1-3. Jesus okwa li a taalela oshiponga shini, nokwi i inyenge ngiini?

 ONGUNDU onene yaantu oya li ye ya kuJesus, ya homata omagongamwele noondhimbo noya li pamwe naakwiita. Ongundu ndjoka ya li yi na elalakano ewinayi oye ende momilema momapandaanda gaJerusalem noya taaguluka okamulonga Kidron yu uka kOndundu yOomono. Nonando omwedhi ogwa li gwa toka, oya li ya humbata oonyeka noolamba. Mbela odha li dhoku ya minikila mondjila ngele omwedhi gwa yi miikogo? Nenge otaya dhiladhila owala kutya Jesus ota ka kala a holama momilema? Katu shi shi naanaa, ihe otu shi owala kutya kehe ngoka ta dhiladhila kutya Jesus ota kala a tila, nena ke mu shi nawa.

² Jesus okwa li a tseya kutya oku li pokuya moshiponga. Ihe nando ongaaka, ina fadhuka po, okwa thikama owala e ya tegelela. Ongundu yaantu ya kwatelwa komeho kuJudas ngoka a li nale kuume ke kopothingo oye ya puye. Judas okwa gwaaleke Jesus moku mu hololela aatondi ye sho e mu popitha niihelele moku mu thipa komilungu. Ihe Jesus okwa kala owala a ngungumana. Opo nduno okwa yi kuyo nokwe ya pula a ti: “Otamu kongo lye?” Oya ti: “OJesus Omunasareti.”

³ Otashi vulika aantu oyendji ya kale ya tila ngele oya mono ongundu onene yaantu ya homata. Ongundu ndjoka otashi vulika osho ya li ya tegelela Jesus a ninge. Ihe ka li a tila, ina fadhuka po, ye ina fundja i igamene. Pehala lyashono, okwa ti: “Ongame nguka!” Okwa kala a ngungumana noku na omukumo shoka sha li sha kumitha aantu mboka ye ya oku mu kwata. Oya tantala yu uka konima e tayi ihata po. — Johannes 18:1-6; Mateus 26:45-50; Markus 14:41-46.

4-6. (a) Omwana gwaKalunga ota faathanithwa nashike, nomolwashike? (b) Jesus okwa li u ulike uulaadhi momikalo ndatu dhini?

 ⁴ Oshike sha li sha kwathele Jesus a kale a ngungumana nokwiitegelela? Uulaadhi. Uukwatya mboka owa pumbiwa unene mokati kaawiliki nokapu na nando omuntu gumwe e wu na e vule Jesus. Montopolwa ya tetekele otwi ilongo mo kombinga yeifupipiko lye. Oshu uka sho hi ithanwa “Onzigona.” (Johannes 1:29) Ihe ohi i ithanwa wo omadhinasimaneko gi ili nogi ili omolwuulaadhi we. Ombiimbeli otayi mu popi tayi ti: “Tala, Onime yomezimo lyaJuda.” — Ehololo 5:5.

⁵ Olundji onime ohayi longithwa okuulika uulaadhi. Mbela owa tsakanena ngaa nale oshipala noshipala nonime ondumentu? Ngele osho, otashi vulika ya li ye edhililwa molugumbo. Ihe nonando ongaaka, otashi vulika wa li to zi omahwilili. Okutala oshipala shoshilikama shoka oshinenenene noshinankondo oto mono kutya onime ihayi tila nando osha. Ombiimbeli otayi popi kutya ‘onime oyo omukwaniilwa mokati kiinamwenyo ndjoka ihaayi henukile sha.’ (Omayeletumbulo 30:30) Kristus naye oku na uulaadhi wa tya ngaaka.

⁶ Natu kundathaneni nkene Jesus u ulike uulaadhi wa fa wonime momikalo ndatu: mokupopila oshili, mokuhumitha komeho uuyuuki nomokukondjitha omapataneko. Otatu ka mona wo kutya atuheni otatu vulu okuholela uulaadhi we kutya nduno otwa valwa aalaadhi nenge hasho.

7-9. (a) Sho Jesus a li e na omimvo 12, oshike sha li sha ningwa po, nongiini onkalo ndjoka tayi monika ya fa tayi tilitha kungoye? (b) Jesus oku ulike ngiini uulaadhi sho a li ta popi naalongi motempeli?

