidhidhimiko” e mu kwathele. (Aaroma 15:5) Oshitiyali, Jesus okwa li a tala konakuyiwa nokukaleka momadhiladhilo shoka she mu pungulilwa. Natu konakoneni iinima mbyoka kooshimwe.

15, 16. (a) Oshike tashi ulike kutya Jesus ka li i inekela moonkondo dhe opo i idhidhimike? (b) Jesus okwa li e na einekelo lini muHe, nomolwashike?

 ¹⁵ Jesus, Omwana gwaKalunga a gwanenena ka li i inekela moonkondo dhe opo i idhidhimike. Pehala lyaashono, okwa pula ekwatho kuHe gwomegulu okupitila megalikano. Omuyapostoli Paulus okwa nyola a ti: “Oye a gandja . . . omayambo omaindilo nomagalikano nokukuga pombanda nomahodhi kungoka ta vulu oku mu hupitha meso.” (Aahebeli 5:7, KB) Ndhindhilika kutya Jesus okwa “galikana” nokwi indile kuKalunga. Oshitya ‘okwiindila’ otashi ti okugalikana nomutima aguhe to pula ekwatho. Uutumbulilo ‘omagalikano’ pauwindji otawu ulike kutya Jesus okwa li a galikana kuJehova iikando yi vulithe pushimwe. Moshikunino shaGetsemane, Jesus okwa li a galikana shili lwiikando a mana mo. — Mateus 26:36-44.

¹⁶ Jesus okwa li i inekela thiluthilu kutya Jehova ota ka yamukula omaindilo ge molwaashoka oku shi kutya He ohu “uvu omagalikano.” (Episalomi 65:2) Omanga Omwana omutango ine ya kombanda yevi, okwa li a mono nkene He ha yamukula omagalikano gaapiya ye aadhiginini. Pashiholelwa, sho a li megulu, okwa mono nkene Jehova a tumu omuyengeli a ka kwathele omupolofeti Daniel, omanga nokuli inaa mana okugalikana. (Daniel 9:20, 21) Mbela He ote ki ipwililikila ngaa omagalikano gOmwana awike ngoka taga zi komutima “nokukuga pombanda nomahodhi?” Jehova okwa li a yamukula omagalikano gOmwana sho a tumu omuyengeli e mu koleke a vule okupita mo momamakelo ngoka. — Lukas 22:43.

17. Omolwashike tu na okupula Kalunga ekwatho opo tu idhidhimike, nongiini tatu vulu oku shi ninga?

¹⁷ Opo tu idhidhimike, otu na okupula Kalunga ekwatho e tu “koleke.” (Aafilippi 4:13) Ngele Omwana gwaKalunga ngoka a gwanenena okwa li i indile He e mu kwathe, mbela tse mboka inaatu gwanenena inatu pumbwa tuu oku shi ninga twaahe na ezimbuko? Otwa pumbwa okugalikana kuJehova  iikando oyindji ngaashi Jesus. (Mateus 7:7) Nonando itatu ka tegelela omuyengeli e ye kutse, otu na uushili kutya Kalunga ketu omunahole ota ka yamukula omagalikano gaapiya ye aadhiginini mboka taya “dhiginine okugalikana noku mu indila ekwatho omutenya nuusiku.” (1 Timoteus 5:5) Jehova ota ka yamukula omagalikano getu uuna tatu mu pula twa mana mo e tu pe uunongo, uulaadhi noonkondo tu idhidhimikile omamakelo ngaashi uuwehame, eso lyagumwe ngoka tu hole nenge omahepeko. — 2 Aakorinto 4:7-11; Jakob 1:5.