⁷ Muuyuni mbuka tawu pangelwa kuSatana, ‘he yiifundja ayihe,’ olundji otashi pula okukala omulaadhi mokupopila oshili. (Johannes 8:44; 14:30) Jesus ina tegelela a ninge omukuluntu opo a popile oshili. Sho e na omimvo 12, okwa li a thigwa muJerusalem kaavali ye konima yoshituthi shOpaasa. Maria naJosef oye mu kongo uule womasiku gatatu ya lulilwa. Hugunina oye mu adha motempeli. Okwa li ta ningi mo  shike? Okwa li “a kuutumba mokati kaalongi Aajuda, te ya pulakene ye te ya pula.” (Lukas 2:41-50) Natu tale sho ya li taya kundathana.

⁸ Aanandjokonona oya ti kutya aawiliki yomalongelokalunga yamwe oya li ye na omukalondjigilile okukala motempeli konima yoshituthi nokulonga aantu mehala li ikalekelwa li li motempeli. Aantu oya li haya kuutumba poompadhi dhawo taya pulakene nokupula omapulo. Aalongi mboka oya li aalongwantu. Oya li ye shi nawa Ompango yaMoses noya tseya wo oompango dha kitakana nomithigululwakalo dhaantu ndhoka hadhi ende tadhi indjipala momukokomoko gwomimvo. Mbela ando ongoye oto ka kala wu uvite ngiini oku kuutumba mokati kawo? Mbela ito kala wa tila? Shoka oshi li paunshitwe. Ihe ongiini ngele owu na owala omimvo 12? Aagundjuka oyendji oye na ohoni. (Jeremia 1:6) Yamwe koosikola kaye hole nokuli okutala kaalongi, molwaashoka ohaya kala ya tila okutumbulwa ya tye sha nohaya kala ya tila okusithwa ohoni nenge okushekwa.

⁹ Ihe Jesus okwa li a kuutumba mokati kaalongi Aajuda nokwa li te ya pula omapulo gomuule nokee na uumbanda. Okwe ya pula nokuli iinima oyindji. Ehokololo otali ti: “Ayehe mboka ye mu pulakene, oya kuminwa oondunge dhe nomayamukulo ge.” (Lukas 2:47) Ombiimbeli inayi tu lombwela shoka a popi pethimbo mpoka, ihe otu na einekelo kutya ine endulula iifundja mbyoka ya li yi holike kaalongi yomalongelokalunga. (1 Petrus 2:22) Okwa popile oshili yOohapu dhaKalunga naapulakeni ye oya li lela ya kumwa sho okamati komimvo 12 taka popi noondunge nonuulaadhi.

10. Aagundjuka Aakriste kunena ohaya holele ngiini uulaadhi waJesus?

¹⁰ Aagundjuka oyendji Aakriste kunena nayo otaya landula oshiholelwa shaKristus. Odhoshili kutya inaya gwanenena ngaashi ye. Ihe ihaya tegelele ya ninge aakuluntu opo ya vule okupopila oshili. Kosikola nenge momudhingoloko moka haya kala ohaya pula aantu omapulo nokupulakena sho taya yamukula nohaya kundathana nayo oshili nesimaneko.  (1 Petrus 3:15) Aagundjuka mboka oya kwathela aanasikola ooyakwawo, aalongi naashiinda ya ninge aalanduli yaKristus. Uulaadhi wawo ohawu nyanyudha Jehova. Oohapu dhe otadhi faathanitha aagundjuka ya tya ngaaka nomume molwaashoka ohaya talaleke, ohaya nyanyudha aantu noye li wo oyendji. — Episalomi 110:3.

11, 12. Jesus okwa popile ngiini oshili nuulaadhi sho a ningi omukuluntu?

¹¹ Iikando oyindji Jesus oku ulike uulaadhi mokupopila oshili sho a ningi omukuluntu. Petameko lyuukalele we okwa li a taalela emakelo ndyoka tali monika lya fa etilithi unene. Sho a li ta kondjitha Satana oshishitwa oshinankondo nosha nika oshiponga kaatondi yaJehova ayehe, ka li omuyengeli omukuluntu, ihe okwa li owala omuntu gwonyama nombinzi. Okwa kondjitha Satana noku mu tompa sho a li ta pilike oohapu dha nwethwa mo. Pehulilo Jesus okwe mu lombwele nuulaadhi ta ti: “Za po, Satana.” — Mateus 4:2-11.