18. Oshike sha li sha kwathele Jesus i idhidhimike?

¹⁸ Oshinima oshitiyali shoka sha kwathele Jesus i idhidhimike okutala konakuyiwa nokukaleka momadhiladhilo shoka she mu pungulilwa. Ombiimbeli otayi mu popi tayi ti: “Omolwenyanyu ndyoka lya li lye mu tegelela okwi idhidhimikile esheko nokwa si eso [lyokomuti gwomahepeko, NW].” (Aahebeli 12:2) Oshiholelwa shaJesus otashi ulike nkene etegameno, enyanyu neidhidhimiko hayi longele kumwe. Uukwatya mboka otatu vulu oku wu ngonga ngeyi: Etegameno ohali eta enyanyu, enyanyu ohali eta eidhidhimiko. (Aaroma 15:13; Aakolossa 1:11) Jesus okwa li e na etegameno ekumithi. Okwa li e shi kutya uudhiginini we otawu ka yukipalitha uuthemba waHe wokupangela nota ka vula okumangulula aantu muulunde neso. Jesus okwa li  wo e na etegameno lyoku ka pangela e li Omukwaniilwa nosho wo Omusaaseri Omukuluntu opo e etele aantu aavuliki omalaleko nuuyamba ogendji. (Mateus 20:28; Aahebeli 7:23-26) Okwa li e na enyanyu kaali shi kuyelekwa nasha, nenyanyu ndyoka olyo lye mu kwathele i idhidhimike omolwetimaumbwile netegameno ndyoka li li komeho.

19. Uuna tatu makelwa omolweitaalo lyetu, ongiini tatu vulu okukala tu na etegameno, enyanyu neidhidhimiko monkalamwenyo yetu?

¹⁹ Ngaashi Jesus, natu kale tu na etegameno, enyanyu neidhidhimiko monkalamwenyo yetu. Paulus okwa ti: “Etegameno nali mú nyanyudhe.” Okwa gwedha ko a ti: “Idhidhimikeni muudhigu.” (Aaroma 12:12) Mbela ngashingeyi oto makelwa omolweitaalo lyoye? Ngele osho, tala konakuyiwa ndjoka yi li komeho. Ino dhimbwa kutya eidhidhimiko lyoye otali simanekitha edhina lyaJehova. Kala wu na etegameno lyUukwaniilwa lya tsa. Kala wa fa wu wete wu li muuyuni uupe mboka tawu ya nowa fa wu wete to nyanyukilwa omayambeko mOparadisa. Kala wa tegamena omauvaneko gaJehova omakumithi ngoka taga ka gwanithwa sho ta ka kutha po uuwehame neso, uukolokoshi kombanda yevi alihe nokuyukipalitha uuthemba we wokupangela. Ngele to shi ningi, omutima gwoye otagu ka kala tagu hunga kenyanyu ndyoka tali ke ku kwathela wu idhidhimikile omamakelo ngoka tage ku adha. Uudhigu mbuka tu li muwo ‘ngashingeyi owopokathimbo’ nowanathangwa moku wu yelekanitha netegameno lyaaluhe lyUukwaniilwa. — 2 Aakorinto 4:17.

20, 21. Ngele tashi ya peidhidhimiko, Jehova okwa tegelela shike kutse, notwa tokola toko okuninga shike?

²⁰ Jesus oku shi kutya oshi li eshongo okukala omulanduli gwe notashi pula eidhidhimiko. (Johannes 15:20) Okwe tu palela ondjila nokwa tseya kutya oshiholelwa she otashi ka tsa yalwe omukumo. (Johannes 16:33) Okwe tu tulila po oshiholelwa sha gwanenena sheidhidhimiko, nonando otu  li kokulekule negwaneneno. Jehova okwa tegelela shike kutse? Petrus okwa yelitha a ti: “Kristus okwa hepekwa omolweni nokwe mú thigile oshiholelwa, opo mu landule ondjila ndjoka a li e yi ende.” (1 Petrus 2:21) Okwe tu thigila “oshiholelwa” tu landule oshinkoti she momukalo moka u ungaunga nomamakelo. * Eidhidhimiko lye otali vulu okuyelekanithwa noonkatu. Itatu vulu naanaa okulandula oonkatu dhe momukalo gwa gwanenena, ihe otatu vulu okukambadhala.

²¹ Onkee ano, natu kale twa tokola toko okulandula oshiholelwa shaJesus ngaashi tatu vulu. Inatu dhimbwa nando kutya mpoka ngaa pu thike oku mu landula, opo ngaa pu thike okwiidhidhimika kwetu “sigo ehulilo” lyuuyuni mbuka wa kulupa lya thikana nenge lyokukalamwenyo kwetu. Katu shi kutya ehulilo lini tali ya tango, ihe Jehova ote ke tu laleka nuuyamba sigo aluhe omolweidhidhimiko lyetu. — Mateus 24:13.