¹² Okupitila muukalele we, Jesus okwa tula po oshiholelwa mokukondjitha nuulaadhi mboka ya li taya pengitha Oohapu dhaHe nenge taye dhi longitha pambambo. Ngaashi owala kunena, aawiliki yomalongelokalunga pethimbo lye kaya li aanashili. Jesus okwe ya lombwele a ti: “Otamu kutha oohapu dhaKalunga oonkondo nokudhiginina omithigululwakalo dheni.” (Markus 7:13) Aawiliki mboka oya li ya simanekwa kaantu apuhe, ihe Jesus okwe ya aneke pomutenya kutya oye li aakwatiketi aaposi naafudhime. * (Mateus 23:13, 16) Ongiini tatu vulu okuholela uulaadhi waJesus?

13. Sho tatu holele Jesus otu na okudhimbulukwa shike, notu na uuthembahenda wuni?

¹³ Otu shi kutya ihatu vulu okulesha omitima ngaashi Jesus nokatu na oonkondopangelo okupangula ngaashi ye. Ihe otatu vulu okuholela uulaadhi we okupopila oshili. Pashiholelwa,  opo tu aneke pomutenya omalongo giifundja ngoka haga longwa olundji kombinga yaKalunga, yomalalakano ge nOohapu dhe, otu na okweetha uuyelele wetu wu minikile muuyuni mbuka wu li momilema dhomitotolombo dhaSatana. (Mateus 5:14; Ehololo 12:9, 10) Ohatu kwathele aantu ya manguluke komalongo giifundja ngoka hage ya tilitha, gu udha momitima dhawo notage ya imbi ya kale nekwatathano ewanawa naKalunga. Uuthembahenda owu thike peni okumona euvaneko lyaJesus tali gwanithwa ndyoka tali ti: ‘Oshili otayi mu mangulula!’ — Johannes 8:32.

14, 15. (a) Omomukalo guni Jesus a yelithile aantu ‘shoka shu uka’? (b) Jesus oku ulike ngiini kutya ke na okatongo sho a popi nomukiintu Omusamaria?

¹⁴ Ehunganeko lyOmbiimbeli otali ti kutya Mesiasa ota ka yelithila aantu ‘shoka shu uka.’ (Mateus 12:18; Jesaja 42:1, KB) Jesus okwa tameke oku shi ninga omanga a li kombanda yevi. Oku ungaunga naantu pauyuuki nokee na okatongo, te shi ningi nuulaadhi. Pashiholelwa, okwe ekelehi ombepo yokatongo nuukwamuhoko ndjoka itayi popilwa momanyolo, ihe oya li maantu oyendji pethimbo lye.

¹⁵ Aalongwa yaJesus oya li ya kumwa sho a popi nomukiintu Omusamaria pomuthima puSikar. Omolwashike mbela? Omolwaashoka Aajuda oya li ye tonde Aasamaria noshinima  shoka osha za nale manga Jesus inee ya kombanda yevi. (Esra 4:4) Niishewe, oorabbi yamwe oya li ya dhina aakiintu. Konima yethimbo oya nyola oompango dhawo ndhoka dhi indike aalumentu yaaha kundathane naakiintu nodha popi kutya aakiintu inaya gwana okulongwa Ompango yaKalunga. Aakiintu Aasamaria oya li ya talika ko ya nyata. Jesus ina landula okatongo ka tya ngaaka nokwa li a longo omukiintu Omusamaria (ngoka a li moluhondelo), nokwe mu ihololele kutya oye Mesiasa. — Johannes 4:5-27.

16. Omolwashike Aakriste ya pumbwa uulaadhi opo ya vule okukala ya yooloka ko kaantu mboka ye na okatongo?

¹⁶ Mbela owa kala nale mokati kaantu ye na okatongo? Ohashi vulika ya ninge omashendjo gondhino kombinga yaantu yomihoko dhimwe nenge yiigwana yilwe, yu ule nayi iilyo yuukashike kookantu wa yooloka ko kuwa wo noya dhina mboka ya hepa nenge ye na oondondo dhopevi. Aalanduli yaKristus kaye na okukala nuutondwe wa tya ngaaka, ohaya kambadhala ya vudhe mo iikala mbyoka momitima dhawo. (Iilonga 10:34) Kehe gumwe gwomutse okwa pumbwa okukokeka uulaadhi opo a kale kee na okatongo.

17. Oonkatu dhini Jesus a li a katuka motempeli, nomolwashike?

¹⁷ Uulaadhi owa kwathele wo Jesus a humithe komeho unene uuyogoki wopambepo woshigwana shaKalunga nosho wo welongelokalunga lya yela. Petameko lyuukalele we, sho a yi motempeli muJerusalem okwa li a haluka sho a mono aalandithi naapingakanithi yiimaliwa taya pindikile moka. Molwaashoka osha li shu uka kuJesus a geye, okwa tidha mo aantu ayehe aanalwiiho niilandithomwa yawo. (Johannes 2:13-17) Lwopehulilo lyuukalele we okwa li wo a ningi oshinima sha faathana. (Markus 11:15-18) Shoka osha li she mu ningi omutondi omunene, ihe ina ongaonga oku ya katukila onkantu. Omolwashike mbela? Okwa kala hi ithana otempeli egumbo lyaHe okuza kuunona we nokwa li ha kala metsokumwe nasho. (Lukas 2:49) Ka li nando ta vulu okwiidhidhimikila okunyatekwa kwelongelokalunga lya yogoka ndyoka lya  li hali ningilwa moka. Uulaadhi we owa li we mu pe omukumo a longe shoka shu uka.

18. Aakriste ohaya ulike ngiini uulaadhi kunena ngele tashi ya puuyogoki wegongalo?

¹⁸ Sha faathana nokunena, aalanduli yaKristus oye na ko nasha nuuyogoki woshigwana shaKalunga nosho wo welongelokalunga lya yela. Ngele oya mono kutya Omukriste omukwawo okwa gwila meyono lya kwata miiti, ihaye shi mwenene owala, ihe ohaya popi nomuntu ngoka nenge naakuluntugongalo. (1 Aakorinto 1:11) Ohaya si oshimpwiyu opo aakuluntugongalo ya tseyithilwe. Aakuluntugongalo otaya vulu okukwathela ngoka te ehama pambepo nohaya katuka oonkatu ya kaleke po uuyogoki mokati koonzi dhaJehova. — Jakob 5:14, 15.

19, 20. (a) Okwaahenuuyuki kuni kwa li apuhe pethimbo lyaJesus, nokwa li a taalela ethiminiko lini? (b) Omolwashike aalanduli yaKristus ihaya kutha ombinga miinima yopapolotika noyuukolokoshi, noshizemo oshini?

¹⁹ Mbela otu na okuthika pehulithodhiladhilo kutya Jesus okwa li a kondjitha okwaahenuuyuuki hoka kwa li taku ningwa muuyuni auhe? Okwaahenuuyuuki okwa li shili apuhe pethimbo lye. Oshilongo shawo osha li tashi pangelwa kaakwiilongo. Aaroma oya li ya thiminike Aajuda netangakwiita lyawo enankondo, moku ya futitha iifendela yi li pombanda unene noya li nokuli yi idhopo miinima yawo yopalongelokalunga. Itashi kumitha sho aantu oyendji pethimbo lye ya li ya hala Jesus a kuthe ombinga miinima yopapolotika. (Johannes 6:14, 15) Moshinima shika oku ulike wo uulaadhi.

²⁰ Jesus okwa yelitha kutya Uukwaniilwa we kaawu shi womuuyuni mbuka. Okupitila moshiholelwa she, okwa dheula aalongwa ye ya gandje eitulomo unene kiilonga yokuuvitha onkundana yUukwaniilwa, nokayi idhope miinima yopapolotika. (Johannes 17:16; 18:36) Okwe ya longo oshiilongomwa sha dhenga mbanda kutya kaye na okukondja sho ongundu yaantu ya li ye ya oku mu kwata. Petrus okwa pweya mo nziya egongamwele lye nokwa tete ko okutsi  komulumentu gumwe. Otashi vulika wu kale wu wete kutya shoka Petrus a ningi oshi li nawa. Muusiku moka Omwana gwaKalunga kee na ondjo a li a ponokelwa, osha li tashi monika sha fa shi li pauyuuki okulongitha oonkondo oku mu gamena. Okuza mpoka Jesus okwa tulile po aalanduli ye kombanda yevi oshiholelwa shoka ye na okulandula sigo okunena sho a ti: “Shuna mo egongamwele lyoye molumpangwa, oshoka ayehe mboka taya longitha egongamwele, oyo otaa ka sa kegongamwele.” (Mateus 26:51-54) Aalanduli yaKristus oye na okukala nombili ngaashi haye shi ningi kunena. Oye na ondjokonona ombwaanawa molwaashoka ihaya kutha ombinga miinima yuuyuni ngaashi iita, omadhipago ga ki na henda, miipotha nomiilonga yuukolokoshi ya fa mbyoka hayi longwa kunena. Omolwuulaadhi wawo oye na ondjokonona ya tya ngaaka.

21, 22. (a) Ekwatho lini Jesus a mono sho a li a taalela omamakelo omadhigu? (b) Jesus oku ulike ngiini uulaadhi we sigo omeso?

²¹ Omwana gwaJehova okwa li e shi shi nale kutya ota ka patanekwa shili kombanda yevi. (Jesaja 50:4-7) Aatondi ye oya li ya kambadhala olundji oku mu dhipaga nolwahugunina oye shi ningi ngaashi sha hokololwa petameko lyontopolwa ndjika. Ongiini Jesus a li a kakatele uulaadhi we sho a taalela oshiponga shoka? Okwa li ta ningi shike sho ongundu yaantu ye ya oku mu kwata? Okwa li ta galikana nehwamo kuJehova. Jehova okwa ningi po shike? Ombiimbeli otayi tu lombwele kutya “Kalunga okwe mu uvu.” (Aahebeli 5:7) Okwa tumu omuyengeli okuza megulu a ambidhidhe Omwana gwe omulaadhi. — Lukas 22:42, 43.

²² Konima sho Jesus a tsuwa omukumo okwa lombwele aayapostoli ye a ti: “Thikameni, tu yeni.” (Mateus 26:46) Dhiladhila kehwamo ndyoka a li e na sho a ti: “Tu yeni,” nonando okwa li e shi kutya ota ka pula ongundu yaantu ndjoka  yi ethe ookuume ke ya ye, nonokutya ookuume ke otaye ke mu thiga po nokuya ontuku nokwa li e shi kutya ota ka taalela uudhigu oye awike mboka inaa mona nale monkalamwenyo ye. Okwa pangulwa shaahe li pauyuki, a shekwa, a hepekwa, nokudhipagwa momukalo tagu uvitha omwenyo omutoye. Nonando okwa ningilwa ayihe mbyoka ina etha po nando uulaadhi we.

23. Yelitha kutya omolwashike tatu tile kutya Jesus okwa li e na ko nasha nomwenyo gwe sho a li a taalela eso.

²³ Mbela Jesus okwa li kee na ko nasha? Aawe, okukala omulaadhi itashi ti nando okukala waahe na ko nasha. Okwa lombwele aalanduli ye ya kale ya kotoka nokuhenuka iiponga  opo ya tsikile okulonga ehalo lyaKalunga. (Mateus 4:12; 10:16) Ihe oshiponga shoka a taalela okwa li e shi kutya ita vulu oku shi yanda. Okwa tseya kutya osha kwatela mo okulonga ehalo lyaKalunga. Jesus okwa li a tokola toko okukakatela uudhiginini we, nokwe etha a pite memakelo ndyoka.

24. Omolwashike tu na uushili kutya otatu ka kala nomukumo momamakelo kehe tage tu adha?

²⁴ Iikando oyindji aalongwa yaJesus oya kala nokulandula oshinkoti she nuulaadhi. Oyendji yomuyo oya li ya shekwa, ya hepekwa, ya kwatwa, ya tulwa mondjedhililo, ye ehamekwa nokudhipagwa nokuli. Openi ya li ya adha uulaadhi nonando inaya gwanenena? Uulaadhi mboka kawa li owala uukwatya wu li muyo. Oya pewa ekwatho okuza pombanda, ngaashi wo sha li sha ningilwa Jesus. (Aafilippi 4:13) Ino kala wa tila kutya oto ka ningilwa shike monakuyiwa. Kala wa tokola toko wu kale omudhiginini, na Jehova ote ke ku pa omukumo ngoka wa pumbwa. Kala nokulandula nomukumo oshiholelwa shOmuwiliki gwetu, Jesus, ngoka a ti: “Inamu tila, ngame onda sinda uuyuni!” — Johannes 16:33.